سؤال وجواب قررت اصير منهم وفيهم وبروح الصين .. اهل الخبره فزعتكـم

السلام عليكم ورحمة الله وبركاته ..
اجتمعت انا ونفسي وقررنا ان نروح الصين
نسمع من الناس فلان راح الصين ونزل بضاعه وعطاها مندوب ووزعها وربح و و و و الخ
يا جماعة الخير
انا بعد 3 اسابيع رايح الصين ان شالله ,,
وراس مالي بين الـ 2000 , 3000 د.ك
شي على قدي
1/ شنو اكثــر بضاعه ربحها يكون مضمون .. من الصين ؟؟
2/ شنو قصة المندوب ووين احصله بالضبط وشلون تكون حسبته للشغل [ اللي يبيع البضايع اللي بتجـي من الصين للكويــت ] ؟؟
3/ اللي عنده مترجم متعامل معاه بالصين وفاهم بهالامور يفيدني فيهاا ..
4/شلون اتفق مع شركة الشحن للأغراض عشان يوصلونها للكويت وجم بتكلف تقريبا ؟؟

طبعا المنطقــة هناك سمعت انهـا كوانزو بالتحديد فالاسواق فيها ماتنتهــي ,, ولو في شي ثاني فيدوني
صاحبكم شبه عليمي
لا يعني عليمي عليمي خالص فأتمنى تفيدوني ولو بالشي البسيط بأي من هالامور

ويعطيكــم العافيــه مقدمـــاً :وردة:
 

ألب آرسلان

عضو بلاتيني
99076900 شركة ألوان الزهور

هذي شركة نقل ولو تبي تسافر يوفرون لك مترجم وسكن ويعطونك مرشد للأسواق وغيره

وللامانه انا شخصياً ماجربتهم لكن اتصلت فيهم استفسر عن بضاعه فقط

وإن شاء الله تحصل مبتغاك يا الظفيري
 

adilalroh

عضو ذهبي
انا ان شاء الله شهر ابريل او مايو بكون في الصين وتحديدا في كوانزوا للمره الخامسه
خلال سنتين..
1/ شنو اكثــر بضاعه ربحها يكون مضمون .. من الصين ؟؟
اكبر خطأ راح ترتكبه انك تروح ما تدري شنو تبي
اول شيء مر الاسوق وشوف شنو المطلوب وبعدها اعرف الاشعار
وبعدها ابحث بالنت او الشركات واعرف فارق الشعر
البضاعه+ الشحن+تكاليف السفر...وبعدها طلع الربحيه
الذهاب للصين سهل وجلب البضاعه اسهل بس التصريف او التوزيع راح تعاني منه
وبالخصوص اذا كانت البضاعه غير مطلوبه او سوقها ضعيف


2/ شنو قصة المندوب ووين احصله بالضبط وشلون تكون حسبته للشغل [ اللي يبيع البضايع اللي بتجـي من الصين للكويــت ] ؟؟
هذا تسوى اعلان بالجرايد الاعلانيه ويجيك بدال الواحد 10
اما راتب بعموله او عموله وانت اشترط ان يكون عنده سياره
واكتب بينك وبينه عقد ولا تسلمه البضاعه كامله سلمه جزء منها
الغالب انك تحتاج توصيل بضاعه يعني في هالحاله تسوي اعلان للمنتج
اللى انت جبته وتحط رقم تيلفونك او تيلفون اي شخص اخر
وتجيك الطلبات ترسلها مع السايق
والسعر اذا كان توصيل من 2 الى 3 دينار للمشوار الواحد" الطلب"
وهولاء اهل التكاسي تحصلهم بكثره

3/ اللي عنده مترجم متعامل معاه بالصين وفاهم بهالامور يفيدني فيهاا ..
المترجمين واجد واذا قررت تروح انا اعطيك رقم واحد
وانت تختار يا تعطيه 200 رممبي( تقريبا 8.400 دينار كويتي) يوميا او5% من قيمه البضاعه

4/شلون اتفق مع شركة الشحن للأغراض عشان يوصلونها للكويت وجم بتكلف تقريبا ؟؟
راس المال عندك بسيط( والله يغنيك)..
انت محتاج شحن جوي وليس بحري والافضل والارخص علي التايلنديه
الكيلوا 1.250 د.ك
الاتفاق يتم عن طريق المترجم اهو اللى يضبط لك كل شيء والبضاعه توصل للكويت مبني الشحن الجوي خلال 3 ايام تقريبا
ويجب ان لا يكون هناك بضاعه ممنوعه او مقلده.

الافضل بلا شك منطقه كوانزوا
وهناك منصقه ايوو وفيها سوق الفوتيان
( يبي له بروحه اسبوعين علي ما تمر عليه كله)
واغلب المحلات جمله.. والبضاعه اللى فيه بسيطه او ستوكات
وفيه منطقه شنداا وهي خاصه بالاثاث
وفيه منطقه شنزن للإلكترونيات

اجل سفرتك لانه شهر 2 فيه عطله طويله عندهم

اي استفسار اخر لا يردك الا كيبوردك
 
ألب أرسلان/ الله يعطيك العافيه والله وماقصرت وخزنت الحين الرقم عندي وبشوف شقصتهم بالضبط ..
...

الاخ العزيز adilalroh
والله مادري شقولك ,, عسا الله يكثر من امثالك واجابه على ماقالو شافيه وافيه ,, وعسى الله يعطيك العافيـه
وماقصرت
وبصراحه اللي مفكر فيه بالتحديد شغل السياره نفس معطرات للسياره والاكسسوارات وهالحركات
اشوف تقريبا الغالبيه العظمى من الشعب من الظهاري بالشويييخ فوالله مادري اعتقد هالشي مناسب وغير مكلف بالجمله

وبخصوص اني اسوي اعلان للمنتج ,,
ليش المندوب شنو فايدته غير انه يصرف لي بضاعتي ؟
ولا بس الفايده الوحيده منه اهي التوصيل ؟؟
عفوا بس مافهمت هالنقطة
لاني تصورت اني بشتري وارد الكويت اتصل عىل مندوب واتفق وياه على سعر على كل شي يبيعه له منه نصيب
واهو يدبر نفسه بصرف البضاعه ,,
لو تقدر توضح بس الله يعافيك
وحدا بدا مدا مشكووووور
 

adilalroh

عضو ذهبي
المعطرات والأكسسوارات لها سوق ومنافسين كبار ..لهم محلات...لما تروح للشويخ مثلا تحصل الباعه المتجولين يبيعون هالنوعيه وبأسعار رخيصه
عطورات- مبخر علي الولاعه-..الخ
حاليا بمنطقتنا فيه هندي.. تتصل عليه يجي للبيت يبدل لك بطاريه وربل المساحات فيوزرات...ألخ
مالي خبره بـ هالامور..اكيد انت افهم مني في هالامر بس كل شيء مشتغلين فيه


الشيء اللى يمشيء بالكويت شغلات الحريم
او
تصنيع منتج معين بموصفات معينه..
مثال:- "
تروح للمصنع وتصمم لك منتج معين بموصفات معينه وبخامه ممتازه او جيده
وتنزل فيها السوق ,البضاعه بتكون انت الوحيد اللى يوزعها بالكويت
وراح تتسوق بشكل جيد ولا يوجد لك منافسين واول مره تنزل السوق
انا ما اقصد ابتكار منتج ان اتكلم عن موصفات واضافات

التوزع نوعين..
مندوب بعموله هالمندوب اما يكون براتب او عموله او الاثنين حسب الاتفاق
يفضل انه يكون علي اقامتك وما يمنع يكون من برى.
هو اللى يقوم بتصويل البضاعه .. وتتحاسب معاه اخر الشهر
اما بالراتب الشهري..او بالعموله علي كمية البضاعه الى تم بيعها عن طريقه.
وانت عن طريقك تسوق للبضاعه.. من خلال الاعلان


اما التوصيل..
هذا تتصل فيه وتقوله تعال وصل البضاعه للمكان الفلاني" وغالبا" تكون رسوم التوصيل
علي المشتري.والغالب انها 2 د.ك او 3د.ك للمناطق البعيده.. في حال عدم الاتفاق او رفض المشتري للبضاعه انت تعطيه من 1.250 الى 1.500 حساب التوصيل.
 
واللهي اهي السفره سياحه وقلنا نصير من ربعكم بطريجنـا هههه
بس كلام كبير اللي تقوله
تروح للمصنع وتصمم لك منتج معين بموصفات معينه وبخامه ممتازه او جيده
وبنفس الوقت شغــل صح :إستحسان:
وعالعموم والله ماتدري شكثر فدتني بالمعلومات اللي وضحتها عن المندوب والوضع
وبشكل عام تشكر تشكر ياريس
واهي ان شالله هالثلاث اسابيع وربي ييسرها بعدها في اكثر من شغله تطري ماتدري ارزاقك من الله سبحانه
وعسى الله يوفقك ويجيب لك الخير خيرات ان شالله وتستاهل كل خير انت :إستحسان:
 

adilalroh

عضو ذهبي
واللهي اهي السفره سياحه وقلنا نصير من ربعكم بطريجنـا هههه
بس كلام كبير اللي تقوله

وبنفس الوقت شغــل صح :إستحسان:
وعالعموم والله ماتدري شكثر فدتني بالمعلومات اللي وضحتها عن المندوب والوضع
وبشكل عام تشكر تشكر ياريس
واهي ان شالله هالثلاث اسابيع وربي ييسرها بعدها في اكثر من شغله تطري ماتدري ارزاقك من الله سبحانه
وعسى الله يوفقك ويجيب لك الخير خيرات ان شالله وتستاهل كل خير انت :إستحسان:

تدري اول سفره خلها سياحه ومعرفه المنطقه وكتساب خبره وبالطريق جيب لك كم شغله
تطلع فيها تكاليف السفره ومن بعدها ابدأ اشتغل
بس اهم شيء تعرف السوق عدل وفارق الاسعار بين الكويت والصين..
وللعلم راح تعاني من " المافيا" بالكويت :p

مره جبت بضاعه معينه.. الحبه الواحده بـ 13 دينار
الجمله للـ50 حبه بـ 10 دينار..وكنت مصنعها بمعرفتي
دق علي واحد وطلب 50 حبه جملة وعطيته بـ 10 دينار للحبه
ال.... راح باعها مفرد ب 10 علشان يكسر سوقها.
وانا اتكلم تحديدا عن المصريين.


لا تروح في شهر فبراير عندهم عطله
شوف هذا موضوعي عن الصين 2009
http://travel.maktoob.com/vb/travel257899
 
هههههههههههههههههههههه
شكلك مقرووص منها حدك ولا جان ماتكلمت خخخخخخ
لما قريت المافيا قلت يالله سترك ولا اشوف قصدك مافيا الكويت هههه
تعال شلون السياحة عيل ؟
دام ان فبراير اجازه عندهم ؟ السياحه شلونها ووين اروح ووين المرشد السياحي ؟ :p
ترا حدي على بركة الله رايح :D
 

adilalroh

عضو ذهبي
هههههههههههههههههههههه
شكلك مقرووص منها حدك ولا جان ماتكلمت خخخخخخ
لما قريت المافيا قلت يالله سترك ولا اشوف قصدك مافيا الكويت هههه
تعال شلون السياحة عيل ؟
دام ان فبراير اجازه عندهم ؟ السياحه شلونها ووين اروح ووين المرشد السياحي ؟ :p
ترا حدي على بركة الله رايح :D
هههههههههههه
المشكله كويتي معطيه مكتب ومسوي له رخصه والمصري يلعب لعب
دنار= دينار..ياكرهي لهم:p
مسيطرين علي السوق بشكل كبير ونصابين لاخر درجه وخصوصا الاجهزه.

السياحه بهالوقت لغايه شهر 2 الجو يكون بارد وحلوه الديره
( علشان تنحاش من الرطوبه) حاليا يمكن درجه الحرار 10
عندك النهر الؤلؤئي- السفاري- الاسواق بروحها متعه وسياحه
( شوف الموضوع اللى حطيت لك اللنك ماله) تحصل فيه كل شيء
المساج عندهم عجيب ساعتين بدينار:إستحسان:
ياني تبطحت فيه تقول عتوي توه متعشى ههههههههههههههه


اذا قررت تروح علمني واحط لك كل اللى تبيه بهـ الموضوع
من الطياره للفندق للأسواق للسياحه للمدن...الخ
انت قرر وابشر باللى يفيدك في سفرتك


مادمت ذكرتني بالصين خلني اسولف عليك شوي .بعبر عن شعوري " مشتاق لها"
علي فكره امس كنت اشجع الصين:p..اتغشمر

من المواقف الطريفه اللى حصلت هناك..
كويتيه لابسه ملابس رياضه الجسم كتل :eek: يجيب المرض
بس للامانه فرتها حلوه..يعني وجهها ملكة جمال وجسمها ويع
قاعد تتهاوش مع راعي تكسي وتكلمه بالكويتي اكل ... يا نصاب.. يا .... شدعوا بيفهم:D
علشان طلب منها رممبي واحد تقريبا الرممبي فلس فلس الفلس
يعني جيب فلس وقسمه علي عشره واخذ من العشره واحد يطلع المبلغ
اشتغلت الحمياا الكويتيه قلت لها شفيج جان تقول هذا ال..ك ل ب
يبي يضحك علي:mad:
سالت راعي التكسي قالي طل داخل العداد طلع يبي منها رممبي
عطيته قلبت علي:eek: ليش تعطيه انا معاي فلوس انا بنت ناس انا عندي خير
كل هذا علشان فلس ركبت التكسي ورحت لشغلي
حصلتها بمجمع الشنط.. جان تناديني تقول انا اسفه مو قصدي..الخ
قالت شعندك هنيه قلت اشتري للأهل شنط ( عاد انا ذوقي ذوق يمني بالهسوالف) ميح
جان تقول تعال اساعدك.. شريت 40 شنطه اسعارهاا من 2.5 الى 4 تقريبا
جيت للكويت المره شكت فيني تقول هذا مو ذوقك :cool:

تراني ما انعطااا وجه لا جابو طاري الصين اهل علومي كلها:p
 
هههههههههههه
المشكله كويتي معطيه مكتب ومسوي له رخصه والمصري يلعب لعب
دنار= دينار..ياكرهي لهم:p
مسيطرين علي السوق بشكل كبير ونصابين لاخر درجه وخصوصا الاجهزه.

السياحه بهالوقت لغايه شهر 2 الجو يكون بارد وحلوه الديره
( علشان تنحاش من الرطوبه) حاليا يمكن درجه الحرار 10
عندك النهر الؤلؤئي- السفاري- الاسواق بروحها متعه وسياحه
( شوف الموضوع اللى حطيت لك اللنك ماله) تحصل فيه كل شيء
المساج عندهم عجيب ساعتين بدينار:إستحسان:
ياني تبطحت فيه تقول عتوي توه متعشى ههههههههههههههه


اذا قررت تروح علمني واحط لك كل اللى تبيه بهـ الموضوع
من الطياره للفندق للأسواق للسياحه للمدن...الخ
انت قرر وابشر باللى يفيدك في سفرتك


مادمت ذكرتني بالصين خلني اسولف عليك شوي .بعبر عن شعوري " مشتاق لها"
علي فكره امس كنت اشجع الصين:p..اتغشمر

من المواقف الطريفه اللى حصلت هناك..
كويتيه لابسه ملابس رياضه الجسم كتل :eek: يجيب المرض
بس للامانه فرتها حلوه..يعني وجهها ملكة جمال وجسمها ويع
قاعد تتهاوش مع راعي تكسي وتكلمه بالكويتي اكل ... يا نصاب.. يا .... شدعوا بيفهم:D
علشان طلب منها رممبي واحد تقريبا الرممبي فلس فلس الفلس
يعني جيب فلس وقسمه علي عشره واخذ من العشره واحد يطلع المبلغ
اشتغلت الحمياا الكويتيه قلت لها شفيج جان تقول هذا ال..ك ل ب
يبي يضحك علي:mad:
سالت راعي التكسي قالي طل داخل العداد طلع يبي منها رممبي
عطيته قلبت علي:eek: ليش تعطيه انا معاي فلوس انا بنت ناس انا عندي خير
كل هذا علشان فلس ركبت التكسي ورحت لشغلي
حصلتها بمجمع الشنط.. جان تناديني تقول انا اسفه مو قصدي..الخ
قالت شعندك هنيه قلت اشتري للأهل شنط ( عاد انا ذوقي ذوق يمني بالهسوالف) ميح
جان تقول تعال اساعدك.. شريت 40 شنطه اسعارهاا من 2.5 الى 4 تقريبا
جيت للكويت المره شكت فيني تقول هذا مو ذوقك :cool:

تراني ما انعطااا وجه لا جابو طاري الصين اهل علومي كلها:p

ههههههههههههههههههههههههههههههههههههههههههه
احلا احلا شي دناااااااار يااخي تخليك تكش هالكلمه
عادي نسرئك ننهبك بعد ازن حضرتك

حلو يعني الجو حلييو هناك
اما المساج ساعتين بدينار !! :eek:
والله حلوووه حييييل
يبوووووووووي مشكلة الكويتي لي سافر علباله الكل بيستغله وصج هذا اللي حاصل [ خليجي يمشي ومعاه بير نفط ] هذي فكرتهم برا
اما على فلس قامت الدنيا وقعدت خخخخخ مالها سنع سالفتها

عندي الوالد الله يطول فعمره
راح للصين مرتين
وهو كان صاحب اقتراح اني اروح لها سواء للسياحة او للتجاره
الاولى راح يشتري اثاث لبيتنا بس
والثانيـه
راح للصين قبل فتره ونزل منها بضاعه [ اللعاب ]
وطبعـاً خسر فيهـا
اتذكر شراها منه سوري واهي بالشحن وخسر فيها 200 دينار

فخلني اروح سياحة واستكشف الوضع هناك افضل صح ؟
وبالصيف انزل لها مره ثانية لو الامور ضبطت وعرفت اللي لي واللي علي
يتراوالي تذكرتها 250-300 دينار اذا ماخاب ظني

:eek: مافي مدينة اللعاب هناك :eek: ؟

اي وعلى فكرة موضوعك :إستحسان: مكفي وموفي بس مشكلته 49 صفحه :D

وبدز لك رسالة بعد ما احجز لها ضروووري على تاريخ 29 / 1 ان شالله بتكون السفره
عطنا عطنا العلوم بعد :p
 

adilalroh

عضو ذهبي
الله محيي النشاما:)

الجو بالنسبه لشهر فبراير برد
وباقي السنه رطوبه يعني ما تقدر تتمشي ..تجيك ابو زليغه:p
عاد اهم تحذير قالوه لنا لا تقطعون البرتقال من الشجر( يقدسونه)
عاد لا شفنا ورقه شجرة علي الارض ولا غصن اخذنا فوق حدر من الخوف.:cool:

المساج راح تحتاجه يوميا ..لانك راح تمشي وانت ما تدري بعمرك
وكنا اخر الليل نتمسج.. وبعدها دش ونتعشي وننام.
وكل ما ارجع من الصين اكون نازل تقريبا 6 الى 8 كيلوا
طبعا الاكل هناك معدوم..بإستثناء المطاعم العربيه وهم مو ثقه
قزرتها هناك حمص وسلطه وتونه..
بعد ما قضينا علي المعلبات اللى جبناها من الكويت خلال ثلاث ايام:p

بخصوص اللعاب
هناك تحصل كونتينر جاهز للشحن اللعاب 40 قدم hq( الحجم الكبير) كان بـ6500 دينار
واصل للكويت ممكن تطلع منه دبل راس المال بس يعتمد علي نوعيه اللعاب وحدثتها
والقدر علي توزيعها..
هناك تحصل كونتينر جاهز للشحن ليتات 20 قدم و40 قدم و40 hq والاسعار حسب حجم الوكنتينر


انا شفت بانشي صغير علي رموت كنترول.!!:confused:
تحط الجاهل فيه وتربط حزام الامان وانت تتحكم فيه من خلال الرموت كنترول.
خلال هالايام وبر راح يمشيء سوقهاا

علي طاري الاثاث..
واحد من الشباب يسولف لي يقول علشان ااثث بيتي يبي لى علي الاقل 18 الف دينار وتأثيت اي كلام يعني غرفه عياله كل واحد كبت ابو متر
واذا تأثيث ديلوكس يبي لي اقل شيء 35 الف دينار
يقول رحت للصين وشريت اثاث وهدايا والتذاكر وكلووو بـ 9000 دينار
طبعا كل ما ارد من الصين اجيب معاي كتلوجات اثاث حسب طلب بعض الاخوان


التذاكر خذيناها من الخطوط القطريه شارع فهد السالم
وكانت بـ 304د.ك وعن طريق الانترنت سعرها ارخص وتقدر تختار الوجبه
وهي الافضل بدون منازع للأسباب التاليه
مدة الترانزيت 2 ونص نقريبا
دايركت علي مطار كوانزوا من قطر
طيران نظيف

فالك طيب..
ولنا عوووووده
 

Q8bdooon

عضو فعال
شنغهاي تابعتها بالتلفزيون يقولك مدينة حلوة ومدينة شبهة اروبية :p بس تقليد صيني مر عليها خوش مدينة بس ترا بعيدة عن بكين يعني يبلك طيارة على ما توصل مو تروح بقاري :D ترا تتعب
 
السلام عليكم ورحمة الله وبركاته ..

اجتمعت انا ونفسي وقررنا ان نروح الصين
نسمع من الناس فلان راح الصين ونزل بضاعه وعطاها مندوب ووزعها وربح و و و و الخ
يا جماعة الخير
انا بعد 3 اسابيع رايح الصين ان شالله ,,
وراس مالي بين الـ 2000 , 3000 د.ك
شي على قدي
1/ شنو اكثــر بضاعه ربحها يكون مضمون .. من الصين ؟؟
2/ شنو قصة المندوب ووين احصله بالضبط وشلون تكون حسبته للشغل [ اللي يبيع البضايع اللي بتجـي من الصين للكويــت ] ؟؟
3/ اللي عنده مترجم متعامل معاه بالصين وفاهم بهالامور يفيدني فيهاا ..
4/شلون اتفق مع شركة الشحن للأغراض عشان يوصلونها للكويت وجم بتكلف تقريبا ؟؟
طبعا المنطقــة هناك سمعت انهـا كوانزو بالتحديد فالاسواق فيها ماتنتهــي ,, ولو في شي ثاني فيدوني
صاحبكم شبه عليمي
لا يعني عليمي عليمي خالص فأتمنى تفيدوني ولو بالشي البسيط بأي من هالامور


ويعطيكــم العافيــه مقدمـــاً :وردة:


جمــيع مافي الصــين راح تــلاقــيه بجــدة

وأسأل مجــرب ولاتـــسألأ طبيــب
 
أعلى