سؤال وجواب ابي حل سريع حق ناس مغسوله وجيهم بـ مرقه !

عذب الاطباع

عضو فعال
السؤال واضح من عنوانه


عيال جارنا ناس قطَت وجيه :confused:

وإذا قعدوا بالدوانيه ما يطلعون إلا نص الليل

ودمهم ثقيل

ووجيهم مغسوله بـ قاز :إستنكار:

اذا قعدوا بالدوانيه وصخوها بالحب


كل ما طلعت من المسجد القاهم بوجهي يقولون لي نبي نقلط عندك :باكي:

المشكله ان عندي اختبارات ودايما ادرس بالدوانيه وكل شوي اسمع الباب يطقونه حيل


والله اليوم بغيت اتهور وأقولهم امسكوا الباب ,, لا تشوفكم عيني مره ثانيه


لكن الحشيمه حق ابوهم اللي ما يدري عنهم


ومابي احد يقولي كلم ابوهم لأن شخصيته ضعيفه



الحل يرحم والديكم :باكي:
 

Desert Eagle

عضو ذهبي
مستعد ابدل بيتنا ببيتكم

انا اعرف كل جيرانا ونعزمهم وندور الجيران الحيين مو الميت اللي ما يعرف جيرانه


يا زين جيرانكم في زمن الجيران الميتيين


وعسى الله لا يحرمني من جيرانا العجمان والمطران والكنادره والسبعان والعوضيه
 

عذب الاطباع

عضو فعال
^
^

يالعجمي

في فرق بين الجار الصالح اللي يزورجيرانه ويتطمن عليهم ويتكلم معاهم بالكلام الطيب السنع :وردة:

وفيه ناس ( يا ساتر يا رب :confused: ) كل يوم مطيحين عند بيتك من صلاة العشى لي نص الليل

وفوق هذا سوالفهم حش بالناس

وآخر شي الدوانيه معفوسه تقول كأنهم يلعبون قمار :(

هذولا ناس وجيهم مغسوله بـ ديتول

اذا طقوا الباب شوي ويكسرونه


والكلام هذا مو من الفتره هذي

الكلام هذا من زمان

يا جماعه كأن محكوم علي مؤبد :eek:

حتى المؤبد أقدر أطلع منه بـ عفو أميري :وردة:

أما هذولا لا عفو ولا غفران :باكي:
 

عــذوب

عضو بلاتيني
صحيح ان التقارب بين الجيران شي طيب لكن مو بجميع الاوقات

. ...لكن في اوقات امتحانات او ظروف معينه الواحد يستحي يقول لهم هوو او فارجو المفروض في تقدير واحساس ... اللي فهمته انهم حيل مايين بالمقابل انت لازم تمون عليهم وجحتهم عادي قول لهم عندي امتحانات ولا احد فيكم يزعجني وقول هالكلام لهم وحق واحد من اخوانك معاهم اذا تقبلو الموضوع كانا بها اذا زعلو معناته وقحين ومو كفو حشيمه وخلهم يزعلون ..ساعتها يطبق عليهم المثل . ( فلان يشره ...ولا يتشره)) ...
 

Desert Eagle

عضو ذهبي
والله يا طويل العمر صحيح بعض الجيران ودك تذبحه وتلقى وجهه صبه

لكن والله بعضهم ونعم ودك انه ساكن معاك بنفس البيت

اقولك سالفه حنا بيتنا يمه بيت شقق واقباله بيت شقق صايره زحمه بالشارع وحنا عندنا ٤ سيارات زايد عن حاجتنا مصفطين قدام الديوانيه

خليناهم يصفطون قلنا يمكن محتاجينها ومنحشرين صارلهم قريب السنه هم يصفطون فيها

لكن بعض الجيران الله يهديه تلقاه مسكر عليك او صافط مكانك انت يارااعي البيت لا وتلقاه صافط مايل ماخذ موقفين كل هذا بمواقفكم


صح كلامك في جيران على العين والراس وفي جيران استغفر الله تحس ربك مسلطهم عليك
 

شجون الكويت

عضو مخضرم
الحل انك تدرس بدارك وخل غيرك يعتذر عنك لعياك جيرانكم ويقوله انك تدرس او غير متواجد في البيت .. وبعدها بحسون انك عندك ظروف وبعدها لي خلصت امتحاناتك اعزمهم وخلهم يقلطون عندك بين فترة وفترة ولا تنسا تعتذر لهم انك كنت مشغول حيل بالإمتحانات وشكرا
 

ليله ويوم

عضو بلاتيني
يا زين جيرانكم في زمن الجيران الميتيين



وعسى الله لا يحرمني من جيرانا العجمان والمطران والكنادره والسبعان والعوضيه




الرجال يقولك يكسرون عليه الباب بالطق




ويقعدون بدوانيته لآنصاف الليل




تقول يازين جيرانكم ؟؟؟!!!!





انا اقول بس الله لا يحرمني من جيرانا العنوز والشمر والهواجر والعتبان والعوازم والدواسر



:cool:
 

Meridian

عضو ذهبي
:)

حدد لهم يوم واحد بالإسبوع للديوانية ويكون رسمي..
يعني يكون فيه ضيوف غيرهم موجودين
راح تلقى بالتدريج يبعدون لأن المجالس الرسمية الإسبوعية ما فيها أكل حب ومغثة
 

عذب الاطباع

عضو فعال
الحل انك تغير مكان دراستك روح اقرب ستار بكس او اي مقهى اقعد ادرس وخلهم يطقون الباب لين يخيب ثناهم​


اخوي Ok

هل هذا هو الحل إني أطلع بره البيت ادرس على شان اتفاداهم !

لهدرجه صرت غريب في بيتي ! !

مو معقوله اخليهم يطقون الباب وما اطلع لهم
 

النوف

عضو مخضرم
حرام عليك،،..

اذا يعفسونها الله يسلم الخدامة تنظف وراكم،،،..

واذا عالإمتحانات يا اخي ذاكر بغرفتك وهم راح يعذرونك،،،..

اكسب اجر من وراهم،،،..​
 

عزيز وغالي

عضو بلاتيني
الامر ما فيه مجاملات
شوف احد يعرفك ويعرفهم
وبلغه يقول لهم ترا جاركم متضايق من كثرة جياتكم بسنع وغير سنع
وترا الدوانيه لها احترامها ونظافتها وانتوا توصخون الدوانيه بالحب

بعدها راح تلاقيهم سلام وسلام من هناك لهناك
هذول ما يشرفون
لو جاك ضيف اجنبي وشاف الي يسوونه راح يقول هذولا ربعه !!!!
 

Mr.Max

عضو مميز
موضوعك غريب !

روح سوق الجمعه اذا ما حصلت نمر صغير شوف لك كلب اطرم متوحش لا يزعج جيرانك اربطه عند الباب ":.

الله يعينك وتكمل دراستك على خير وتوفّق فيها لا يشغلونك .
 
أعلى