سؤال وجواب مابعد التخرج

بنت شهيد بدون

عضو مميز
السلام عليكم ورحمه الله وبركاته

بدخل بالموضوع ع طوول..
انا كنت ادرس بأحد كليات التطبيقي والحمدلله تخرجت وشي طبيعي بعد التخرج اروح أدور على وظيفه لاني مو كويتيه ومايستقبلني ديوان الخدمة المدنية قلت اسأل باحثتنا مالت مكتب الشهيد لان رفيجتي اول ماتخرجت مكتب الشهيد سوالها كتاب أولوية في التوظيف وظوفوها بالمكان اللي اهيا تبيه فبما اني بنت شهيد قلت اكيد انا نفسها وراح يوظفوني بسرعه فستغربت من باحثتنا تقولي لا مانقدر نساعدج لازم كويتية ورحت راجعت عند مكتب الشهيد هم نفس الكلام مايصير نساعدج :confused: قالولي نقدر نساعدج بحاله وحده اذا في شركه ولا بنك وافقو يوظفونج احنا نساعدج ونكمل اجراءات التوظيف يعني ماسوو شي انا اللي اراجع وتعب وكل شي واذا وافقو يوظفوني اهما يقولون لي استريحي ويكملون الاجراءات يعني مامنهم فايده كلش بعدين اعتمدت على نفسي وبديت ادور وظيفه
فأكيد مالي الا الشركات والبنوك وماقعدت كل يوم اروح ماخليت بنك مامريت وحطيت c.v عندهم اللي يستقبلونها واللي يرفضون لان ماعندي اقامه :confused: ورحت جم شركه هم نفس الشي في يستقبلون وفي مايرضون عشان هالإقامه يعني حزات لما اروح اقدم يكون معاي من المتقدمين مصرين وهنود ومن مختلف الجناسي يرفضوني ويختارون الهندية عشان الاقامه ومره سمعت ان يستقبلون بوزارة الصحه ويوظفون على بند العقد والمكافات شي جذي المهم رحت ولله اكثر من شهر كل يوم يطلبون من عندي ورقه وطبعا اي مسؤول تمر علي اوراقي يعشمني ويقول اييي انتي بنت شهييد واحنا نستقبل عيال الشهداء ولهم الاولية بكل شي بعد شهر اتصلت عليهم عشان بشوف معاملتي وين وصلت ولا يرد علي واحد مصري وطبعا كل شوي يحولني من اداره لي اداره اخر شي يحط مشغول نرفزني حيل وثاني يوم انا عندهم سألت السكرتير وطبعا عرفوني من كثر مااا ارراجع عندهم قلت له معاملتي طولت وانتم قلتو بس يرجع الوكيل من الاجازه ويوقعها نعطيج خبر ولا يقولي لا ولله معاملتج انحفظت ..وانا ماعرف شنو يعني معامله انحفظت قلت يعني ماكو وظيفه قالي لا ماكو لان حاليا موقفين استقبال اللي يتوظفون ع بند المكافات والعقد قلت والحين شلون يقول خلاص روحي واحنا لي عطونا خبر نتصل فيج انا هني عرفت انه ماكو وظيفه بس يبي يفتك من كثر اسألتي :)
المهم هني غسلت ايدي من الوظيفه وطلعت من خاطري فقلت اكمل احسن من القعده وهم رفيجتي نفسي ابوها شهيد وكملت على حساب مكتب الشهيد بوحده من الجامعات الخاصه
رحت وقلت حق مكتب الشهيد بكمل دراستي قالو لاااا مايصير لانج موكويتيه واحنا عندنا اوامر بس نساعد الكويتين طبعا فلست لامن وظيفه ولا من دراسه .

المهم زبده الحجي الحين كلنا نعرف ان اسر الشهداء الكويتين الحمدلله ماعليهم قاصر وانا عن نفسي الحمدلله موناقصنا شي ومكتب الشهيد يمكن معذور لانه مثل مايقولون عندهم أوامر واهما يطبقون ابي الجهه اللي فوق مكتب الشهيد اللي تعطي هالاوامر
مانبي جنسية ولاشي ابي تخلونا نتوظف نكمل دراسه هالاشياء البسيطه شحقى مصعبين الامور وكل شي لاا ممنوع في أوامر !!!!!
ومنو هالشخص اللي يعطي هالاوامر على اسر الشهداء يعني شنو الهدف مايخليهم يقدمون حالهم حال غيرهم من هالاسر يعني معقوله لويوظفون عيال الشهداء راح تنعفس ميزانيه الدولة ؟؟ وراح يغارون من عندنا ليش وظفتوهم ونسبب حزازيات وتصير مشاكل بالمجتمع ولله استغرب ماكتبت هالموضوع الا من حرتي هالشهر كملت سنه من عالم البطااله نفس هالشهر انا استلمت شهاده التخرج وفرحانه أوووي حدي متفائله عبالي الووظيفه ناطرتني وبس لاتعليق :mad:
 

Q8bdooon

عضو فعال
الله يعينج ويرزقج بالوظيفة أو الجامعة الي تبينها

هذا مكتب شهيد مجرد اسم وصورة فقط

على العموم شوفي اختي يعني من تجربة الواسطة فوق الكل والقوانين أمور تعجيزية فقط واذا يت الواسطة تنشال كل العراقيل من امامج والله يوفقج أختي
 

السلطاني

عضو مخضرم
مساء الخير .. ..

يا بنت الشهيد تعلمي ( سعة الصدر ) و ( طولة البال ) و ( الصبر )


الحياة .. ..

أو بالأحرى .. .. الحياة في الكويت أصبحت أكثر قسوة من ذي قبل خصوصا لفئة أهلنا وأقاربنا ( البدون ) .. ..


أي شركة حكومية أو وزارة .. .. مقيدة بقوانين الخدمة المدنية التي تمنع توظيف البدون بدون قرارات خاصة .. ..


أنا أنصحك بتقديم طلبك في البنك التجاري .. .. ولدى إحدى الشيخات نسيت إسمها من بنات سمو الشيخ سالم العلي .. .. شيخة بنت شيخ وراعية فزعات .. ..


وإن شاء الله دم والدك الشهيد يشفع لك عند مكتب الشهيد .. ..
 

كاسك يا وطن

عضو بلاتيني

لا حول ولا قوة الا بالله ..
اللهم اجرها في مصيبتها .. وآخلف لها خيرا ً منها ..:وردة:
وبعدين ايي واحد كلب بن ستعش ..
وايقول ان البدون خاشين جناسيهم ..
ويخلي دم الشهيد .. ماي ..

ما اقول الا ..
طيح الله حظهم .. وحظ اللي ما يقول طيح الله حظهم ..!

واذا دعتك قدرتك على ظلم الناس ..
فـ تذكر قدرة الله .. عليك ..!



 

Ahmed Matar

عضو مميز
أختي قبل البحث عن الوظيـفه

يجب البحث عن الواسطـه

بعد التوفيق من الله

سوف تجدين الوظيـفه

أسـآل الله لج التوفيق


 
أعلى