سؤال وجواب أسئلة و استفسارات بخصوص شراء مطعم

[Pet_Eng]

السلام عليكم ورحمة الله وبركاته،
هذي تعتبر أول مشاركه لي بهل المنتدى و اللي فعلاً شدني بهل المنتدى التفاعل بين الأعضاء.

موضوعي اليوم بخصوص بيع مطعم في الكويت مع عماله و اغراضه و رخصته و للأمانه هذي أول تجربه تجاريه لي بهل مجال و حاب اني اشتري هل مطعم بس قبلها حاب اني اسأل الأعضاء عن جم سؤال و يارييت احد يفيدني و ادري فيكم الخير و البركه.

الأسئلة كالتالي:

1-شنو معنى مصطلح بيع الرخصه و هل اهي شغله قانونيه و اذا فرضا شريت الرخصه هل رخصه راح اتحول بأسمي؟

2- من ضمن عرض شراء المطعم، يقول المطعم فيه عمال، هل لازم اقامة العمال اتحول بأسمي؟

3- في ابالكم اسئله تهقون لازم اسئل راعي الحلال فيها؟

و يعطيكم الف عافية و اسف على الأطاله.

 

[محمد001]

أتوقع لو تسأله شنو سبب بيعه للمطعم يعني مثلا لو هو بايع المطعم لأنه خسران ليش أنت تأخذه وتتوهق

 

[تويتر الكويت]

1- شنو معنى مصطلح بيع الرخصه و هل اهي شغله قانونيه و اذا فرضا شريت الرخصه هل رخصه راح اتحول بأسمي؟

بيع الرخصة يعني صاحب الرخصة يتنازل لك عن الترخيص التجاري
وتشتري الترخيص التجاري مع اسم المطعم مقابل مبلغ من المال
وتتحول الرخصة باسمك في وزارة التجارة والصناعة
اذا كانت تنطبق عليك الشروط
وهي ان تكون كويتي لا تعمل بوظيفة حكومية
او انك تعمل في مؤسسة او شركة مثل المؤسسات و الشركات النفطية
مثل شركة نفط الكويت او مؤسسة البترول او غيرها من الشركات و المؤسسات
او ان تكون متقاعد من العمل او تسجل الترخيص باسم والدك او والدتك او زوجتك
او اي شخص من اقاربك او اصدقائك ليس لديه وظيفة حكومية

 

[تويتر الكويت]

2- من ضمن عرض شراء المطعم، يقول المطعم فيه عمال، هل لازم اقامة العمال اتحول بأسمي؟

هذا امر اختياري راجع لك
بامكانك ان تاخذ العمال و تحولهم على اقامة المطعم
وبامكانك ان ترفضهم وتبحث عن عمال غيرهم
ولكن العمال اصحاب الخبرة افضل من العمال الجدد
خصوصا اذا كانوا قدماء و زبائن المطعن يعرفونهم وتعودوا عليهم
ولكن الامر يرجع لصاحب الرخصة ربما يرفض التنازل عن العمال

 

[تويتر الكويت]

3- في ابالكم اسئله تهقون لازم اسئل راعي الحلال فيها؟

طبعا في اسئلة كثيرة لازم تسأل عنها
اهم سؤال هل الايجار يبقى كما هو
او ان صاحب العمارة او صاحب المجمع يقوم
بزيادة الايجار الشهري عند تحويل الرخصة باسم المستأجر الجديد
وتسأله هل سوف يتنازل لك عن العمال أو لن يتنازل
وتسأله هل سوف يطلب منك مبلغ مقابل التنازل عن المطعم
لان بعض الاشخاص يطلبون مبلغ للتنازل عن المحل
وهو مبلغ اضافي غير مبلغ الرخصة
وتسأله هل صاحب العمارة او المجمع سوف يجدد لك العقد
وتسأله كم مدة العقد التي سوف تكون بينك وبين المالك
وهو صاحب العمارة او صاحب المجمع الذي فيه المحل

 

[Pet_Eng]

يعطيكم الف عافية اخوي توتير الكويت و محمد على الرد التفصيلي و فعلاً ساعدتوني من خلال ردودكم و ان شاء الله راح ابلغكم أول بأول شنو راح يصير معاي منها افيد أعضاء المنتدى و منها اتعلم و الحياة تجارب:blush:

 

[تويتر الكويت]

مثل ما قال اخوي محمد لازم تعرف شنو سبب بيع المطعم
وطبعا لازم تسأل المحلات المجاورة او حارس العمارة او حارس المجمع
لان صاحب المحل الحالي ممكن ما يعطيك سبب البيع بالتفصيل
او ممكن ما يكون صتدق معاك علشان ما تهون عن شراء المطعم
اذا كان المطعم خسران او كان المكان غير مناسب للنشاط الحالي
وانت بذكائك تقدر تحكم من خلال موقع المطعم
هل هو مطعم في مكان مميز او على الشارع العام
او هو في مكان داخلي او في منطقة مافيها كثافة سكانية
واهم شي يكون في منطقة فيها سكان كويتيين مو منطقة مقيمين
اما اذا كان موقع مميز ما يهم اذا كان في منطقة مقيمين
خصوصا اذا كان في منطقة تجارية معروفة بكثرة المرتادين و المتسوقين

 

[المهذب]

ما أبي أحبطك ..ولكن المهم تدرس الموضوع قبل الاقدام على شراء المطعم..
وأسال نفسك هل أنت فاضي للاشراف على العمال وتوفير متطلبات نجاح هالمشروع..
وهل درست الحركة على المنطقة المحيطة بالمطعم ومدى حيويتها ..
أنا شايف أن الشغلة يبيلها تفرغ ..لأن أي مشروع فيه عمال يبيله
مجابل ولويه..من تحويل اقامات وشهادات تحويل رواتب ومراقبة الايرادات والمصروفات وهلمجرا..
وبالنهاية احسبها صح ..واستشير أصحاب الخبرة من المحيطين حولك ..والله يوفقك..:وردة:​