اي سؤال يختص برياضة كمال الأجسام أسأل ونحن نجيب

مدمن

عضو مميز
يعطيك العافية اخوي على مجهودك الرائع ..

بقيت اسالك عن تستا فون
وعن الدكة الهولندي
ومن الصيدلية بعد

شنو قوتهم على الجسم وشنو خطورتهم وشلون اتحاشى اخطر.!!



1- اخي الحبيب انا قلت بأول الموضوع ان الاساله عن انواع الهرمون والمنشطات واسعارها وكيفية استعمالها للجسم والجرعات ماراح اجاوب عليها

2- مافي هرمون اسمه تستافون او يمكن مامر علي .. اكتب اسمه بالانجليزي كامل اذا تعرفه .. يجوز انت تقصد التسترون وهذا امر اخر , هو باختصار هرمون الذكوره .. ويؤدي استعماله المفرط او بشكل خاطىء الى امراض العقم وسرطان البروتستاتا .. ويعمل خلل في هرمونات الذكوره عندك فتتحول بعد مده الى هرمون انثوي اللي هو الاستروجين اذا ماخذيت معاه منظم هرمون فتروح بستين داهيه .. بعدين يأثر على المزاج ويعمل خلل في خلايا المخ .. ابتعد عنه حتى لو كميه قليله .. ويؤدي الى الصلع وتساقط شعر الراس .. وهذي نصيحه واذا تبي البديل عليك بمحفزات هرمون الذكوره الطبيعيه مثل: العسل الطبيعي والخضره كالجرجير والبقل والرويد والمكسرات كالكازو واللوز والجوز المليئه بالاوميقا ثري" الزيت المفيد للعضلات" كذلك الاسماك بانواعها وطبعا ارخصها واسرعها التونه بالماي بدون ملح او زيت

3- مسألة ان الهرمونات الان تباع بالصيدليات نعم صحيحه 100% لكن اعلم يا اخي الحبيب ان "ملاعين الخير" بعض الصيادله وانا اعلم انهم من الجنسيه المصريه اللي يبيعون الهرمون هذا امر ممنوع قانونا .. لان الصيدليه والمستشفيات بشكل اوسع لا يتوفر لديها سوى هرمونين وهما: 1- التسترون وهو الهرمون الذكري او السستانون وهو خطر جدا وبعض الاجسام لاتتحمله ويتكون من اربع انواع للتسترون ب- هرمون النمو "المعروف بإسم القروث بالانقليزي"
وهذيلي الهرمونين لهم استخدامات طبيه الاول لحالات العقم والخلل الهرموني في بعض الرجال ولكبار السن الذين لايستطيعون المعاشره الزوجيه لكبر سنهم .. والثاني يستخدم لبعض الاطفال الخدج او غير كاملي النمو
لكن اخواننا المصريين الصيادله "يمشون" بضايع اصدقائهم المدربين من الجنسيه نفسها .. فأعلم اخي الحبيب .. ان هذه الهرمونات لاتباع في الصيدليات إلا بوصفه طبيه .. فإن باعك اياها الصيدلي فاعرف انه مايخاف الله وقصده تجاري بحت .. فانتبه ولايغرك ان البضاعه تباع في صيدليه فاغلب المدربين الان يصرفون بضايعهم في الصيدليات لان الزبون يأمن على نظافتها وغير هذا اسعارها تكون مدوبله وغاليه لان الواحد منغش وحجته معروفيه "شاريها من صيدليه"

4- الدكه الهولندي "50" : وحسب علمي انها غير متوفره الان بالكويت بشكل كبير .. الدارج الان الفرنسي 50 والبلجيكي 200 .. واعرف يا اخوي ان الدكه تندرج في عائلة التسترون لكنها مخففه جدا وهي خطره ايضا وتؤدي الى اعراض التسترون وان كان بشكل اخف .. وفيها مشكله انها تزيت المفاصل بالاول وبعده شهر او اكثر يبدا معك عوار بالمفاصل لانها تنشف ماي المفاصل فاغلب اهل الكورسات مايوقفون عنها بسبب عوار المفاصل اللي سببته اهي بالاساس .. اخي الحبيب انت لست محترف وانا اقصد هنا اللي يتمرنون مرتين باليوم "اهل البطولات" وغيره .. انت انسان تبي جسم قوي وشكل جميل .. والكورسات تعطيك مفعول سريع لكن له اثار جانبيه توصل لمراحل خطره .. العب طبيعي وضبط اكلك ونومك واحرص على الاستمراريه واتعب على نفسك راح تلقى النتيجه اللي تبيها واحسن

وسامحنا على القصور
 

ABDULRAHMAN

عضو بلاتيني
أخوي تائب ..

شاكرلك على هـ الموضوع و فعلا استفدت المعلومات اللي قلتها و من أسئلة الزملاء أيضا .

بارك الله فيك .. :)
 

مدمن

عضو مميز
أخوي تائب ..

شاكرلك على هـ الموضوع و فعلا استفدت المعلومات اللي قلتها و من أسئلة الزملاء أيضا .

بارك الله فيك .. :)


وفيك اخوي الحبيب

واذا عندك سؤال معين انا حاضر

واذا عندك معلومه نستفيد منها نكون لك من الشاكرين

وسامحونا على القصور
 

ABDULRAHMAN

عضو بلاتيني
والله مافي سؤال معين لكن نبي نصيحة منك

النادي ماروح له صارلي فترة لكن اذا رحت له ألعب شامل طول المدة العب شامل

لأني ماروح له كل يوم بالــ 10 أيام مرتين يمكن

أهتم بتمرين الضغط و المعدة فقط بالبيت و أحرص عليهم

جسمي زين و الحمدلله

لكن أغش نفسي مرات بتمارين المعدة لدرجة إني خلاص ماقدر أقوم كلش المرتبة

وهم نفس الشي بالضغط ..

يعني تقدر تقول سويدي فقط و النادي أروح له بس عشان ألعب شامل مثل ما قلت لك

الجسم زين الحمدلله بس إذا عندك نصايح معينة فيدنا

الطول 172 الوزن 70
 

مدمن

عضو مميز
والله مافي سؤال معين لكن نبي نصيحة منك

النادي ماروح له صارلي فترة لكن اذا رحت له ألعب شامل طول المدة العب شامل

لأني ماروح له كل يوم بالــ 10 أيام مرتين يمكن

أهتم بتمرين الضغط و المعدة فقط بالبيت و أحرص عليهم

جسمي زين و الحمدلله

لكن أغش نفسي مرات بتمارين المعدة لدرجة إني خلاص ماقدر أقوم كلش المرتبة

وهم نفس الشي بالضغط ..

يعني تقدر تقول سويدي فقط و النادي أروح له بس عشان ألعب شامل مثل ما قلت لك

الجسم زين الحمدلله بس إذا عندك نصايح معينة فيدنا

الطول 172 الوزن 70


القاعده تقول : "قليل مستمر خير من كثير متقطع"

وانت تطبق هالمقوله بقولك انك حريص على الرياضه بالبيت

اولا: تمرين الشامل يجب ان لايزيد عن 12 يوم متواصل .. خصوصا للناس اللي اول مره تلعب هالرياضه والسبب ان الشامل يشد العضلات ويقويها فقط

ولانه يضغط على العضله ويمكن يسبب لها شد وتقلص خصوصا للناس الضعاف البنيه

مافي مانع انك تلعب شامل طول حياتك لكن ثلاث مرات بالاسبوع فقط .. ويكون تمرين جانبي مو اساسي يعني يعني تكون اللعبه الرئيسيه الجري والمشي مثلا او السويدي او التايبو .. والسبب طبعا ان العضله تحتاج لايام راحه على شان تمتد وتاخذ شكل .. الضغط عليها بشكل مستمر يضرها ومايفيدها .. وجذي مانعتبره كمال اجسام لان كمال الاجسام يعتمد على الضغط والتركيز على عضله عضله على حسب الجدول والخروج بشكل متناسق وجميل وقوي

ثانيا: الضغط والمعده بالبيت مافيهم اي مشكله .. ونصيحتي لك ان كنت من الناس اللي يحرصون على الرياضه بالبيت اكثر من الجيم .. انك تزيد عليهم جم تمرين مهم مثل "العقله" .. علق لك عقله بالباب او اي مكان مرتفع والعبها مع تمارين الضغط .. العقله مفيده جدا للظهر كله وتشغل الاكتاف الامامي والخلفي وتشغل الباي ايضا .. كذلك لازم تمشي وتهرول على شان تشغل الريل ومنطقة الارداف .. ومثل منت عارف ان الريل "الارجل" تشكل 70 من الجسم

واذا ماكان عندك وقت تمشي او منطقتكم مافيها ممشى .. تقدر تصعد وتنزل دري البيت "الدرج او السلم" وتبدأ بعشر مرات صاعد نازل وتزيد بشكل اسبوعي وطبعا تستمر بهالعاده قبل لا تلعب الضغط والعقله والمعده

ثالثا: موضوع المعده وتمارينها وهذا امر مهم جدا واشكرك على هالسؤال .. يظن الكثيرون ان المعده المعضله والمقسمه سببها الرئيسي تمارين المعده وطبعا هذا مفهوم خاطئ المعده ليكون شكلها جميل وملمسها قوي ومعضل اهم شي:1- النظام الغذائي والمحافظه عليه: يعني الابتعاد عن السكريات والدهون والكارب عالاقل بعد التمرين .. يعني بعد ماتتمرن وتخلص تخلي اكلك ناشف تتوقف عن الكارب وتخلي الاكل ناشف بروتين "لحوم اسماك الابتعاد عن الخبز والعيش بعد التمرين الخ" وخضروات وفواكه فقط
2- المشي والحركه: وهو عامل اساسي في تشغيل عضلات المعده

الامر الاخير اخوي الحبيب بالنسبه للمعده ودام انك تلعبها كل يوم .. العب تمارين للعضلتين اللي تحت وركز عليهم .. واذا ركزت عليهم يشتغلون معاك الاربع اللي فوق

ثالثا: بالنسبه لوزنك وطولك ماشاء الله متناسق .. لكن دام انك تلعب بالبيت اكيد جسمك فيه فات شوي وموشاد حيل والسبب انك ماتركز على بعض العضلات وهالامر يحتاج للجيم لانه فيه جميع الاجهزه لجميع العضلات وتقدر تتغلب على هالمساله بالمشي

اتمنى اني افدتك

واذا فيه اي شي موفاهمه انا حاضر

وسامحنا على القصور
 

ABDULRAHMAN

عضو بلاتيني
مشكور صديقنا تائب

بالنسبة للنادي أنا أكثر من 4 سنين أروح له مثل ما قلت لك بس ألعب شامل لأني أعتمد على الضغط و تمارين المعدة و النادي كل 4 أو 5 أيام مرّة و على حسب ظروف الدوام

و الجري طبعا ما اقطع عنه و أنا كنت عداء سابق للمسافات الطويلة ;)

مشكور أخوي مرة ثانية و ماقصرت و إذا في أي سؤال في بالي راح أستفسر منك ان شاء الله :):وردة:
 

k7elan

عضو بلاتيني
لو سمحت عندي سؤال بس بخصوص اذا تنصح بنوادي متميزة بنظرك لممارسة السباحة


عندي كريشة صغيرة لكن لو امشي لمدة بسيطة يعني لفترة اسبوع على جهاز مشي عندنا بالبيت تنمحي

لكني غير ملتزم بالمشي


يعني تقدر تقول جسمي يزيد بصعوبة و ينزل بسهولة و طبيعتي ما استسيغ اندية الحديد و كمال الاجسام

و يمكن اتقبل نوادي السباحة


فإذا تنصح بأحواض سباحة جيـدة اكون شاكر لك.؟

اذا بالمنطقة الرابعة يكون افضل

الطول 172 وزن 67
 

مدمن

عضو مميز
لو سمحت عندي سؤال بس بخصوص اذا تنصح بنوادي متميزة بنظرك لممارسة السباحة


عندي كريشة صغيرة لكن لو امشي لمدة بسيطة يعني لفترة اسبوع على جهاز مشي عندنا بالبيت تنمحي

لكني غير ملتزم بالمشي


يعني تقدر تقول جسمي يزيد بصعوبة و ينزل بسهولة و طبيعتي ما استسيغ اندية الحديد و كمال الاجسام

و يمكن اتقبل نوادي السباحة


فإذا تنصح بأحواض سباحة جيـدة اكون شاكر لك.؟

اذا بالمنطقة الرابعة يكون افضل

الطول 172 وزن 67


هلا اخوي الحبيب كحيلان :وردة:

اسمحلي ماعرف عن نوادي السباحه .. او اي شيء عن رياضة السباحه :) .. لكن اللي اعرفه من معلوماتي المتواضعه ان النوادي الرياضيه التابعه للهيئه في لها اشتراكات للحوض .. وانت بالرابعه اسال عن نادي التضامن اذا كان في اشتراك لحوضه او النصر .. اللي متاكد منه نادي اليرموك لكنه بعيد عليك اهو بمشرف و اشتراكه 20 دينار بالشهر .. وهو ممتاز وفاضي اغلب الاوقات والمسبح اولمبي .. تقدر تشترك في بلاتينيوم كيفان فيه حوض كذلك نادي الهلال مقابل كيفان صوب المينا

ومبين ماشاء الله من الوزن والطول ان جسمك حلو ورياضي .. الله يوفقك ولاتقطع رياضه .. لو تستمر على المشي مثل مابينت بجهاز البيت المشي الموجود عندك

وسامحنا على القصور واي استفسار انا حاضر :وردة:

سامحنا على القصور
 

مدمن

عضو مميز
مشكور صديقنا تائب

بالنسبة للنادي أنا أكثر من 4 سنين أروح له مثل ما قلت لك بس ألعب شامل لأني أعتمد على الضغط و تمارين المعدة و النادي كل 4 أو 5 أيام مرّة و على حسب ظروف الدوام

و الجري طبعا ما اقطع عنه و أنا كنت عداء سابق للمسافات الطويلة ;)

مشكور أخوي مرة ثانية و ماقصرت و إذا في أي سؤال في بالي راح أستفسر منك ان شاء الله :):وردة:


ماشاء الله .. لا "يوقف" حبيبي

ودامك راعي جري الله يوفقك .. بس نصيحه صغيره من اخوك لاتركض وايد بجهاز المشي لانه يسبب عوار بالركب مع الوقت

اركض اكثر بالممشى وعلى الارض الطبيعيه

واستمر اخوي الحبيب وموفق واللي تبيه انا حاضر :وردة:

سامحنا على القصور
 

Nationalist

عضو مميز
اخ مدمن
أنا استعمل بروتين WHEY- Gold Standard قلاص قبل المشي وقلاص بعد المشي والمشي يكون نص ساعة..
هذا فقط لزيادة الوزن.. الآن اريد جسم متناسق "مو مجسم" مع اخذ الاعتبار إني سحيك زجاير وطبيعة دوامي وإنت تدري أنام باليوم 12 ساعة..
هل السباحة مفيدة لجسمي؟ مع العلم سابقا كنت الثالث على الخليج في سباحة الصدر للناشئين
 

مدمن

عضو مميز
اخ مدمن
أنا استعمل بروتين WHEY- Gold Standard قلاص قبل المشي وقلاص بعد المشي والمشي يكون نص ساعة..
هذا فقط لزيادة الوزن.. الآن اريد جسم متناسق "مو مجسم" مع اخذ الاعتبار إني سحيك زجاير وطبيعة دوامي وإنت تدري أنام باليوم 12 ساعة..
هل السباحة مفيدة لجسمي؟ مع العلم سابقا كنت الثالث على الخليج في سباحة الصدر للناشئين


استاذي الجبير وطني .. شرفنا واسعدنا مرورك :وردة:

بالنسبه لسؤالك:

اي مكمل غذائي "بروتين" يكون "whey" مايمتن .. بالعكس يعطي عضل ناشف وصافي .. يعني يزيدك عضل مو شحم .. وعموما الوي اهو خلاصة البروتين .. اذا تبي تمتن "فات" اخذ شي غير الوي .. تكون فيه الكاربوهيدرات مرتفعه كذلك الشوقر و الفات "الدسم" .. والحاصل الان اغلب انواع البروتينات بالوقت الحالي مكوناتها معقوله .. واذا تبي نوع زين ومعتدل ويرفع وزنك باعتدال فيه نوع اسمه ماس كيلر ويت قين .. هذا جيد حتى الشوقر اللي فيه اهو الجلوكوز اي "السكر النباتي" والكارب فيه معقول كذلك فيه القلوتامين وهذي ماده مهمه للانسجه العضليه .. والدسم اللي فيه دسم الحليب يعني خفيف ومعتدل

امر مهم وحطه في الاعتبار ان البروتين مكمل وماهو وجبه كامله .. يعني مو هو الاساس .. ونصيحه للجميع .. اللي ياخذ بروتين ياكل معاه تفاحه او موزه بنفس الوقت .. والشيء المهم الاخوه اللي تلعب بالبيت .. تبتعد عن البروتين والمكملات الغذائيه يكون احسن لها .. لان المكملات الغذائيه تحتاج لاجهزة النادي وتحتاج لجهد مضاعف على شان تحترق وماتضر الجسم ترسباتها .. اللي يلعب بالبيت ياكل الاكل الطبيعي ويزيد الوجبات افضل من المكملات

الامر الاخر

استعمالك للبروتين موصحيح حبيبي وطني .. احسن حزه للبروتين لجميع الحالات .. هني انا ماتكلم عن واحد يبي يمتن او واحد يبي ينزل للجميع : 1- اول ماتقوم من النوم تشرب ماي 500 ملي عقب تقعد بودقيقتين وتروح لبيت الراحه الله يعزك تسوي عملية "التبول" وهذي اهم شغله .. عقبها على طول تشرب البروتين على الريج وتكون طبعا مبطل ريجك بالماي 500 ملي او زود ورايح لبيت الراحه مخلص امورك ومنزل الترسبات اللي بالكلى بعد النومه .. بعد ماتشرب البروتين بساعه تاكل وجبة الريوق وهي من اهم الوجبات للرياضي

2- بعد انتهائك من التمرين مباشره وهني تكون عضلات الجسم محتاجه للاوكسين مع البروتين

ملاحظه: عند استخدامك لجميع المكملات لازم تشرب ماي وايد 3 لتر تقريبا على شان الكلى لاتنضر

وفي ناس تقول اخذ البروتين قبل النوم انا ما افضل كلش ان البروتين تاخذه قبل النوم .. لكن اذا كان احد يتناول المحفزات هذي وقتها قبل النوم اما البروتين بالحزتين اللي اشرت لهم

الشق الاخر من سؤالك اخوي وطني المشي بروحه وان زدت عليه الهروله مايمتنك .. الهروله تعضلك لكن على المدى الطويل .. دام انك تلعب بالبيت زيد عليهم ضغط ومعده وركب عقله والعب عليها .. واستمر بتمارينك وان شاء الله توصل لجسم رياضي ومقسم

وبالنسبه للسباحه .. باختصار هي من اجمل الرياضات واكثرها نفعا للجسم والمفاصل

امر اخير : البروتين اخذه مع حليب وموز بالخلاط وحط معاه الفواكه اللي تبيها هذا بالنسبه لك اخوي وطني .. اما بالنسبه للاخوه اللي جسمهم فيه قابليه للسمنه او فيهم شحم ولو بنسبة 1% ياخذونه مع ماي او حليب خالي الدسم فقط

وسامحنا على القصور واي سؤال اخر انا حاضر :وردة:
 

بو عصام

عضو بلاتيني
معلومات جميلة ومفيدة للمدمن التائب..

أتمنى ان تشرح (او ان امكن تضع رابط) يوضح التمرين الشامل للحديد

تحياتي
 

مدمن

عضو مميز
معلومات جميلة ومفيدة للمدمن التائب..

أتمنى ان تشرح (او ان امكن تضع رابط) يوضح التمرين الشامل للحديد

تحياتي


هلا فيك اخوي بوعصام :وردة:

حاضر وتفضل

التمرين الشامل: وهو مثل ماذكرت فيما سبق انه عملية تحفيز وتأهيل العضلات للدخول في الجدول وتمارين كمال الاجسام

وتمرين الشامل مهم للجميع و اهم للاشخاص اللي اول مره يلعبون لعبة كمال الاجسام لتهيئة عضلاتهم للعبه ويمنع الاصابات فيما بعد

التمرين الشامل انك تلعب وتمرن وتهيئ جميع العضلات .. والعضلات تنقسم الى كبيره وصغيره .. بعجاله :

الكبيره: الصدر , البيطان "الظهر" , الاكتاف , الريول "الرجلين"

الصغيره: الباي , التراي , المثلثات , السواعد , المثلثات "تكون مابين الرقبه والاكتاف"

مثل ماذكرت ان لاعب كمال الاجسام مايزيد ايام تمرين الشامل عن 10 ايام متتاليه لانها راح تضغط على العضله وتشدها وتقلصها وهذا مو الغرض من لعبة كمال الاجسام .. تلعب تمرين الشامل 6 ايام متواصله وبعدها تريح يوم وتدخل جدول عادي عضله كبيره وصغيره بعد يوم الراحه .. وفي تمرين الشامل تلعب اوزان خفيفه يعني اقل من اللي تقدر عليه لانك راح تمرن العضلات نفسها 6 ايام متواصله .. وكذلك اول اسبوع جدول اوزان خفيفه مع الزياده بشكل خفيف ومعقول .. وسر لعبة كمال الاجسام مو الوزن الثقيل لانها ماهي رفع اثقال او قوه .. بل هي كمال اجسام يعني جسم جميل وشكل قوي ومتكامل

تمارين الشامل:

طبعا بعد التسخين على المشايه وتحريك الدم في الجسم وعمل "السترجات لجميع العضلات" وتحريك جميع المفاصل وخصوصا الاكتاف والرسغ اللي باليد "يكون تحت كف اليد ويفصل مابيد الكف والساعد" والكوع .. تروح للدنابل وتسخن الاكتاف الامامي والجانبي والباي والتراي بوزن 1 او 2 كيلو بالكثير

تدخل بعدها الصاله على طول وتلعب :

1- الصدر

ا- صدر عالي واذا كنت اول مره تلعب كمال اجسام يفضل انك تبتعد عن البار والدنابل وتلعب صدر عالي جهاز "مشين"
ب- صدر مستوي وهم تلعب جهاز اذا كنت اول مره تلعب كمال اجسام

ج- تلعب تجميع للصدر جهاز "يسمونه الفراشه" وترفع الكرسي لي فوق "طبعا بس ترفعه لي فوق بتمرين الشامل" على شان يلم الصدر وهم يشغل الصدر من تحت

2- البيطان "الظهر , الباك سايد"

ا- تلعب جهاز سحب امامي واسع وطبعا تقعد بالوضعيه يكون ظهرك سيده وفيه ميلان سانتي واحد لي ورى .. تنزل القضبه لي صدرك من فوق وترده ايدك كلها تمدها لي فوق

ب- جهاز سحب خلفي واسع .. طبعا هذا تنزله ورى الرقبه وتفتح ايدك حيل لي فوق والظهر يكون سيده

ج- سحب ارضي .. تييب القضبه الصيجه وتقعد على الجهاز تحط ريولك جدام ويكون فيها عكفه خفيفه صوب الركب .. تسحب وتييب القضبه تحت صدرك

3- الاكتاف :

ا- تلعب جهاز اكتاف امامي مسكه ضيجه على شكل رقم 11 مو واسعه .. الضيجة بس تشغل الكتف الامامي .. الواسعه تشغل الاكتاف الامامي والصدر العالي من فوق هذا للشامل .. بالجدول اعلمك شلون تلعب

ب- تلعب جهاز رفرفه اكتاف جانبي .. اذا النادي مالك مافيه جهاز رفرفه جانبي .. العب دانبل خفيف جدا 1 كيلو 2 كيلو رفرفه جانبي .. وايدك تكون على فخذك من جنب .. مو من جدام ولا من ورى وانت تفتح وتسكر وطبعا تفتح لي فوق حيل ولمه تنزل تشطف الفخذ ماتحوشه

ج- جهاز اكتاف خلفي وهذا باغلب النوادي يكون اهو نفسه جهاز تجميع الصدر بس تكون قعدتك معكوسه وترد القضبتين لي ورى اخر شي .. ويكون صدرك حاطه على الجهاز والكرسي راد مقعدك حيل لي ورى وانت تسحب رافع كوعك لي فوق

4- الباي:

تمرينين فقط:

ا- جهاز او بار واسع واذا كنت اول مره تلعب حديد يفضل الجهاز وزن خفيف وتلعب

ب- بار عوي "الاعوج" مسكه ضيجه .. او جهاز التركيز للباي تكون المسكه مالته ضيجه

5- التراي :

تمرينين فقط

ا- بار عوي "اعوج" تكون نايم على "البنش" وتمسك البار العوي ضيج .. تسكر كوعك وتنزل البار فوق الجبهه وترفع حيل تفرد ايدك .. او تلعب جهاز اللي تقعد وتحط ايدك لي ورى وترفع وترد الكيبل وتكون مسكر كوعك طبعا ومخليه سيده

ب- تروح للكيبل تحط القضبه السيده تنزل وتصعد لي تحت الصدر .. او تلعب نفس القضبه بس ايدك عكس وتنزل لي تحت وترفع .. او تلعب حبل وزن خفيف جدا .. تفتح لي تحت حيل وتسكر وطبعا الحبل يلعبونه تكرار والغرض منه قص التراي مو بمب او حجم

6- الريول "الارجل"

ا- تلعب مرجحه جهاز امامي وهذا يعطي للفخذ من جدام ومنطقة مافوق الركبه ويقويها

ب- تلعب جهاز مرجحه خلفي وهذا يشغل تحت المقعد والفخذ الخلفي

ج- تلعب بطات تمرينين .. تسوي ريلك رقم سبعه .. ومره رقم ثمانيه .. حق بره وداخل



ملاحظات :

1- اللاعب المبتدئ يفضل انه يبتعد عن البارات والدانبلز باسبوع الشامل .. اما اللي سبق له انه لعب .. البار والدانبلز احسن واقوى .. لكن يجب انه يعرف شلون يلعبه باتقان ووين ينزل البار وكذلك الدانبلز شلون يقضبه ويحافظ على توازنه

2- في تمرين الشامل لايلعب لعضلات مثل المثلثات والسواعد لكن ندخلها بعد ذلك بالجدول

3- جميع ماسبق هو للتمرين الشامل فقط اما الجدول فهو يختلف وتمارينه تختلف فهو يركز على عضلتين باليوم كبيره وصغيره ويلعب للكبيره مابين 5 و 6 تمارين وللصغيره مابين 3 و 4 "بالغالب للباي والتراي والبطات" اما المثلثات والسواعد تمرينين

4- السواعد والبطات تمارينهم تختلف بتاتا عن جميع تمارين الجسم فتمرينهم يعتمد على "الدق" وتمارين السوبر

اسف على الاطاله والتقصير والغياب في اليومين اللي مضوا

واذا في اي شي موفاهمه او ماهو واضح اسال وانا اجيب بمعلوماتي المتواضعه :وردة:
 

عرين الرياض

عضو فعال
يعطيك العافية أخوي المدمن

أنا هاليومين مو ضابطة معاي


الطول 157 والوزن 95 ....يعني بالعربي مدور والرقبة أختفت.. ممكن اصير كامل أجسام واتباهى فيه قدام الناس....تكفى لاتبخل علينا إذا عندك حل
 

مدمن

عضو مميز
يعطيك العافية أخوي المدمن

أنا هاليومين مو ضابطة معاي


الطول 157 والوزن 95 ....يعني بالعربي مدور والرقبة أختفت.. ممكن اصير كامل أجسام واتباهى فيه قدام الناس....تكفى لاتبخل علينا إذا عندك حل


الله يعافيك اخوي عرين الرياض :وردة:


الاجابه على سؤالك

ممكن تلعب كمال اجسام ويصير جسمك قوي وشكله حلو ومنسق لكن الامر اولا واخيرا واقف عليك .. وعلى فكره انت قصير القامه والقصير موضوعه اسهل وجسمه يبين فيه اسرع من الطويل

انت محتاج لانقاص مايقارب ال 25 كيلو مبدئيا

ونصيحتي لك هي : ان تشترك في احد النوادي القريبه منك .. وتدخل حصص السويدي يوميا وبعدها تمشي على المشايه 30 دقيقه وتركب القاري 30 دقيقه اخرى

وتعمل لك برنامج غذائي متكامل .. بإختصار: ابتعد عن العيش "الرز" والمعكرونيه "المكرونه" والخبز الابيض والسكر والملح والمشروبات الغازيه والدهون المشبعه

والبدائل موجوده لجميع ماذكر على سبيل المثال :

الافطار : خبز اسمر , جبن خالي الدسم , خس , خيار , طماط , زيتون "الخضروات بانواعها الخ" , كورن فلكس المصنوع من الحنطه الكامله "حبوب كامله" تاكله مع حليب خالي الدسم وتضع معه عسل طبيعي للتحليه , فول بدون دهن وتاكله بخبزتين سمر فقط "لاباس بزيت الزيتون" , النخي "حمص" , صدر الديك الرومي "غير المدخن" , الشوفان الاسمر "وتاكله مثل الكورن فلكس بالضبط مع حليب خالي الدسم" , بيض مفيوح "بالماء" تاكل البياض فقط الصفار يحتوي على دهون وكلسترول , الخ

مابين الافطار والغداء : تفاحه او اي نوع من الفواكه

الغداء: صدر دجاج , الاسماك بانواعها "وان كان الغداء سمك مع عيش اكله مع خبزتين سمره ولاتزيد الخبز" , ستيك مشوي , الجريش "اليريش" , الهريس "طبعا وص الاهل طبخهم بدون زبده او دهن عداني بالدهن النباتي الخالي من الكلسترول فقط" , المشويات بانواعها طبعا بدون العرايس , سلطة تونه صنع منزل , بطاط مفيوح "بالماء" بدون ملح فقط فلفل اسود هذي تاكلها مع الستيك او صدر الدجاج مع خضره مشويه كالجزر والقرع والملفوف الخ

مابين الغداء والعشاء: صحن كبير "غنجه" مليئه بالخضار وتقدر تاكل اللي تبي

العشاء: ديك رومي , تونه بالماء "بدون ملح او دهن" , اي نوع من الشوربه "يفضل العدس لانها غنيه بالبروتين والحديد وانت محتاجه كذلك شوربة الخضار" الخ

قبل النوم : تفاحه


ملاحظات: 1- اكثر من شرب الماء يوميا 2- اشرب شاي اخضر مابين الوجبات 3- عوض نقص الدهون في جسمك بالاستعانه في زيت الزيتون الخالص 4- عوض نقص السكريات بجسمك بالاستعانه بالسكر الطبيعي "الجلوكوز" ومن خلال العسل الطبيعي فقط "لا العسل المضاف اليه السكر" والتمر بدون دبس كذلك جميع انواع العصير الطبيعي "الفرش" 5- قبل ذهابك للنادي اكل 3 تمرات او 5

الحق على نفسك اخي الحبيب واعلم ان نظام غذائي بدون رياضه ماله فايده .. امش على الاثنين واشترك في نادي وحاول تتبع اللي نصحتك فيه لي رمضان .. وادري انك بتخورها برمضان .. بس عالاقل حافظ على الرياضه بالشهر الفضيل .. وبعد العيد ارجع للنظام الغذائي مع الرياضه وان شاء الله خلال شهرين تنزل 25 كيلو واكثر وتلعب بعدها كمال اجسام تشد فيه جسمك وتحصل على الجسم اللي تبيه واحسن ان شاء الله

وسامحنا على القصور واذا فيه شي موفاهمه انا حاضر
 
أعلى