بســم الله الـرحمــن الرحيــم
السلام عليكــم ورحمـة الله وبركاته ،،
يوميات شيخ النظر
كيف حالكم جميعآ إن شاء الله دائمــاً بخير ؟
أنا قررت (يعني مهم قراري) أني أخلي هالصفحه لي حلال زلال ومستعد
أدفع إيجار عليها بس تكون لي أفش فيها خلقي حسب الفرغه وأتمنى
من الجميع تقبلي فأنا لست بأديب ولا مثقف بل واحد تعب من الصمت
وحاب يفضفض في أي شئ وبلا مغزى ولاهدف...
أهم شئ أحكي قصدي أكتب وعشان أتعلم أماكن الحروف وأقوي نفسي
في قواعد اللغه والإملاء والرياضيات والأحياء (قاعد يرتب دروسه)
يعني خلو موضوعي أستراحه لكم تقضون فيها اوقات فراغكم بس ترى
((ممنوع أصطحاب الأطفال والمغاتير وجوال أبو كاميره))
(يووووووووووه وش دخل هالجمله هذا ماهو مكانها الصحيح)...
ماعلينا...
الفراغ زين خصوصآ للمشغول وهذي ميزه عند العاطلين ميت عليها
الموظفين وأنا على رأسهم ماأدري وش السر يمكن مو أكيد لأني أصحى
الصباح وأنا مشغل الرادو وأسمع لمرشد المرور اللي يعجبني سماعه
خاصة(( إذا قال تم التعامل معه بسرعه وعادت الحركه للوضع
الطبيعي)) ياالله آخذ قضمه من أطراف أصابيعي ورجلي على الفرامل
ودعاسة البنزين مشتاقه لها...
وساعه ونص لين أوصل دوامي ثم ألقى شئ عجيب أسمه أبو عبدالله اللي ولد
عمه الله يهديه فرضه مدير علينا مع أنه مسكين له سنه يحاول يقول لي
ياشيخ لاتتأخر ولكن بسبب التأتأه الله يشفيه تضيع منه الكلمات ومعقدته
لين عقد خلق الله معه، ناهيك عن أنه للأن محتار ليه صفحة كومبيوتره
الرئيسيه الهوتميل وجميع كومبيوترات العمل على قوقل ومنحرج
يسأل...
المشكله أن مقابلة أبوعبدالله يوميآ حاجه ممله والحمد لله أنه دايم يتأخر
لأني أكون أنخرطت في العمل وعادة يكون متحرج من المرور لإلقاء
التحيه الصباحيه لأنه متأخر...
تعريف بسيط بمن أكون...
أسمي شيخ النظر
وعمري حسب ماتقول مرة جدي أني أكبر من بنت عمي أم محمد اللي
ولدها كبري أو أكبر مني...
متزوج ومبسوط (عشانها جنبي الآن وتقراء) ولي أولاد وبنات يدرسون
الخميس والجمعه ومعطلين بقية أيام الأسبوع لأن الأولاد يقولون مدرس
القراءه مشرف على أحد المنتديات ولاهو فاضي ومدرس الرياضه
يشتغل حكم وعنده تفرغ من الرئاسه العامه لرعاية الشباب ومدرس
الرياضيات مسجون عليه أقساط متأخره ومدرس الدين يشتغل مؤذن في
حي بعيد...
والبنيات يقولون ابلة التدبير أنفجر في وجهها الغاز وأبلة العلوم والده
جابت بنيه سمتها على أسم المديره تشبه لبنت جيراننا...
وأنا أشتغل موظف من 15 سنه للآن ماأختلف روتين دوامي عن
سابقه...
على العموم أنا أخترت هذي الصفحه لتكون الأذن التي أبوح إليها حسب
وقت فراغي كما (أسلفت) حلوه أسلفت توي متعلمها...
فأرجو من الجميع تقبلي بصدر رحب ونرجو عدم قطع الماء والكهرب
عنا...
خذوا راحتكم طول بعرض في نقد ماتقرؤون بس الضرب ممنوع...
وتراني جايكم منحاااااااااااش من كثير من المنتديات اللي قصقصوا من ريشي
فهل أنتم كذلك علموني من البداية قبل لاأحبكم وآخذ عليكم!؟؟؟
يمكن بعضكم يعرفوني والأكيد أن الأكثرية لا.. بس اللي يعرفوني يمكن
يعرفون أني ماأحب أجامل أحد ولاأحب أحد يجاملني فلذلك أفضل أنكم
تقرون بدون ماتردون إذا كانت ردودكم لاتحمل أي معنى أو رسالة فقط
أقروا أو على الأقل خلوا غيركم يقراء بدون مجاملات ماتحمل معنى...
ماشاء الله علي وشلون صفيت هالحكي ماأدري المهم حياكم ربي أقولها
من قلبي تحملووووني...
مع الحب دائماً
و السلام عليكــم ورحمـة الله وبركاته ،،
