في احدى تجمعات العمل لإدارات مختلفة استمعت الى هموم واحدة اعتقدت انها تقتصر على إدارات معينة
في السنوات الأربع الاخيرة تحولت نسبة كبيرة من العملاء والمراجعين الى كائن صعب التعامل معه حتى انه بدا يستخدم أسلوب متدني من الحوار والذي وصل الى حد التهديد بالضرب ان لم يمسك فعليا اداة الضرب ويلوح بها.
(هناك فئة قليلة من الموظفين مستفزين وهم من يبدأ بالتعامل الغير راقي ونحن لا نتكلم عن هؤلاء والحل الأفضل لهذه الفئة التقدم بشكوى رسميه لمسؤولينهم دون ان ننحدر لمستوى حوار متدني تجعلنا نستحي من التصرف الذي قمنا به ونتذكر قول المصطفى علية الصلاة والسلام ليس الشديد بالصرعة)
الموظف النفسية
كائن بشري حي يتعرض لضغوط عدة:
*لديه تعليمات من رؤسائه عليه بتنفيذها حرفيا وإلا ستتم معاقبته ومحاسبته
*عليه ان يعامل العميل بأسلوب محترم حتى وان كان الشخص الذي امام يفتقر للأدب لانه سيحاسب ان تصرف بغير ذلك وعلى الرغم من هذا فالأغلبية من المسؤولين يتبعون سياسة العميل دائماً على حق وهذا ما جعل نسبة هذه النوعية من العملاء بازدياد والبعض منهم بمجرد ان يعلو صوت العميل يبادر بإنجاز معاملته سريعا دراء للمشاكل مع المسؤول الأكبر. الموظف تهان كرامته.
*ضغوط أسرية وحياتية ومالية وحتى ادارية مثل منعه من الترقية او خصم او عقوبة وقعت عليه بالحق او بالباطل.
*ليش الموظف مايبتسم اذا ابتسمت البنت قالوا خفيفة وإذا كانت جدية قالوا نفسية والحال كذلك مع الشاب لذلك كانت كفة النفسية أرجح. ليس مهما ان يبتسم الموظف بقدر أهمية ان يعاملك باحترام.
المراجع او العميل الحبوب
*نسبة غير قليلة لا تحترم الدور طبعا الأعذار المشهورة والموحدة عشان ماينطر بالدور:
-طيارتي بعد ساعة(المفروض تكون بالمطار عدل؟ ليش نطرت لي هالحزة عشان تسوي شغلك؟ )
-عندي عزا (أحسن الله عزاكم خلص عزاك وراجع )
-أمي او أبوي بالمستشفى(الله يشفيهم بس شنو المطلوب؟)
-مرتي قاعدة تولد(الله يهون عليها بس شنو المطلوب؟)
-عندي موعد طبيب (الله يشفيك شنو المطلوب؟)
-مستعيل عندي اجتماع(عرفنا انك مهم شنو المطلوب؟)
*اكيد يامراجعنا و عميلنا المحترم ما ترضى احد يطوف دورك ليش تبي أطوف دور الناس؟
*الكبار بالسن ينطرون دورهم وله يختلقون هالاعذار السخيفة الواهية مع العلم انه له الاولولية انه يطوف قبلك وبدون رقم بس ما سوها وقعد ينطر دوره
ما استحيت من نفسك؟ حتى المعاقين في منهم ينطرون وهم لهم الاولولية.
التعامل الراقي
طبعا الموظف مؤ لازم يأخذ بريك وله لازم يتكلم بالتليفون والأجهزة مؤ لازم تخترب وإذا صار شي من هالاشياء
تجهز حق التسونامي من الألفاظ الراقية والصراخ والعويل وحتى السب
بس تخيل المنظر ريال طول بعرض وكشخه ويخترب الجهاز طبعا انت شغال طول اليوم وفجاءة اخترب الجهاز
أنتوا اللي خربتوا أنتوا متعمدين أنتوا ما تشتغلون بس حق السوالف حسبي الله عليكم انا مؤ مسامحكم لا دنيا ولا اخره
الله يبتليكم ان شاءالله أنتوا تشتغلون عندنا أنتوا حاطينكم أهني عشان تخدمونا
طبعا هذا بعض ألفاظ التسونامي
*طبعا في ناس يتعمدون يوقفون الشغل وهذولا قلة ويبين العطل المتعمد عن الطارئ
الطارئ راح تشوف الموظفين يحاولون يصلحونه وتشتغل الاتصالات لإصلاح الخلل والبحث عن البديل
* اذا كان في قرار مؤ عاجبه او مؤ مقتنع فيه الموظف عليه ان ينفذ التعليمات اللي عنده مؤ انه يقنعك فيه!! لانه احيانا حتى الموظف يكون مؤ مقتنع بس مجبر انه ينفذ هني تسونامي ثاني وانفجار
تبون مركز مالي طل شنو القرارات اللي اطلعونها من كيفكم على مزاجكم تمشون الشغل أنزين الموظف أهنئ يوجهه يقوله روح حق المسؤول اللي حط القرار واشرحله وجهة نظرك الأغلبية مايروحون او اذا راح يصير حمامة بيضه وجاي وقهوة بس على الموظف عنتر بالضبط (أبوي مايقدر الا على أمي)
*تدرون الإدارات اللي فيها تعامل مع الجمهور أصبحت إدارات طاردة ويحاولون قدر المستطاع الحفاظ على الموجود؟
لانه الموظف يتحمل كل هاذي الأعباء وابسط حق من حقوقه لم يحفظ وهو كرامته وإذا صار شي يقولوله دق عالمخفر!!
ليش ما أتوفر حماية للموظف وتحفظون كرامته؟ حتى تهديد بالقتل ياهم
* تبي انتاج؟ وفر بيئة صالحه وصحية للموظف عشان ينتج اكثر ويبدع بعد.
* كل ما تم ذكره واقع حقيقي مؤلم يتكرر يوميا
التعديل الأخير: