يا اوادم يا بشر ساعتين في الزحمة حتى نوصل لدواماتنا !!!

[ثوابت الامة]

الزحمة اصبحت لا تطاق

معقولة من الاحمدي لـ الشويخ ساعتين بالتمام و الكمال !!!

ما سبب هذه الزحمة لاني اراها عام بعد عام تزيد و بكثرة ؟

هل هي مفتعلة ام كثرة الوافدين هي السبب الرئيسي الاختناق المروري !!!

معقولة ما يوجد حلول لمعالجة هذه المشكلة على الرغم من سهولة حلها

صراحة انا قررت ان انقل من دوامي لهذا السبب

يعني لازم نصحى الفجر حتى نلحق على دواماتنا و المشكلة المسؤول ما يعبر و لا يقدر

تسجيل تأخير مباشرة و هو ما يدري ان ورانا قطة الاولاد للمدارس

الزحمة عام بعد عام تزيد و اعتقد ان الشوارع وصلت لـ اقصى حدودها الاستيعابية !!!




​

 

[كويتي وكالة]

اي والله
صرت اكره الطلعه من البيت والسبب هالزحمه

الصبح دوامات بالزحمه!
الظهاري دوامات دق هرنات !
تطلع العصر ( امبجر ) علشن تخلص شغلك بسرعه هم زحمه !
ترجع الساعه 11 او 12 او 1 بالليل هم زحمه !

شهر رمضان زحمه !
العيد زحمه !

صج صج لوعة جبد صايره الشوارع !!!!

 

[فهد الرشيدي]

عدل كلامك كل الطرق حتى السريعه توقف قبل وبعد الدوام

الحكومه نايمه وصفر بس يهايط بكلام ولا شفنا فعل

كونا - أكد وزير الاشغال العامة وزير الدولة لشؤون البلدية الدكتور فاضل صفر ان «العمل جار لايجاد حلول عملية للقضاء نهائيا على المشكلة المرورية في البلاد من خلال عدد من المشاريع قصيرة وبعيدة الامد التي تأخذ في الاعتبار الكثافات السكانية الكبيرة المتوقعة».
جاء ذلك في تصريح للوزير صفر عقب جولة قام بها يرافقه الوكيل المساعد لشؤون الطرق المهندس حسين المنصور ومدير مكتب الوزير حسين العتيبي أمس على مشروعي (عقد 184) و(عقد 185) الواقعين على الدائري الرابع والخامس والسادس والمشتملين على بعض التقاطعات التي تقوم بها وزارة الاشغال

وقال صفر ان المشروعين «يشملان ثمانية تقاطعات موزعة على عقدين الاول يشمل ثلاث تقاطعات يتم تطويرها بهدف تسهيل دخول وخروج المواطنين وتخفيفا للحركة المرورية والاختناقات التي كانت موجودة».
واشار الى ان العقد الثاني «يشمل خمس تقاطعات ويأتي بسبب الزيادة المتوقعة للكثافات السكانية في هذه المنطقة خصوصا لوجود مناطق جديدة تم انشاؤها مثل مدينتي سعد العبدالله وجابر الاحمد اضافة الى زيادة عدد السكان في منطقة الجهراء».
وأفاد بأن تلك المشاريع «من شأنها ان تخدم الضواحي الجديدة مثل ضاحية القيروان والزيادة المتوقعة للحركة المرورية في هذه الطرق لوجود منشآت حكومية وغير حكومية اضافة الى مدينة المطلاع المتوقع ان يقطنها عدد كبير من السكان في المرحلة المقبلة».
وذكر ان الوزارة «تعمل من الآن على فك الاختناقات المرورية في تلك المنطقة من خلال تطوير تلك التقاطعات».

http://www.alraimedia.com/Alrai/Article.aspx?id=302576&date=09102011

 

[العبدلي]

هذي والله من العنصريه الي بدولتك

معاهد وكليات وزرات وبنوك وشركات وفنادق ومستشفيات خاصه .... الخ

انا اطق مشوار يوميا لحولي لا تشوف حولي بالزحمه شي يفقع المراره

توصل الدوام تقول طالع من هوشه متبهذل

المفروض الدوله تبني باصحاب عقول نيره ولا تبنى بعنصرية مقيته

والله في مساحات في المنطقه العاشرة ليش ما ينقولون افرع بالوزرات فيها

 

[بو عزوز مساعد]

باختصار
شوارع الكويت ضيقه

المفروض بدل 3 سايدات خمس سايدات

وبدل 4 8 سايدات

ليش راصين الناس والبيوت القريبه حتى لو تتثمن تساهم في الحل
التوسعه طروريه

انت لما تمشي بالقاهره تلاقي جسور بين العماير

على يمين الجسر عماره وعلى يسارك عماره وحنا بيوت الناس بعيده ولا قادرين نتوسع

و

 

[كويتاوي]

شوارع اي بلد هي مثال مشابهه جداً ... لشرايين اي كائن حي


فإذا تعرضت هذه الشرايين إلى انسداد او ضيق في المجرى

فإن العملية المباشرة والحل السريع لإنقاذه

هي عملية ( قسطره ) الشرايين ... اي نفخ الشرايين

وشوارعنا تعرضت لعمليات قسطرة مستمرة

وللأسف إلى الآن ليس هناك حل

وليس الحل في الترقيع الحاصل في الشوارع كما نرى من اعمال التوسعة التي ليست هي الحل



أول هذه الحلول هي إلغاء جميع الإشارات الضوئية وعمل دوارات كبيرة مكانها وهناك طريقة دوارات سلسلة ومريحة ولا تكلف الدولة شيء مجرد رصيف وغار

التقاطعات جميعها تكون بدون اشارات

إذا وجدت وقت سأقوم بنقل صور من قوقل ايرث لبعض التقاطعات في الكويت والتي يحصل فيها اختناقات ويجب حلها بسرعة ...

واعتقد المسؤولين يعرفونها جيداً ويتجاهلونها عمداً

​

 

[Anu]

نطالب بفتح الاجواء و يخلون الناس الي تقدر تشتري هلوكبتر تشتري
مو حاله الواحد ما يقدر يروح يقضي مشاويره نفس الناس

لازم يفتحون الاجوااء الناس في ابو ظبي مرتاحين سمحوا لهم يستخدمون الهلوكبتر

ولازم يسوون مترو حق المقيمين

للامانه الواحد صار لازم يسافر كل اسبوع عشان يهدي اعصابه ويرح باله من الزحمه

 

[العبدلي]

والله لو تحط شوارع نظام عنكبوت ما راح تحل الازمه

وزع المباني على دولة الكويت او يختارون منطقه للشركات ومنطقه للوزرات ومنطقه للمستشفيات

هني راح تحل المشكله اما تضغطونا غصب داخل الديره يا اخي انا ما احب اروح داخل غصب يعني

 

[فـيـصـل الـحـربـي]

الرياض

الكويت + غالبية مدن الخليج

مدن لا تتوفر بها وسائل النقل العام ,, لا محطات باص ولا ميترو + الكل يعتمد في تنقله على سيارته الخاصه + رخص البنزين ومن هب ودب يستطيع شراء سياره ,, هذي احد اهم اسباب الأزدحامات الخانقه ,, ارتال من السيارات بشكل غير طبيعي مثل مافي الصورة ,, واللي يقول الطرق ضيقه بالعكس الطرق وسيعه مقارنه بالدول الأوروبية لكن مشكلتنا كثرة السيارات بشكل مبالغ فيه تفوق استيعاب الطرق

 

[بو عزوز مساعد]

التقاطعات جميعها تكون بدون اشارات ​

​

مالك امل يسون هالجسر بالديره الا يسحبون ميزانيتة من احتياطي الاجيال القادمه


سرقات الجسور والشوارع هي اكبر استنزاف للمال العام حاليا واذكر برنامج طلع يمكن على سكوب

82 مليون يمكن ماني متأكد تكلفة ميزانية توسعة طريق الجهراء


واتصل مهندس سعودي يقول قادر اسويه باقل من ربع المبلغ

وبقوا على مناقصاتهم للحبايب طبعا

الله المستعان

 

[مسك الورد]

أنا اليوم بروح من دوامي الى العيادة اوكي من الديرة الى عيادة قريبة يمنا ماكو مسافة المفروض وهالحجي الساعة 10 تدري لفيت الف لفة عشان اوصل بأقل وقت ممكن خذيت نص ساعة عشان اوصل شنو يعني الاشارة تشب عليك 3 او 4 مرات من الزحمة. الدوام موال ثاني أنا لو أداوم عالحدود اوصل قبل كرهت الدوام والحجي اللي اسمعه كل يوم من المسؤول بسبة التأخير شسوي مو شارع أبوي تكفون الساعة جم اطلع من البيت
زحمة طول اليوم واذا حادث بعد نصيحة لف فوق تحت ورد بينكم احسن. ألام بالظهر تشنج بالريل والرقبة والكتف وانت ريلك بين البريك والبانزين. نريدوا حلا :إستنكار: 

 

[التركى]

مافي حل الا بنقل الوزارات والهيئات الحكوميه الى الدائرى السابع وانشاء متروو وانفاق وتشييد قطارات كهربائيه سريعه وتنحل المشكله

 

[مجرد انسان]

المفروض يسووون الكويت طبقات 100 طبقة طبقة فوق طبقة سيارات ممنوع​

 

[أبووو ليلى العجمي]

الحلول كثيره لمشكلة المرور :
1 - منع الوافدين من قيادة السياره باستثناء السواق
2- منع السيارات موديل تحت ال2000
3 - ازالة جميع الاشارات المروريه وبناء دوارات مكانها
4 - توسيع الطرق وجعل بدال ال4 سايدات نخليهم 6 سايدات
5 - بناء فرع لكل وزارة في كل منطقة من مناطق الكويت وكل موظف يداوم في فرع منطقته
6 - الوافدين الذين يريدون الذهاب الى عملهم يركبون باصات المواصلات
7 - بناء مترو ارضي للوافدين
بهذه الطريقه اضمن لكم ان مشكلة الازدحام المروري في الكويت ستنتهي

 

[بدر الروقي]

اصبح الطرق لاتطاق اذا عندك مشوار اطلع قبله بساعتين لزوم الزحمة

 

[خطاب]

الدولة تفكر بالمقلوب


وين الاماكن اللي فيها زحمة وتكدس سكاني حطت فيها مشاريع

عبدالله المبارك فوق مو الزحمه اللي عندهم بمداخل جليب الشيوخ

قاعدين يبنون جامعات ومراكز ووو


الزحمة الحاليه ساعه ساعه ونص متاخرين

باجر مع هالامور ياااااااااابووووووي




وشارع الغزالي الصبح بعد 7 مالك اااااااامل مدخل كنددراي اهو اللي مسوي زحمه
ومدخل الري


الصبح زحمه
الظهر زحمة
العصر زحمه
الليل هم زحمه


ليش 80% من مساحه الكويت فاضيه وسعوووووو الشوارع

 

[ابن المطارد]

الازدحام مشكله.. ومتى ما وجدت المشكله اهتمام لدى السياسيين ولنقل اصحاب القرار فان الحلوول كثيرة ومتعددة.. ولكل قبل هذا وذاك لابد من ان تكون عقلية السياسي متفتحة ومتقدمه وقادرة على تبني الحلول وان كانت عصرية وخلاقه ومتطورة فالمشكله ليست بحل المشكله انما تكمن المشكله الاهم ليس بما سنفعله ولكن تكمن اننا لانجد لدينا من هو قادر على البدأ باتخاذ القرار لحل المشكله.​

 

[احبج يا كويت]

مابقي وافد بالديره ما عنده سياره ناقص الزبالين اللي يخمون الشوارع ياخذون منهم رشوه ويعطونهم اجازه شنو هالمسخره العتب علي وزاره الداخليه اشلون كل من هب ودب عطوه اجازه الديره انترست سيارات من كل الموديلات القديمه ومن سنه يدي واهما راكبينها والوزير ما عنده الا كل يوم وترك يطلع بتصريح وما نشوف شي علي ارض الواقع

 

[سحلبوط]

تدرون من وين طلعت الزحمة ؟؟؟

لا تقولون لي وافدين ما وافدين كل دول العالم الوافدين فيها يقدرون يسوقون (بريطانيا تسمح لك يالخليجي تسوق فيها و انت متعود على نظام "عكس" نظامهم)

المشكلة في شغلتين:
الأولى: "غباء" التخطيط وليس فقط غيابه بتكدس مقار الأعمال في أماكن محدودة و مخنوقة
ولا أحد يسوي مجمع للوزارات ؟؟؟ تخلف
و الجامعة اللي فيها فوق الـ20 الف طالب مخنوقة في مكان ضيق براس الشويخ و فوق زحمتها خذ زحمة منطقة الصباح الصحية و منطقة الجيوان العسكرية .. و فوق هذا ما تقدر توصلها إلا عن طريق اختراق الشويخ الصناعية .. اموت اعرف منو فكر بهالتخطيط؟؟

و الحين الشباب في طور إعداد جريمة أخرى بحق اهل الفوانية الي كانت تعتبر أقل مناطق الكويت ازدحاما، تخيلوا يبنون كليات التطبيقي و استاد جابر و مستشفى الفروانية .. على مخرج منطقة جليب الشيوخ .ز يا سلام الظاهر اللي خطط حلم حلم انه اذا سوا زحمة أكثر و أكثر .. يدش الجنة.

أما المشكلة الثانية و يمكن بعضكم يستسخفها فهي قرار وزير التربية القديم بإلغاء باصات المدارس .. اللي كان فرحان انه الغى الباصات و وفر على الدولة 8 ملايين دينار سنويا.

يا جماعة اذا دوامات المدارس تبدأ الساعة 7 و نص .. متى بتقط ولدك ؟؟؟ أكيد مو قبل الساعة 7 تخيل كل سيارات قطعتكم تكون عند المدرسة الساعة 7 إلى 7 و ربع، مع وجود الفهامية الواضحة عند بعض السواقين.

يعني الموظف اللي عنده عيال و ما عنده سايق ما يقدر يروح الدوام بدري عشان يسبق الزحمة لازم ينطر دوام المدارس ما يقدر يقط عياله و المدرسة فاضية .. و بالمثل اللي عنده سايق سايقه و سايق غيره راح يزحمون الشوارع كلها داخل المناطق و محد يقدر يطلع قبل الساعة 7 و نص.

و بالمثل في طلعة الدوامات الكل يبي يلحق على عياله الساعة 1 و نص حزة طلعة المدارس ..

تخيل ان في باص ياخذ عيالك بأمان من باب البيت و يرجعهم .. مو تطلع الساعة 6 و نص ؟؟

مثال: منطقة مثل سعد العبد الله يتفاخرون أنها تتسع لـ 5 الاف وحدة سكنية تقريبا ... راعي البيت عنده سيارة و البيت لهم سيارة يا زوجته ولا سايقه .. و فوق هذا كلهم تقريبا مأجرين معاريس جدد (شقتين فوق) يعني المجموع 4 سيارات على اقل تقدير يعني 20 الف سايرة على اقل تقدير ... و بما انه نطر كل هالمدة بعد 3 سنوات تقريبا ولده بيشتري سيارة عشان الجامعة يعني فوقهم 5 الاف ثانية خلال 3 سنوات ...تخيل سعد العبد الله لما تكمل الصبح الناس فيها شلون بيمشون و يروحون دواماتهم ؟؟

المفروض يرجعون باصات المدارس .. حتى السايق يصير ما له داعي و نتخلص من هالعمالة اللي ما وراها إلا ناط على خدامة جيرانكم و يصنعون خمر ...

 

[السالم]

ومنا الى عباقرة البلديه