وصية الشريف بركات لإبنه مالك
يالله يالليّ كـل الأموات ترجيك
يا واحد(ن) ما خاب حيّ(ن) ترجاك
***
يارب عبد(ن) مامشى في معاصيك
ولايمشي إلا في محبتك وأرضاك
***
يا مرقب(ن) بالصبح ظليت باديك
ما واحد(ن) قبلي خبرته تعلاك
***
ولّيت ياذا الدهر ماكثر بلاويك
الله يزودنا السلامة من اتلاك
***
ياللي على العربان عمّت شكاويك
ولّيت يا دهر الخطا ول مقواك
***
واليوم هالكانون غاد(ن) شبابيك
تلعب به الارياح من كل شباك
***
يا مالك اسمع جابتي يوم اوصيك
وأعرف ترى يابوك بآمرك وانهاك
***
وصية(ن) من والد(ن) طامع(ن) فيك
تسبق على الساقه لسانه لعلياك
***
أوصيك بالتقوى عسى الله يهديك
لها وتدركها بتوفيق مولاك
***
أحفظ دبشك اللي عن الناس مغنيك
اللي ليا بان الخلل فيك يرفاك
***
إجعل دروب المرجله من معانيك
وأدراج سيسها على العز مرقاك
***
لا تنسدح عنها وتبغاني اعطيك
جميع ما يكفيك ما حاصل(ن) ذاك
***
أحذر أمر ليعات تبيها لتاليك
أيضا وترخص عنها قدر ماواك
***
أدّب ولدك إن كان تبغيه يشفيك
وأستسعفه من بعد مرضاه بالاك
***
إمّا سمج واستسمجك عند شانيك
ويفر من فعله صديقك وشرواك
***
والا بعد جهله ترا هو بياذيك
لو زعلت أمة لا تخليه يالاك
***
إحذر تضيّع كل من هو ذخر فيك
معروفه لا تنساه واوفه بعرفاك
***
ترى الصنايع بين الاجواد تشريك
إليا طمعت بركزها لا تعداك
***
وأوف الرجال حقوقها قبل تعنيك
لا تعتمد بالعفو فالحق يقفاك
***
وهرج النميمة والقفا لا يجي فيك
وإيّاك عرض الغافل إيّاي وإيّاك
***
تبدي حديث الناس وفيه تشكيك
وتهيم عند الناس بالكذب واشراك
***
وإذا نويت إحذر تعلم بطاريك
كم واحد(ن) تبغي به العِرف وأغواك
***
وأحذر شماتت صاحب(ن) لك مصافيك
وليا جرالك جـاري قـال لـولاك
***
ولا تحسب أن الله قطوع(ن) يخليك
ولا تفرح إن الله على الخلق بداك
***
إن إشتهى حط الطمع في تواليك
لو مالقيته يافتى الجود يلقاك
***
والضيف قدم له هلا حين يلفيك
من ما تنوشه يافتى الجود يمناك
***
أكرم قباله فإنها من شواديك
وأبذل له المجهود مدام يعناك
***
إحذر تلقي الضيف مقرن علابيك
خلّه محب(ن) لك صديق(ن) ليا جاك
***
ووصيك زلاّت الرفيق أن عثا فيك
ما زال يغطاه الشعر فاحتمل ذاك
***
راعه ولو ما شفت إنه مراعيك
عساك تكسر نيته عن معاداك
***
لا تامنه واطلب من الله ينجيك
ويكفيك ربك شر ذولا وذولاك
***
شفني أنا يا بوك بآمرك وانهيك
عن التعرض بين الاثنين حذراك
***
إذا حضرت اطلابة(ن) مع شرابيك
اسع لهم بالصلح واللاش يفداك
***
ابذل لهم بالطيب ربك ينجيك
ولا تجضع الميزان مع ذا ولا ذاك
***
أمّا الشهاده أدّها إن دعوا فيك
بيّن عمود الدين لا عميت أرياك
***
بالك تماشي واحد(ن) لك يرديك
طالع بني جنسك وفكر بممشاك
***
رابع أصيل(ن) في زمانك يشاكيك
لا شاف خملاتك عن الناس غطاك
***
وحذراك عن طرد المقفي حذاريك
عليك بالمقبل وخل اللي تعداك
***
ثم إلعن الشيطان حذراك يغويك
ترى ان تبعته لشّرابيك وداك
***
وأوصيك لا تشكي علينا بلاويك
انت السبب طرفك عيونك بيمناك
***
وإعرف ترى اللي قد وطا الخلق واطيك
ولا أنت أعز من الجماعة هذولاك
***
ألمسك يا راسي عن الذل وأخطيك
وأحذر تكلم يالساني وحذراك
***
وألطف بجارك ثم قم دون عانيك
وافطن لما يعنيك عن ربعة اخواك
***
ياذيب وإن جتك الغنم في مفاليك
فاكمن لي حيث الرعايا تعداك
***
من أول(ن) ياذيب تفرس بإياديك
واليوم جا ذيب على الفرس عداك
***
ياذيب عاهدني وعاهدك مارميك
مرميك أنا ياذيب لو زان مرماك
***
والنفس خالف رايها قبل ترميك
ترى لها الشيطان يرمي بالأدراك
***
ومن بعد ذا لا تصاحب النذل يعديك
عن صحبة الانذال حشاك حشاك
***
ترا العشير النذل يخلف طواريك
وأنا أرجي انك ماتجي دون آبـاك
***
والهقوة أنك ما تجي دون أهاليك
ولا ذكر عود الورد يثمر بتمباك
***
والحر مثلك يستحي يصحب الديك
وإن صاحبه عاعا معاعات الأدياك
***
لا تستمع قول الطرف يوم يلفيك
بالكذب يقضي حاجته كل ماجاك
***
من نم لك, نم بك, ولا فيه تشكيك
وألياه قد أزرى رفيقك وزراك
***
عندك حكا فيني وعندي حكا فيك
وأصبحت كارهنا وحنا كرهناك
***
ما خطاك ما صابك ولو كان راميك
واللي مصيبك لو تتقيت مخطاك
***
مير استمع مني عسى الله يهديك
أنصحك يا ما لك لك الله مولاك
***
عندي مظـنّه ما تمثلتها فيك
واطلب لك التوفيق من عند مولاك
