سؤال وجواب سؤال عن اليوكن --بارك الله فيكم

[الرحال]

من حق المسلم على اخيه المسلم نصحه وإرشاده إذا احتاج للنصيحة والتوجيه


فهل تنصحون أخوكم بشراء يوكن اقصد اليوكن الجديد ؟ وهل هو يصرف أو ثقيل ---الخ

من جربه ؟
وهل هو أفضل من البرادو الجديد أو السيكويا ؟

من يعرف أو جرب ومن له راي فلينصحني مشكورا مأجورا لا حرمكم الباري الأجر والثواب

 

[meshal]

أذكر مره في تقرير لمجلة أوتو كار العالمية ومسوين تجارب بين الأربع مواتر وطالعين الخبراء على الجبال وكانت المنافسه بين :
التاهو ( واليوكن واحد نفس الشركة ) - السيكويا - الإكسبيديشن - الأرمادا وكان الترتيب كالتالي :
الأول : السيكويا .
الثاني : الأرمادا .
الثالث : الإكسبيديشن .
الرابع : التاهو .

التفوق للياباني مع ان اللي مسوين التجارب أمريكان وهذي خير شهادة
لكن عن نفسي ما أحب مركب الياباني الأمريكي أريح منه ولازم تجرب بشكل عملي أفضل وتشوف اللي يناسبك .
واخوي شوف الإكسبيديشن مره وحده ما إنت خسران شي ترى الموتر يتفوق على اليوكن في عدة أمور .

موفق .

 

[الرحال]

مشكور يااخ مشعل



للرفع للاهمية --بارك الله فيكم

 

[ابو عبدالرحمن العازمي]

اليوكن خفيف حييييل وشربه للبنزين عادي ومنظره حلو

 

[Chartist]

السلام عليكم

انا عندي اليوكن الي اتكلم عنه اخذته من الشركه اول نزل شكله الجديد نوع LT دبل
انصحك انك تاخذ النوع هذا اذا تبي قوه وعزم السياره جربتها في النفوذ ما اتغرز والنوع هذا فيه نظام ترفيهي شاشه خلفيه تنفعك اذا عندك اطفال وخاصتة عند السفر وفيه نظام سماعات Boss عجيب ومقاعد جلد ودبل قير وعلي فكره تري مايصرف بانزين اذا سرعتك اقل من ال 100 يمشي علي 4 سلندر واذا زت سرعتك يتحركون ال 8 سلندر

لا تاخذ نوع ال( دينالي ) مشاكله مستقبليه بالكهرباء ولا تاخذ ادني درجه لانه ماراح ينفعك لانك اذا بتقط افلوس قط علي شيئ يسوي
السياره تستاهل وسعرها زين مقاره ابحجمها وبقوتها و افضل من الياباني من قطع غيار وسيرفس

انتبه لا تاخذ من بره الكويت يعني امريكي اخذ من الوكاله افضل واضمن لك لان بعض الامريكي ايكون امرهم ( كهرباء او حراره) اخذ وانت واثق يوكن LT  لا يعلي عليه تبيه عائلي او حق شباب


شكرا

 

[الرحال]

ابو عبدالرحمن العازمي


Chartist

شكرا لكما على الإفادة وجزيتما خيرا

 

[ابوالعنود1]

اليوكن اذا فكرت تبيع الف من يشتريه بس الاكسبدشن يطيح بجبد راعيه

 

[الكونقرس]

اليوكن والتاهو يكفى تشوفهم بكل مكان وشارع
هذا دليل رضا الناس عن السياره

 

[بدر الروقي]

اليوكن خذيتة من الوكالة وكنت محتار اخذة ولا اخذ لاند 2009 مستعمل قلبتها براسي قلت اخذ اليوكن وكالة وابشرك اليوكن بيعته سهلة جدا ومرغوب وانحش عن الاكسبيدشن افضل جيب فورد اكسبلور وعيبة حجمة
نصيحة يوكن وكالة واتكل على الله

 

[meshal]

البعض مقلل من قيمة الإكسبيديشن ولو سأله أحد إستخدمته تعرف السيارة ... يبقول لك ها !!

الموترين عندنا في البيت اليوكن والإكسبديشن وأثنينهم من الوكالة بذكر بعض نقاط التفوق للأخير .


- الإكسبيديشن أمريكي أصلي واليوكن كندي ( راحة نفسيه )
- رحابه مو طبيعية واللي يقعد بالكرسي الثالث الأخير مستوى رجوله مثل مستوى السايق ما هي ناطه فوق مثل اليوكن ويا زينه اذا سدحت الكشن الثاني والثالث صار الموتر كله دبه مافي عوائق مثل اليوكن .
- النعومة على الشارع والمطبات ما فيها كلام الفورد .
- قلة أعطال الإكسبيديشن ... واليوكن كل شهر بالوكالة واخذ كهرباء وهو على الكفاله ها !!
ومن جذي تشوفون الفورد يعطون كفاله شامل ثلاث سنوات وخمس على الجير والمكينة واثقين بسيارتهم وكفالة اليوكن أقل وعلى فكره الفورد يتربع على عرش السيارات الأمريكية في قلة الأعطال وفي البريك بشهادات رسمية من المؤسسات الأمريكية
- تعالوا على صوت طقطقة الطبلوم باليوكن والله ما مشى الموتر 27 ألف وإسمع بالأنغام .. بينما الإكسبيديشن الطبلوم قطعه وحده وإنسى تسمع طقطقه بكل السيارة .

الموتر ناجح بمعنى الكلمة وخذا صيت حلو في الخليج خاصه بعد موديلات 2008 .



سالفة البيع هذا شي ثاني البي أم دبليو أحلى من المرسيدس بوايد لكن سبحان الله شوف السوق للمرسيدس وبكل الحال هذا سوق ورغبة الناس لكن مو الكل همه البيع ولا ينقص من هالموتر الف ولا الفين في إشكثر ناس ما تفكر بهالشي ولا تلتفت له

 

[الرحال]

مشكورين ياالربع كلن باسمه

والله يعيني على اتخا ذالقرار الصح