"روح سجل قيدك عند المختار"! .

"روح سجل قيدك عند المختار"! .
----------------------------

على غرار "يا عيني على غرار" دخلة سعد الفرج الثانية بلوحة المقهى الشعبي بمسرحية "حامي الديار".. دخل الرجل بس مو لابس بشت للديوانية وطلب من جبار قصدي بابو.. بابو فر الجاي والقهوة على الربع.. وبعد البسبسة من قبل الحضور قال اليوم جايب لكم سالفة ماقط خطرت على بالكم ان شاء الله تعجبكم.. انا جايكم من مختار المنطقة يقولون اليوم هو اخر يوم بالتسجيل للقيود الانتخابية للي ماسجلوا من قبل وخصوصا المتقاعدين من العسكريين والشباب اللي بلغوا سن الرشد .
قال الخبير: ايه هو الجديد بالموضوع.. ماكل سنة باقرأ الخبر بالجرنال واسمعه على القناة الاولى بعد العشى.. هههه لغاية ماحفظت المواعيد.. ياعم الحج الناس دي تفتح باب التسجيل من اول فبراير لغاية العشرين من شهر مارس يعني مافيش جديد!.
قال الشاب: ههههه اهب يالخبير صج انك خبير.. الله ياهي من رزالة مراجعة المختارية اول مايشوفون وجهك على طول يقولون روح صور البطاقة المدنية والجنسية وتعال.. وعقب ما تصور بمكان حذفة عصا تصف دور وقافي عقبها يسجلونك بعد مايوقعونك على الاستمارة ومن ثم يسلمونك الايصال !.. وقبل لاتعطيهم قفاك العريض تقولهم خلاص يقولون لك خلاص .
قال المعاق: والله حاله هم لليوم متمسكين بهالطريقة البدائية ورق وصور وكتابة وتوقيع الناس تعدت القمر لنبتون وربعنا للحين عايشين بعصر الورق وبل الاصبع والتخلف وين راح الكمبيوتر وعصر الانترنت هم وين عايشين والله حاله .
قال الشايب: مايبيلها سؤال يالبناخي عايشين بالكويت صلي على النبي, تكدس الاجهزة من غير سنع.. حنا وين نتطور والمسايل فكرها رجعي مع ان الامور اسهل من السهالة وماهي محتاجة شي !.. بس وشنقول حنا شعب نعشق البهدلة وروح وتعال وابوس خشمك وفوت علينا بكرة وعقبه وان كان مو عاجبك تعال بعد اسبوع.. واياني وياك والبرطمة تري اقلع مداك شهر!.
قال الرجل: لو ما عليك امر ياحجي شنهي السهالة اللي انت شايفها وهم ماهم شايفينها هالطواقم الحكومية? قال الشايب: يابوك انتم تذكرون قبل كم سنة.. يوم اقروا حق المرأة بالتصويت?
قال الشاب: ايييه كان قرار حضاري ونقلة نوعية لعالم المساواة بين الرجل واخته المرأة !.. وشفيه القرار عسى مو عاجبك?.
قال الشايب: عاجب واللا مو عاجب هذا مو موضوعنا.. موضوعنا هو تسجيل القيود الانتخابية عندكم خبر ان التسجيل تم من غير ما تراجع ولا حرمة اي مختارية بالكويت !.. كل اللي عملوه الحكومة هو تسجيلها من خلال سجلات البطاقة المدنية بلا مراجعات ولا دوخة رأس لانهم مشتهين تخليص الموضوع.. وبهذي الطريق تسهلت الامور هم لو تاركينها لنظامهم العقيم صفي دور جان مانخلص إلا بعد عشر سنين ونيف !.. شفتوا ان الامور طيبة بس فيه من يصعبها صج بلد (تخولف) ! .
قال الخبير: اللهم صلي على النبي صدق من قال الدهن بالعتاقي ربنا يفتح عليك ياحج !.. والله انت محسسني انك بتتعاطى حاجة ممكن "باور هورس" واللا "ديو" مثلا. قال الشايب: لا وانت الصاج حليب خلفات.. وعند ضحك اهل الديوانية قال المتمولس: عدل عدل ياقامووس اكسفورد الكويتي.. وعندها رفع على مسامعنا الشيخ زغلول اذان الظهر.
 
أعلى