سلّم على قلبك يا سيد الخيانات
وقلّه امور القلب ماهي كما هي
من كثر ما جتني من اقراب طعنات
صار الوجع والجرح مصدر تباهي
غيرتني بعدك وضعت بمتاهات
واصبحت معروف بـ زبون المقاهي
والليل لا منه سمع بوح وآهات
يعرف يميّز جيّداً صوت آهي
والناس تعرف خطوتي في الممرات
و وجهي تعابير الهزيل الفكاهي
كلّيتي / سيارتي / والكتابات
سيجارتي / ذكراك / مع كاس شاهي
هي كلها تمضي بنفس الاتجاهات
تمضي على ذكرك وطعن اتجاهي
عمومآ اللي صار في ماضيٍ مات
وجروحي التأمت بفضله الهي
الربح في مثلك زياده خسارات
واليوم مع غيرك ترى القلب لاهي
صدفه نسيتك وانت لأرضي سماوات
وصدفة هويته يوم شد انتباهي
خلك على غدرك وظلمك وما فات
وخلني على نهري ومجرى مياهي
قد قلت لك يا طاعني باول ابيات
الحمدلله الاحوال ماهي كما هي
كذبت قول : الحب ماله نهايات
وامنت بإان: تحت السواهي دواهي