سؤال وجواب حــاب اتعلم طبخ المكبوس

الديفي

عضو بلاتيني
السلام عليكم

طباختنا سافرت ولم تعد رغم اننا مو مقصرين معاها

قررت اتعلم طبخ وشريت جــدر جديد

شاهدت فيديوهات باليوتيوب عن اعداد (المجبوس الكويتي) اللي خارج الكويت يسمونها (الكبسه) وكانت صعبه حيل (المقادير كثيره.. خيط الدياية واربط ريوليا) :(

يريت لو طريقة اعداد المجبوس لكن بمقادير غـيــر مـبـالـغ فيها وبعيداً عن التعقيد

انا دوامي بالغالب بعد الـ 2 الظهر والمشكله الصبح المره بالدوام :(

ملينا من اكل المطاعم اريد اطبخ مجبوس وكــشـــري

16065-1.jpg


 

مربي أجيال

عضو ذهبي
اخوي اسهل شي تسوي الكبسة بقدر الضغط ومايحتاج تربط لا يدين ولا رجلين وبعطيك الوصفة على السريع
١- تجيبلك دجاجة وتنقعها بماي حار بعدين تقطع االدجاجه
٢-بصل طماط حبة ماجي ليمون اسود حبة ولا حبتين
٣- تحط زيت ولاتكثر بقدر الضغط تحمس البصل والطماط طبعا مع الدجاج والليمون الاسود والماجي كله يكون بالقدر وتحط البهارات فوق الدجاج وتقلبه ولاتنسى الملح وتقلبه تقريبا خمس دقايق لين تحس البصل صار اشقر شوي
٤- تحط الماي فوق الدجاج وتسكر القدر لمدة عشرين دقيقه تقريبا
٥- تفتح القدر وتحط العيش طبعا العيش تكون ناقعه
٦-نخلي عيش لمدة ربع ساعة تقريبا اول عشر دقايق ترفع على النار بعدها نقصر النار وبعدها تفتح القدر وتحصل كبسة يحبها قلبك
 

الديفي

عضو بلاتيني

مشكورة يا ام فواز !

يا مربي أجيال مشكور على هالرد المفيد وقصدك احــمـــس الدياي والطماط والبصل وشوي ملح بنفس جدر الضغط وبعد الحماس اضع الماي واحط غطا الضغط لأضغط المكونات لعشرين دقيقه وبعدين احط العيش المغسول والمنقع .. صح وارجع احط الغطا واضغطه؟!

جدر الضغط اول مره شفته كان بجزيرة قاروه احد الاشخاص معانا نـزل الجزيرة وحط العيش وقطع اللحم بيطبخ مجبوس لحم
وبعد شوي صرخ ( طــاح الــغــدا !! ) انا مو مصدق مسرع؟ .. طعم الطبخه لذيذ احلى من الطبخ العادي وبسرعه نضج الاكل واللحم !!

تنصحوني اجرب الجدر المضغوط؟ شنو احسن ماركة جدر مضغوط وامن
لكن يحذروني من الجدر المضفوط يقولون فيه خدامه ماتت انفجر بوجها الجدر !​
 

ابوصالح

عضو ذهبي
من صجكم ماتعرفون ياشباب هههههه

شباب اخر زمن ههههه تراني اتغشمر معاكم

اخوكم ابوصالح طباخ درجة اولى ترى

ياحلوكم نفس هوايتي ههههه

ياجماعة الخير

تغسلون الدجاج عدل او اللحم وغليه لمدة دقيقتين بالماء الحار علشان تروح الزفرة

تحطون بصل بالجدر مع دهن يعني بصله ونص مع استكانه دهن وتحمسونه ليمن يصير اشقر

تحطون ثوم مهروس يعني نص فص وتحمسونها دقيقة

تحطون طماطتين مقصوصات صغار وتحمسونها دقيقه

تحط دجاجة واحده او كيلو لحم وتحمسها وياهم وتحطون شوية اشبنت وكزبرة خضره وتحطون بعدها البهارات يعني كمون وكزبرة ودارسين وبهار وابو السفينه وشوية تمر هندي منقع بالماي ومعاهم بعد مكعب واحد من مرق الدجاج ماجي وتحمسها 3 دقايق وتغطي الجدر علشان يتشرب البهار وتروح الزفره

بعدها تحط ماي حار 3 اكواب وتخليه يغلي لمدة ساعة على نار عاديه

بعدين تغسل عيشك وتحط ملعقة ملح وتحطه بالجدر واسكب عيشك عليها . 3 اكواب عيش

اما مقدار الماء فهنا الفن بالطبخ علشان مايصير العيش حب او ملبوج

يفضل ان يكون الماء فوق العيش لمسافة 3 سنتم ( هنا يعتمد على نوعية العيش والجدر وشعلة الجولة ) من المهم ترك مياه من نفس المرقه اللي انت مسويها احتياط حتى تزيدها اذا نقص الماي وبعدها تتركه حتى يغلي الماء وعند الغليان تقلل من شعلة الجولة حتى يتناشف العيش وبعدها تقلل شعلة الجولة لاقل شيء وبعدها تقلب القشرة العليا من العيش بالجدر وتضعه اسفل منه لانه حب وبعد 7 دقايق انجب غداك وبالهناء

اما السمج نفس الطريقة بس دير بالك

السمجه لاتحتاج الى طبخ كثير فقط 5 دقايق طبخ للهامور اما باقي السمج فقط تحمسها بالحمسه الاوليه وبعد ماتحط الماي خله يغلي لمدة دقيقة ثم شيل السمج وحطه بالفرن او حطه بالمغلاه واغليه بالزيت

دير بالك ترى السمج حساس ويخرب عليك الطبخه اذا ماصار طري

السمجه لازم تكون طريه ومسفطه عدل يعني قشرة جلدها الخارجي تكون خاليه من القشور ... الا السمجه اللي تبي تشويها فما يحتاج الى ان تسفطها

ويجب ان تنقعها بالليمون والملح لمدة 40 دقيقة ولاتخليها الا داخل الثلاجه

وهناك خلطات سريه لبوصالح لا استطيع البوح بها لانها من اسرار المهنه هههههههه
 

مربي أجيال

عضو ذهبي

مشكورة يا ام فواز !

يا مربي أجيال مشكور على هالرد المفيد وقصدك احــمـــس الدياي والطماط والبصل وشوي ملح بنفس جدر الضغط وبعد الحماس اضع الماي واحط غطا الضغط لأضغط المكونات لعشرين دقيقه وبعدين احط العيش المغسول والمنقع .. صح وارجع احط الغطا واضغطه؟!

جدر الضغط اول مره شفته كان بجزيرة قاروه احد الاشخاص معانا نـزل الجزيرة وحط العيش وقطع اللحم بيطبخ مجبوس لحم
وبعد شوي صرخ ( طــاح الــغــدا !! ) انا مو مصدق مسرع؟ .. طعم الطبخه لذيذ احلى من الطبخ العادي وبسرعه نضج الاكل واللحم !!

تنصحوني اجرب الجدر المضغوط؟ شنو احسن ماركة جدر مضغوط وامن
لكن يحذروني من الجدر المضفوط يقولون فيه خدامه ماتت انفجر بوجها الجدر !​

ممتاز هذا انت عرفت الطبخة بالفعل نفس ماقلت وقد الضغط عندك ماركة السيف ممتاز
 
الديفي وين حرمتك ما تطبخ لك ليه ؟
والا بيدها العصمه
بالله يالديفي للحين ما تعرف تلبس الغتره
ههههههههههههههههههههههههه
والا للحين تبي تعرف كم سعر الخروف
هههههههههههههههههه
راح زمن الرجوله
 

الديفي

عضو بلاتيني
مشكور يا ابوصالح على هالرد التفصيلي انا قاعد اقرا واسجل ملاحظات بس شكلك ما تستعمل جـدر ضغط
انا ابي جدر ضغط إختصاراً للوقت .. بس سالفة أن الدياية زفــره .. صدمتني صراحه :(
في مصري يقول لي (احنا ما ناكولش فراخ مجمده مثلكم يالكوايته احنا نشتري الفراخ حي من محل الدواجن ويذبحه الراجل قدامنا وناخذه فرش)

اخ مساوم يا حبيبي .. مرتي ترجع للبيت حوالي الساعه 3:40 بعد العصر ودوامها متعب (شغل مختبرات وفحص)
وخدامتنا سافرت وما ارجعت لنا .. كيفها .. وانا دوامي يبدأ بالـ 2 الظهر يعني الصبح انا فاضي .. فليش ما اطبخ بدل ما اكل من ايــد الخدامه مثل حالك ويمكن تحط لك بلاوي وسحر وانتا تـلــط تـاكل يالمسكين! :D

هذا حوار بالواتس اب دار بيني وبين واحد خبير بالطبخ بالمضغوط استفدت منه معلومات جديده



Image1.png

Image2.png

Image3.png
 
هلا بالديفي المحترم

من خلال تغربي عن الكويت لمدة سبع سنوات اثناء الدراسة وغربة صرت اكبر شيف
وبفضل الله صرت اجيد جميع الطبخات ومرات اذا صارت اعزومه كبيرة اطبخ ثلاث ذبائح او اربع مافيه مشكلة
وللعلم الطبخ يبي نفس بالطبخة
ومعلومة تري الرجال من هم يجدون الطبخ افضل بكثير من هن يجيدن الطبخ من النساء
وانا أنصحك في جدر الضغط فهو شغل سريع سريع ومئة بالمئة
وكبسة الدجاج تأخذ ربع ساعة فقط بالضغط
وكسبة اللحم بحدود خمسة وعشرين الي ثلاثين دقيقة بجدر الضغط
والكبسة
بالبداية
أتطلع الدجاج وتقطعه علي حسب الطلب انصاص او أرباع
ونقص بصل وثوم صغار
وتحط زيت واتخليه علي. النار وتحط البصل والثوم واتخليه ايشوقر علي الخفيف
وتحط اللحم او الدجاج علي حسب اشهوتك واتخليه لمدة خمس دقائق واتقلبه وبعدها أتحط ماء حار واتحط ابهاراتك سواء كان لحم اتحط بهارات لحم واذا دجاج اتحط بهارات دجاج وبعدها اتخلية لمده عشر دقائق اذا كان دجاج واذا كان لحم لمدة ربع الي ثلث ساعة
طبعا لا تنسي الملح والحركات اللي تبيه من لومي وماجي ومسمار وفلفل اسود وهيل والحركات
وبعدها علي حسب اذا تبي كبسة اتحط عيشك واذا تبي تغلي الدجاج بزيت هم انت مخير
والعيش لمدة عشر دقايق بنار عالية وبعدها خمس الي سبع دقائق واطفي جدرك أنصحك بعيش ( انديا قيت) بوابه الهند خوش عيش


وبالعافية يالديفي
 

ابوصالح

عضو ذهبي
مشكور يا ابوصالح على هالرد التفصيلي انا قاعد اقرا واسجل ملاحظات بس شكلك ما تستعمل جـدر ضغط
انا ابي جدر ضغط إختصاراً للوقت .. بس سالفة أن الدياية زفــره .. صدمتني صراحه




هلا وغلا فيك

اخوي جدر الضغط هوايتي الخاصه ههههه

عندي بالبيت 3 جدور ضغط باحجام مختلفه وانواع مختلفه . وهذه خاصة لي وليس للخدم وحق طلعات البر والطبخات المستعجله فقط

السب النوع الفرنسي غالي على الطل

احسن نوع وافضلها قوة ومتانه هو الهندي السميك وله كبسات بالفر يعني تفر الغطاء ليمن يسكر

ترى السيف زين ومافيه شيء ولكن لاتترسه عيش

الفرق بين جدر الضغط انه يحتفظ بالماء مثل ماي العيش ومايتناشف العيش

يعني لازم تنقص من الماي وتفتح لصمام الامان حتى يتناشف العيش

اما الاستواء بالنسبه للدجاج فهو 10 دقايق تقريبا

اما اللحم العرد فهو 20 دقيقه

اللحم العادي 15 دقيقة

لحم الطلي الهرفي 12 دقيقة

بس دير بالك لاتفتح غطاء جدر الضغط بسرعه .... لازم تنفس عليه حتى ينتهي الصفير ثم تفتح الغطاء

جدر الضغط ممتاز للسرعه فقط وكذلك للحوم العرده مثل لحم الحاشي

اما الزفره فمن الممكن التغلب عليها بالغسيل الجيد وبعدين تفوح الدجاجه فوحه لمدة دقيقتين مع بصل وكمون ودارسين وبعدين تخلص من هذه المياه وبعدها تنقعها بالليمون والملح .. بعدها تختفي ريحة الزفرة نهائيا
 

ابوصالح

عضو ذهبي
كلام الشيف ابوعزوز العصفور كذلك ميه بالميه

ياعيني عليك يابوعزوز ههههه

اثاري ربعي الطبابيخ مثلي متوفرين بالمنتدى هههههه

عاشوا الطباخين المحترفين عاشوا عاشوا يا

ههههههه
 

الديفي

عضو بلاتيني
ابو صالح ويا اخ ابو عزوز العصفور

مشكورين على الرد القيم لكن خلونا بالمجبوس
انتو لما تطبخون بالمضغوط الديايه لربع ساعه إنــتـــو تطلعونها بعدين من الجدر المضغوط وتحطون عليها بهارات دياي وبعدين تدخلونها بالفرن ولا المضغوط يكفي يخلي الديايه مستويه ومن غير ما نحتاج للفرن؟
اذا تدخلونها الفرن لكم دقيقه هذي النقطه مهمه ما يبتو طاري الفرن؟
معقوله البخار بس يخلي الديايه كأنها مشويه من برا؟

بخصوص جدر السيف قريت عنه بمنتدى مكشات يحذرون منه طلع صيني مو سعودي وكثير الانفجار
http://www.mekshat.com/vb/showthread.php?t=446833


فاصل ونواصل

http://www.youtube.com/watch?v=kSrQgg0DNlQ

 

ابوصالح

عضو ذهبي
ابو صالح ويا اخ ابو عزوز العصفور

مشكورين على الرد القيم لكن خلونا بالمجبوس
انتو لما تطبخون بالمضغوط الديايه لربع ساعه إنــتـــو تطلعونها بعدين من الجدر المضغوط وتحطون عليها بهارات دياي وبعدين تدخلونها بالفرن ولا المضغوط يكفي يخلي الديايه مستويه ومن غير ما نحتاج للفرن؟
اذا تدخلونها الفرن لكم دقيقه هذي النقطه مهمه ما يبتو طاري الفرن؟
معقوله البخار بس يخلي الديايه كأنها مشويه من برا؟

اخوي انت سألت عن المجبوس وليس عن الشوي او التحميش بالفرن او القلي او البرياني

المجبوس يعني تسكب العيش بالماء المغلي والماي هذا فيه الدجاج موجود

من الممكن تشيل الدجاج قبل لاتجبس عليه العيش وتحطه بالفرن ليمن يتحمش ويستوي ومرق الدجاج تسوي فيه العيش

اذا انت تبي شغلات الفرن فمن الممكن ان تشويها بالفرن بدون غليها بالماء وهذا يحتاج الى 20 دقيقة لكل جهه من الدجاجه ويجب ان تنقعها بالماء والليمون والملح وبعدين تحطها بالفرن

او انك تغليها بالماي لمدة ساعه وبعدين تحمشها تحميش بالفرن يعني تخليها ليمن تصير فيها احمرار
 

ابوصالح

عضو ذهبي
وانا دوامي يبدأ بالـ 2 الظهر يعني الصبح انا فاضي .. فليش ما اطبخ بدل ما اكل من ايــد الخدامه مثل حالك ويمكن تحط لك بلاوي وسحر وانتا تـلــط تـاكل يالمسكين! :D




هذا الكلام المضبوط . بعض الناس الله يهديهم مايدرون شنو اكو بالمطبخ او اشلون الخدامه تسوي الغداء او مايشرفون على الطباخ

والله مانلوم الشباب اللي زوجاتهم موظفات

انا شخصيا دايم افتش المطبخ واشوف الخدامات شنو يسوون بالضبط واراقبهم

عسى الله يصلح الحال يالديفي

والله انا مؤيدك ميه بالميه
 
أعلى