من باب شر البلية ما يضحك والشكوى لله ولنلطف الأجواء قليلا
أقول وبلاتعميم طبعا :
يتكون المسلسل الكويتي ممايلي :
****ممثلة طول المسلسل حاطة مكياج بالكيلو قاعدة وقايمة وهي حاطته ليل ونهار--- أجل فيه وحدة تقوم من نومها حاطة مكياج كامل !!
***ممثل طول المسلسل من الحلقة الأولى للأخيرة كله يهاوش ويصايح على كل شيء ولأجل كل شيء وعلى أمه وأبوه وعلى الخدامة وعلى ربعه
---الخ يعني ما يخلص المسلسل إلا يبيله عملية لوز!!***الممثلين بالمسلسل كله يستعملون النقال زين أنتم في البيت وعندكم الأرضي ليش تتكلمون بالنقال ؟!!
***ممثلة يمكن صكت الخمسين
وشادة بشرتها ومتفخة خدودها ومطولة رموشها وتمثل دور الحبيبة التي يتصارع عليها أبطال المسلسل والأبو يحبها وولده يحبها ومديرها في العمل يحبها واللي شافته عند الجمعية عشقها واللي دعمها يعجب فيها ويغازلها:وردة:!!!!!***ممثلة كله تبجي ليل ونهار:باكي: وحياتها محطمة ومأساوية ومحد يرحمها وكله يكفخونها ويصكونها طراقات ويشدون شعرها من أول حلقة لآخر حلقة وكل لقطة لها ماسكة منديل وتقول اهى اهي اهي :باكي:وتمسح خشمها موعينها !! شوي شوي علشان مايخرب المكياج !
***شاب خبل ومايع ويفشل ودايما مع خواته وما يعرف يقول كلمتين على بعض
وما ينادونه إلا يا حمود وإلايا فهود وإلا ياعبود وهو يبي يدش الثلاثين وكله يبي يطلع مع ربعه !***كل مشاكل المسلسل والممثلين تنحل بالحلقة الأخيرة أم نص ساعة فالمجرم يموت والغائب يعود والأحباب يتزوجون والشرطة يكشفون اللغزاللي طول الحلقات ما اكتشفوه لكن سبحان الله اكتشفوه في الحلقة الأخيرة –سبحان الله !
ترى كل هذا في الحلقة الأخيرة أم نص ساعة!!
مسرح كويتي :
****يا الطنطل يالخال يالزرافة يالبطة يالجيكر!!!
بسم الله الرحمن الرحيم ما امدانا ----وين داش هووشة !! لا عفوا مسرحية هادفة!!****أغاني وموالات عراقية ودق مرواس !
****ايحاءات جنسية
وبعدها نصائح دينية ووطنية وكلنا نحب الكويت !!!****المسرحية ساعتين لكن قابلة للتمديد مع السوالف والخروج عن النص تصير 4 ساعات !
الديكور :
****البيت فخم جداجدا ثلاث أرباع الكويتيين مايسكنونه والله يمكن مافي غيرهالبيت يصورون فيه خوش واقعية!! مافي عايلة فقيرة أومتوسطة في الكويت --- تعالوا صوروا عندنا في الجهراء وإلا الفردوس أو العارضية – تبون تشوفون جو غيرغير
****الدرج طويل طويل من 40 درجة ولاف ووسط الصالة والدور الثاني يكشف الأول ومافي خصوصية
السايق كشخة ولابس كرفتة
واسمه بعد راجووحتى هو بعد يزف مومثل سواويقنا هذولا نعرفهم من أشكالهم والخدامة كشخة ونظيفة ولازم اسمها في المسلسل ميري يعني كيري ما يصير وإلا يخرب المسلسل و تلبس شسمه هذا لبس المطبخ اللي ما عمري شفت خداماتنا طول عمري يلبسنه وتكلم انجليزي وهي بعد مثلهم تعصب وتلبس قصير هذي لو بمناطقنا كان----ودايما بيدها مخمة يعني تشتغل خدامة !!