سؤال وجواب هل أبعاد ( تسفير ) سايق البيت حرام .............؟؟

[AlBadel]

أخواني هل تسفير سايق البيت ( حرام ) أو ( مكروه ) والسبب كل شوي يبي زيادة بالمعاش
وأخرته يبي 150 دينار أو يروح لواحد ثاني يعطيه هالمعاش
ماأبي أظلمه ياجماعه وأبي الراي أسفره أو أعطيه تنازل وخصوصا جنسيته بنغالي وصعب يرجع الديرة
صارله عندي سنين وراتبه 90 دينار واكله بروحه و علي كيفه وأعطيه من التموين بالنص وحتي السجاير علي
واللي ذابجني دايم يقول ( بابا هذا نفر واجد زين مال مرور ) يقصد (عبد الفتاح )
تحياتي

 

[تشالنجر]

لابتعده بس اشرط عليه اذا يبي يروح خل كفيله الجديد يدفعلك مبلغ

 

[صالح]

حرام حلال الله اعلم يالبديل
بس انت لو تبي تحسب راتبه صحيح
راح تلقاه اكثر من ٩٠ دينار
٩٠ منك واحسب اكله ولبسه وسكنه
راح يطلع اكثر من ١٥٠ دينار
عموما
لاتجبر شخص على شي مايبيه
قوله اذا تبي تنازل الله معاك بس اخذ فلوس للتنازل من الكفيل الجديد
لان انت لو تبي تحط سايق جديد راح تتعب عليه
راح تدفع فلوس غير التعليم من جديد

 

[أم فواز]

أؤيد كلام الاخ @صالح

انت اذا سفرّته راح تقطع رزقه .. أنصحك تتمسك فيه اذا اهو نافعك .. والمعيشة ترى غاليه اخوي البديل ومثلك عارف ٩٠ دينار ما تكفي ..
الخدم والسواق وصلت معاشاتهم الى اكثر من ١٠٠ دينار .
واذا طاب خاطرك منه تنازل عنه وخله يشوف رزقه في مكان ثاني .. ماتدري يمكن ما يرتاح للكفيل اليديد ويرجع لك ..

 

[ســـــاحـــــر]

مو حرام لأن بينك وبينه عقد ينص على ذلك والعقد شريعة المتعاقدين ولو كل واحد سفر الشخص اللي ما يحترم نفسه كان الجميع التزم مو نفس الفوضى الحاصله الكل يتشرط

 

[الجيش الحر]

اولا بارك الله فيك على اخلاقك العاليه وحرصك على الحلال والحرام وعدم ظلم البشر واذا كان السايق محترم ويعمل بجد ويخاف الله اتفق معاه كل سنة تزيده 10 الى ان يوصل راتبه 150 وبهذة الطريقة تظمن وجوده معاك لمدة طويلة ولا تنسى ان السواق الهنود حاليا رواتبهم من 120 الى 150 على الاقل. و90 اشويه عليه. واعتبرها صدقه له وعلى اهله.

والله الموفق

 

[بن ذى يزن]

من تسعين لي ١٥٠
يعني زياده دبل راتب

 

[بسطويسي]

من تسعين الى 150 دينار بسنتين
ليتك وزير ماليتنا ياشيخ
هالبنغالي مايحمد ربه انه برفاه عندك سلمه معزب مثل رولا دشتي خله يتحسف على ايامك

 

[الفهلوي]

اخوي البديل حط نفسك مكانه والله اعلم بظروفه تخيل انك تبي تطمح برزق اكبر والباب مفتوح لك
كلنا نحاول نطمع للأفضل مع زيادة الاسعار والتضييق فما بالك هالمسكين براتب ضئيل وما تدري ظروفه و اهله برا اللي يكد عليهم
لا تغصبه او تتصرف تصرف قاسي معاه كالابعاد فتقطع رزقه بما انه غير مضر مع الأخذ بحقك من مبلغ تنازل عنه للكفيل الجديد كحال اي شخص

اذا هو خبره بالسياقه و يدل المناطق تنازلي عنه <<يبلتك اياها من الآخر