1 - ألهام فكر ( القلب الكبير ) - رحلة بحرية ...

[( القلب الكبير )]

المتسابق رقم (١)
العضو @( القلب الكبير )


بسم الله و الحمد لله ...
السلام عليكم .. أحبتى
ورحمة الله و بركاته
و اسعد الله أوقات الجميع بكل خير
الحقيقة لما قرأت و شاركت في موضوع استاذنا الحبيب بو محمد الحساوي
لم تكن عندي النية أن اشارك في هذه المسابقة لأنى لست اهلا لذلك
لكن لما ظن الاستاذ بو محمد ان مشاركتى هي موافقه على المشاركة
توقهت و حطيت لي عذر
المشاركة تعتمد على زيارة الهام فكري
و فعلا و انا صاج لأن
المشكلة عندي كانت تكمن اننى في مثل هذه المواضيع احتاج فعلا الى
ذهن صافي و استعداد و الحقيقة كنت محتار في اختيار الموضوع
ولما قرأت مداخلة الاستاذ بو محمد عندما قال : ​

وبو عبدالله ما ندري وين بْيحذفنا بر والآ بحر
​

من هنا مسكت طرف الخيط و تبلورت عندي الفكرة و الموضوع
علما هذه المحاولة الثالثة لي تقريبا
الأولى قديمة جدا محاورة بين اثنين قبل 20 عام أو اكثر و لعلي اعيد صياغتها
من جديد و اشارك فيها هنا
الثانية قبل اشهر في الاستراحة كان عبارة عن فاصل فكاهي قصير
http://www.nationalkuwait.com/forum/index.php?threads/255048/page-273
طبعا احبتى الكرام ما سأذكره انما هو من و حي الخيال حاولت ان يكون ابطالها
اكبر عدد ممكن من الاخوة و الاخوات الاعضاء المشاركين في الشبكة الاجتماعية
اخي الكبير @ياسين الحساوي واخواني الكرام و خواتى الكريمات @أبوطلال
@المختصر و @أم فواز و و@ام العيال و @فوضت امري لله و@رُبـّـمــا
و @الدّر و @خجـل و @ أفراح الرّوح @أم سعود @سنـين التّيــــهـ.. و@شتات
و@مع اللهو @khalid ahmed و @0utsider و @بسطويسي @براااق الحازم
و سأذكر اسماء مستعارة حسب ما تتطلبه الاحداث
ارجو أن لا ينزعج احد هي مجرد رواية خيالية
مع الأخذ بعين الاعتبار أن هذه المحاولة اقرب ما تكون الى مسرحية صغيرة
من عدة فصول
تلك كانت مقدمة تابعوني
​

 

[( القلب الكبير )]

نبدأ معكم
الفصل الاول :
دخلت الاستراحة ذاك اليوم ولقيت رواد الاستراحة جالسين على غير عادتهم
بومحمد الحساوي ماخذ ربعه أهو و بوطلال ايسولفون
وأم فواز امجابلة صحن الكنافة و حاطة إيدها على خدها شكلها مالها خلق
مع انها ما تقاوم الكنافة بس الظاهر متضايقة اشوي .. أو شبعانه
و أم العيال الآي فون و اتعابل فيه
وبو معاذ براق الحازم أيضا ماخذ ربعه مع المختصر يتناقشون في شئ ما
ومع الله منشكح على المطرح وقاضب كتاب يقرا فيه
و khalid ahmed و 0utsider و بسطويسي يلعبون كوت بو سته
و اسمع نجرة بسطويسي و خالد :شيطان:
و افراح الروح و خجل و ام غنام الدر وخولة أم اسعود جالسين مع ربما و طايحن له سوالف
و يضحكون ما ادري على شنو
سلمت و رحت جابلت مطارة الجاي و وقعت
شربت اول استكانه
اتلفت اناظر الربع محد صوبي الكل لا هي
وتذكرت قول القايل :
عيني يا عيني ادمعي
و يا آه من ألبي اطلعي
كل الحبايب اتجمعوا و انا حبيبي مش معي
يا آه من ألبي اطلعي
المهم ...
قعدت جندست راسي


و سرحت
اشوي دخل علي السيد ألهام فكري مال أنا
قال لي عمي بوعبدالله اشلووووونك
قلت : منو
قال : انا ألهام .. جايب لك فكره جهنمية :شيطان:
طالعته و قلت : ألهاموه .. ... فكره جهنمية ما أبي ..
قال : عيل اشتبي يا عمو ؟
قلت : ابي فكرة ملائكية :وردة: نستبشر فيها خير
قال :
طيب يا عمي بو عبدالله ولا تزعل .. عندي لك خوش فكرة ملائكية
قلت : هاتها .. عجل يا ولد
قال :
بعطيك عنوان و انت كمل
قلت : هات يالله ...
قال :
(( رحلة بحرية ... ))
حط الفكرة براسي وخلاني و مشى .. و ترك و راه
مجموعة من بنات الهامي يدورون حولي و حوالي
بدأت الافكار تتجمع و حوطوني بنات افكاري من كل صوب ...
قلت يا شِبِاب .. :
قلتها بهجة اهل لبنان شِبِاب ( بكسر الشين و الباء )
أنا من قلت يا شِبِاب أول من ألتفت و طالعنى بومحمد أهو و يا الشايب بوطلال
قال بو طلال :
اشعندك يا بوعبدالله .. خير ان شاء الله
قلت :
ان شاء الله خير ... عندي لكم خوش فكره نكسر فيها الروتين الممل
.. اشرايكم نطلع رحلة بحرية
صاحت @ أفراح الرّوح : ... وااااااو عمو بو عبدالله فكره حلوة
قالت ام فواز : ... رحلة بحرية !!!! من صجك بوعبدالله
قلت : إي من صجي عيل اشلون
خلونا انغير الجو اشوي ... نكسر الروتين الممل
قالت ام فواز : لا تكفا بو عبدالله اقترح شئ ثاني .. أنا وحدة اخاف من البحر
جان اتقول ربما :
يا حبيبتى ام فواز اكو احد ايخاف من البحر هذا و احنا اعيال و احفاد اهل البحر
قالت ام فواز : و الله يا اوخيتى ربما احب البحر بس انا عندي عقدة من شفت فلم بس يا بحر اشون مساعد
مات و اهو داخل البحر كسر خاطري و امه المسيجينة تبجي عليه اكسرت خاطري :باكي:
البحر غدار مثل ما قالوا ماله امان و من ذاك اليوم قمت اخاف من البحر
جان اتقول ام العيال :
و الله بوعبدالله صج أهي خوش فكره بس حتى انا ما احب البحر
قالت لها ربما :
ليش ياعمري اشفيج انتى بعد يا ام العيال
لا يكون صارت عندج عقدة من شفتى فلم الفك المفترس ؟
جان اتقول ام العيال : إي صح اشدراج ؟
و انا قاعد اسمع حجي هالحريم وساكت ... حاشني شبه احباط
اهني .. ادخلت فوضت امري بعد ما سلمت قالت :
اشفيكم منو هذه اللي اتخاف من البحرمثلي ؟
يا اعويني اعويناه .. جات فوضت و كملت السالفة
اهنى عاد .. انا اعتفس و يهي و اشوى و اطلع من طوري :شيطان: بس قاضب نفسي
حنا ما خلصنا من ام العيال و ام فواز
اطلعت لنا هالدور فوضت امري :باكي:
قلت لها و انا احاول امثل دور الهادي :
ليه يا فوضت انتى اتخافين من البحر اشفيكم يالحريم اشعلامكم
قالت احب البحر بس اخاف من دوار البحر
قال بسطويسي : قلنا ام فواز و ام العيال عجايز و اكبار سن
بس يا فوضت امري انتى توج شابه توقعت قلبج قوي مثل ربما
جان اينط خالد من صوبه و قال :
هههههههه شابه ؟ اشاقلوا لك يا بسطويسي اهي جولة عشان اتشب ؟
ألتفت بسطويسي صوب خالد و طالعه بغضب

قال له : هيي هيي هيي .. ترى
ما اضحك .. شوف ترى انت من اليوم باط جبدي :شيطان:
ما اتعرف تلعب كوت بوسته و خربت علينا اللعب كم مره
و الحين جاي اتسوي دمك خفيف يا اخويلد
قال خالد :

اشفيك عصبت أنا اشقلت ؟!! :شيطان:
ما تبيني اتحجى ؟
و اهني تدخل بو محمد و قال : بسكم نجره أنت و ياه .. خلاص
كمل بو عبدالله اشلون راح اتكون الرحلة ووين

قلت :
شوفوا راح نأجر يخت كبير من شركة نادي اليخوت
و راح نروح لجزيرة اسمها جزيرة المحبة و السلام
قالت : سنين التيه


ههههههااااي ..
حلوة .. جزيرة المحبة و السلام
قالت الدر :
جزيرة المحبه :قلب: و :قلب: السلام ؟!!! بو عبدالله هذي و ين صايره ؟
قلت :
هذه اهني جريب ساعتين أو ساعتين و نص باتجاه الشرق
جزيرة حلوة اكتشفتها قبل 20 سنة بالصدفة لما طلعت ذاك اليوم حداق
مع أولدي عبدالله لما كان عمره 6 سنوات كنت آخذه يتعلم الحداق
جزيرة أقرب ما تكون الى جزيرة الاحلام :وردة:
شوفي


سماءها صافية .. ليلها هادئ .. هواها منعش كنسيم العليل :وردة:

​

:وردة: فيها شلالات و انهار و اشجار و اطيار ولا في الخيال :وردة:​

اللي يبي يرتاح و يبي هدوء و يبي رومانسية


ايروح هناك
و اللي يبي السيد الهام فكري امجابلة 24 ساعة
يفتح له ابواب الشعر و الرويات و المقالات هم .. ايروح هناك

تابعوا تكملة الفصل الأول ​

 

[( القلب الكبير )]

نتابع

هذه الجزيرة يا الربع تملكتها بوضع اليد من 20 سنة
سنعتها و نظفتها و اعتنيت فيها
سويت فيها شاليه خاص فينى ومجموعة من الشاليهات الصغيرة على غرار الغرف
اللي في جزر المالديف حق اهلي و من يعز عليّ


حطيت فيها جميع و سائل الترفيه لي و لكل الزوار اللي اتشرف بتواجدهم
من 20 سنة و انا اقضي و قتى مع قرة العين و الفؤاد ام عبدالله والبزران اعيالي
لما كانوا بزران لكن الحين ما شاء الله اكبروا ما عاد ينقال لهم بزران
من 20 سنة كل عطلة نهاية اسبوع تقريبا .. و كل عطلة رسمية .. نروح هناك
هذه عرزالة خاصة هنا اجد راحتى


هنا أخلو مع نفسي
ولأنني احبكم و اعزكم و ادري انكم تبادلوني نفس الشعور
با خذكم لها أبيكم تستانسون و تستمتعون و اتشوفون شئ حلو و جميل
و حتى انشجع العيايز ام فواز و ام العيال اقترح ان تكون الرحلة
مفتوحة عامة يعني راح كل و احد منا يجيب معاه افراد عايلته
انا من صوبي راح اكون مع ام عبدالله و اعيالي كلهم في استقبالكم
قالت ربما :
صج بوعبدالله .. الله هذه فرصة انتعرف على اختنا العودة ام عبدالله
و انشوف العرايس بناتك
قالت ام العيال : والله خوش فكره إذا جذي خلاص بجيب قشي ... اقصد اعيالي معاي
قلت :
ها ام فواز اشقلتى ؟
قالت ام فواز .. يا عونت الله .. ما اقدر عليكم .. يالله شوركم و اهدايت الله
و هذه فرصة على قول اختى ربما بنلتقي بام عبدالله و انتعرف عليها
هذه بحد ذاتها غنيمة
قالت ام العيال : إي و الله كنا نسمع عن ام عبدالله و الحين بنشوفها
قالت فوضت امري :
صج بوعبدالله .. يعنى راح انشوف اختنا ام عبدالله على الطبيعة
قالت خجل:
حتى انا و الله ودي اشوف ام عبدالله و اتعرف عليها
قلت : ان شاء الله تعالى كلكم بتشوفونها و اتعرفون عليها و اتعرف عليكم
حريمنا كلنا راح يلتقون مع بعض و ايتعرفون على بعض
و كذلك الرجال و الابناء .. بس خل نتفق بالاول
خولة ساكته ما فجت حلجها بكلمة أهي وشتات
قلت :
ها اشعلامكم ما تشاركونا بآراءكم ليه ساكتين
قالت شتات : أنا معاكم على طول الخط
قالت خولة .. و الله يابوعبدالله .. الفكره حلوة و فعلا ودنا انغير جو
بس و دي اقول شئ و خايفة تزعل !!
قلت خير ان شاء الله .. و انا امبقق اعيوني و جني حاس و خمنت اللي بتقوله
قالت :
يالربع يا و يلي و يلاه انا بعد اخاف من البحر .. ليش ما انخليها رحلة برية
اهني انا اشوي و اطلع من طوري صج :شيطان: .. كلما نقنع و حدة و انقول خلاص
تطلع لنا و حدة ثانية
عضيت شفايفي و انا اطالعها و تمالكت اعصابي
قلت بهدوء متصنع :
يا خولة يا ام اسعود طال عمرج الجو ليما الحين حار مثل ما انتى شايفه
مو مال رحلة برية .. تو الناس .. تو الناس
في المستقبل ان شاء الله لا دخل موسم التخييم و برد الجو اشوي
راح نفكر برحلة ثانية برية .. انوديكم المزرعة و إلا انتحاطط و انسوي مخيم خاص فينا
اشرايك يا بو محمد ؟
قال بو محمد .. و الله يا بو اعبيد .. انا الحقيقة تفاجئت بهذه الفكره الرائعة :وردة:
من زمان و دي اطلع رحلة من هذا النوع بس ما كان عندي و قت كل مشغول
لكن هالمرة عاد ما دام السالفة كذا .. لا الرحلة هذه ما اتطوف :إستحسان:
و بجيب اعيالي و اهلي اول و احد فيكم
جاء دور بسطويسي .. عاد بسطويسي ما ايجامل احد جان ايقول :
يا جماعة الخير انا راعي بر مثل خولة ماني راعي بحر
قلت بيني و بين نفسي : ... و أليييييييه .. اشسالفة هالناس
تالي قلت له : هاااا شتقول يا سي بسطويسي بيه ؟
لا يكون بعد انت اتخاف من البحر ؟
قال : لا يا بو عبدالله انا سبع البرمبه :إستحسان: ما اخاف لا من بحر و لا من بر ... بسسس ...
قال بس و سكت
قلت : شنو بس .. قول اشعندك
قال : لا و الله يا بو عبدالله بس أنا اخاف اجيب اعيالي
و انا اعرف اعيالي حرجين و مايقعدون راحة
قلت له :
لالالا عادي عندنا و عندك خير .. هذه طبيعة الاطفال لا زم يتحركون
قال : بو عبدالله طيعني اعيالي مو عاديين اعيالي ايكسرون و يمشون
و انا ساعات انحرج منهم ..اخاف ايعفسون المكان فوق تحت
آخر مره كنت مرزرعة و احد من الربع و قاموا ايلاحقون الخرفان
و اعفسوا المزرعة فوق حدر
و عندي و الدي شعبان الوسطي اهو و اخوه حنفي قاموا اينبطون
البط والدجاج بنبابيطهم ليما طلعوا رفيجي من طوره :شيطان:
قلت : هاااا .. اشلون ؟
عندهم نباطات بعد ؟


لالالالالالالا لايحوشك مادام السالفة جذي
لا يبا خلهم في البيت و تعال انت و ام شعبان حرمكم المصون بروحكم
اهني .. الاخ prince دخل متأخر و اهو ايقول :
شالسالفة عندكم الصجة و اللجة
اشعندكم اصواتكم و اصله قسم الشبكة الحرة
قالت له افراح الروح :
عمو ابوعبدالله بياخذنا رحلة بحرية
قال البرنس
صج ... اخاف اتغشمرون .. رحلة بحرية .. الله من زمان و دي برحلة بحرية
قال خالد : إي رحلة بحرية لا و ابشرك بعد الرحلة راح اتكون فيها لوية
قال البرنس :
اشلون لوية .. يعني .. اشقصدك
قال له المختصر :
الرحلة مو بس حقنا بروحنا
قال البرنس .. ها
قال المختصر :
حتى عوايلنا و اعيالنا معانا
قال البرنس .. و الله هذه خوش فكرة
قال مع الله : يا الربع
لو كانت الرحلة حقنا ابروحنا راح اتكون حلوة .. اشلون لو كانت مع عوايلنا اكيد بتكون
رحلة حلوة و اجد
قلت : .. بو طلال مالك حس ساكت اشفيك لا يكون بعد انت بري مثل بسطويسي و خولة ؟
قال بو طلال ..:
و الله شقول و احجي ما خليتوا لي كلام عقب كلامكم
لا بالعكس انا بري و بحري و جوي بعد:إستحسان:
انا موافق على طول الخط ما يحتاج بو اعبيد

تابعوا​

 

[( القلب الكبير )]

نتابع الفصل الاول

قالت فوضت امري
الحين خلونا انفكر اشلون راح اتكون رحلتنا .. اقصد الرحلة من هذا النوع تحتاج الى اعداد
و تعاون من الجميع
قال بو معاذ : كلامج صحيح اختى فوضت لازم نعد العدة
المكان موجود و جاهز عند اخونا بوعبدالله
لكن الامور المترتبه على الرحلة مثل الطعام و الشراب و نحوه
قلت :
كلامج يا اختى فوضت و اخي بو معاذ عدل لكن قبل هذا
نبي نطلع من عنق الزجاجة أولا
قال المختصر : اشتقصد بوعبدالله
قلت لازم ناخذ موافقة الجميع نبي انعرف
هل الجميع مستعدين يشاركون و إلا ... لأ
طالعت صوب .. ام فواز و ام العيال حسيت انهم بعدهم ... مترددين
وقلت : ... ها يا ام فواز انتي و ام العيال اشعلامكم ليما الحين خايفين ؟
قالت ام العيال و يا الله يا بوعبدالله انا اللي امخوفنى الفك المفترس اخاف يطلع لنا
وحنا بنص البحر
طالعت بومحمد أهو و بو طلال و أوت سايدر ميتين ضحك
و أنا احر :شيطان: ما فينى ابرد ما عندهم
قلت لها : ام العيال انتى من صجج و إلا اتغشمرين
قالت ام العيال : لا من صجي اتخيل الفك المفترس يوم بلع الريال :باكي:
أهني بو محمد عقب ما تمالك نفسه من الضحك تدخل و قال لها :
يا ام العيال .. اتوكلي على الله و لا تحاتين واتركي عنج الاوهام و الخوف
اللي ماله داعي ... كلنا راح انكون معاج في مركب و احد مع اعيالنا
و الكلام لج بعد يا ام فواز .. انا طول عمري هادي معاكم :وردة: .. لا اطلعوني من طوري
مثل بو عبدالله
الرحلة ما تحلى وتكتمل بدون ام العيال و ام فواز و باجي رواد الاستراحة
اذا و احد هون كلنا بنهون ترا
اشقلتى يا ام فواز ؟
قالت ام فواز .. خلاص يا بومحمد خلاص امري لله
عشانكم راح اضحي بنفسي .. آه يا حسرتي :باكي:
قلت : يا ام فواز انتي و ام العيال و كل و حدة عندها عقده من البحر
صدقوني ما راح اتحسون بأي خوف أو دوخة أو شئ
راح تركبون يخت
مو لنج أو طراد
هذا يخت عود اتعرفون شنو معنى يخت ؟
شئ مثل الطيارة و احسن من الطيارة مكان مريح .. فيه صالات و فيه تكرمون حمامات
و المسافة كلها ساعتين أو ساعتين و نصف
شوفي يا ام فواز انتي و ام العيال و انتي بعد
ياخولة و فوضت امري ياللي اتخافون من البحر هذا اليخت شوفوه

و هذه صالة الحريم


جنكم قاعدين في البيت أو في الاستراحة ... اشتبون بعد
قالت الدر :
يالله .. خلاص يا خواتى نبي انغير جو الله ايخليكم .. صدقوني مثل
ما قال بوعبدالله ما راح اتحسون بشئ انا ركبت يخوت وطلعت رحلات بحرية
لما كنت اسافر مع عايلتى شئ خيالي اليخوت كأن الواحد قاعد في بيته
قلت : ها يا جماعة اتفأنا خلاص ؟
قال الجميع .. خلاص يا بو عبدالله اتفقنا
الحين كل و احد خل ايفكر مثل ما قالت اختى فوضت .. نبي انعد اعداد ممتاز لهذه الرحلة
حتى نستمتع
انا من صوبي ... وسائل الراحة الاستجمام و التسلية للصغار و الكبار
كلها متوفره بس انت ما عليكم امر شوفوا شنو تحتاجون من الطعام و الشراب
خل نتفق كل و احد او كل عايلة عليها شئ ..
الحين اول شئ انا بتصل بالشركة و اشوف اسعار التأجير كم عندهم
قالت ربما : انا و عايلتى علينا الماي :شراب:
قالت ام فواز أنا و ام العيال و فوضت علينا الغداء
قالت خجل أنا و افراح الروح و الدر و شتات علينا الحلو :كعكة_ميلاد:
قالت خولة ام اسعود انا عليّ القهوة العربية راح تشربون قهوة
عمركم ما شرفتوا مثلها :إستحسان:
قلت :
خوش حجي عيل انتو الحريم عليكم سوالف الاكل و الشرب
و حنا الرجال علينا اجرة اليخت
قالت سنين التيه : ههههههههااااي عيل انا و يني من موقع الاعراب ؟
صج حاولت اتعلم من امي الطبخ و ليما الحين في اول السلم
بس لازم اشارك
قالت لها فوضت : حبيبتى :قلب: ما نبي شي
قالت سنين : هههااي لا مستحيل لازم اشارك
قالت لها شتات : اشرايج انا و ياج علينا السلطات ؟
قالت سنين : أوكي :إستحسان: شتوتتي خلاص السلطات علينا
قال بومحمد : بوعبدالله انا حاضر باللي تبون حتى لو اتحمل تكلفت اليخت بروحي
قلت :
كفو و الله يا بو محمد ماهي غريبة عليك ادري انت قدها و اقدود و قول و فعل
بس المقصد طال عمرك نبى نتعاون كلنا في تحمل تكلفة هذا اليخت
يالله فكروا معاي
متى اتحبون اتكون رحلتنا ؟
قال بسطويسي :
خلوها يوم عطلة ... يوم جمعة او سبت
قال خالد :
انا عليّ دوام شفتات و احتمال دوامي يصادف يوم عطلة
قال بسطويسي : احسن خلك جابل شغلك ويريحنا و ارتاح
قال خالد : انت اشفيك عليّ حاط دوبك و دوبي ؟
قلت :
خلاص يا حبيبي انت و هو خلاص بأ يا احمد أقصد يا بسطويسي
تونا على البر .. و انتوا نجره من الحين
عيل اهناك اشبتسون ؟
ان شاء الله كل اشوي نجره ؟
قال خالد :
خلاص عمي بوعبدالله انا آسف بس هذا ما ادري اشفيه عليّ محتر مني
لأنى غلبته مساع مرتين
قلت له :
حاول اتفرغ نفسك و ان شاء الله دوامك ما ايصادف يوم الرحلة
قال خالد : ان شاء الله
و انت يا بسطويسي خلاص خل اعيالك يجون معاك بستانسون
بس انت و صهم طال عمرك
قال بسطويسي : بوعبدالله اعيالي و اعرفهم عدل خلهم بالبيت احسن
قلت : لا .. الله بيهديهم ان شاء الله و جود يلتهون هناك بالالعاب و يلعبون
مع اعيال ام ربما و فوضت و اعيال آوت سايدر ..
إلا على طاري آوت سايدر .. خانس ماله صوت
طول هالمدة ساكت ما تحجي و ينه ؟


تابعوا الجزء الاخير من الفصل الاول ​

 

[( القلب الكبير )]

:وردة:نتابع ما تبقى من الفصل الأول
انتبهت لأوت سايدر ما له حس خامر
طالعت ذاك الصوب لقيته قاعد و غرقان مع التتن



رحت له : قلت ها فيلسوفنا اشعلامك مالك عاده ساكت
قال : و الله يا بوعبدالله ،،،،،،،،،،،،،،،،
ما ادري شقول لك ،،،،،،،،،،،،،،،
قلت : لا يكون بعد انت مو راعي بحر
اذا قلت انا مو راعي بحر اهون و الغي الرحلة
قال : لالالالا يابوعبدالله ،،،،،،،
بالعكس انا غرامي البحر ،،،،،،،،،،،
بس ،،،،،،،،،،،،،،،
و الله ما ادري شقول مستحي ،،،،،،،،،،،،،،
قلت : افا عليك .. قول اشفيك عسى ما شر
قال : و الله يا بو عبدالله أنا ودي اطلع معاكم الرحلة هذه
بس و الله ظروفي ما تسمح ،،،،،،،،،،،،،
قلت : شنو ظروفك ما تسمح من ناحية شنو بالضبط ؟
قال :
سمعتك تقول تكلفة تأجير اليخت راح اتقسم على الرجال
و انا و احد منهم ،،،،،،،،،،،،،،
و انا اعرف ان تأجير يخت بهذه الاوصاف موشئ بسيط
و انا رجل سبحان الله في هذه الفترة قاعد ابني بيتى و كل دينار لازم احسب له حساب ،،،،،،،،،،،،،،
و عشان جذي انا بانسحب و اتعذر بعذر
وارجوك خل الكلام بيني و بينك ،،،،،،،،،،،،،،،،،،،،،
قلت له : أفا عليك على بالي عندك سالفة
مستحيل اهدك ..لا تحاتى هالشئ اترك السالفة عليّ
لا تشيل هم و انا اخوك
قال لي : جزاك الله خير،،،،،،،،،،،،
بس ما ايصير الكل ايشارك و انا لا ،،،،،،،،،،،،،،،،
قلت له : المفروض هذه الرحلة من اولها الى آخرها على حسابي الخاص
و انا فعلا قررت اتكفل بهذا الامر
مو ابعيد اكو اعضاء غيرك لهم ظروف خاصة و مستحين بعد ايقولون
عشان جذي
انا خلاص اتخذت قراري وراح انفذه ... راح اتحمل نفقات الرحلة كلها
المهم انتو تستانسون و كلها يوم واحد
قال : قواك الله يا بوعبدالله ،،،،،،،،،،،
ما قصرت عسى عمرك طويل ،،،،،،،،،،،
ناداني بو طلال وكان قاعد مع بو محمد و قال :
بو عبدالله تعال ما عليك امر
استأذنت من آوت سايدر
ورحت لهم قال لي بوطلال : ... اقعد بيني و بين بو محمد عندنا سالفة
نبي ناخذ رايك فيها
قلت خير ان شاء الله
قال بو طلال : الخير بويهك
انت جزاك الله خير عرضت علينا هذه الرحلة
ووفرت لنا المكان المناسب اللي فيه وسائل الراحة و الترفيه بدون مقابل
وانا و بو محمد قررنا نتحمل باجي تكاليف الرحلة كلها
انا و بو محمد الحمد لله ما علينا قاصر و نقدر نتحمل جميع التكاليف
يمكن بعض الاعضاء عندهم ظروف مادية و يستحون يتحجون
قلت و الله يا بو طلال :
سبحان الله تو الحين و انا اتحجي من آوت سايدر طرت عليّ هذه الفكرة
و كنت ناوي اتحمل تكاليف الرحلة كلها بروحي
لكن مادام السالفة جذي
شوف طال عمركم انت و بو محمد انا عندي اقتراح ثاني
قال بومحمد : شنو اقتراحك
قلت : حنا الثلاث نتشارك بتكاليف الرحلة
قال بو محمد : لا يابوعبدالله يكفي انك وفرت لنا المكان الدور و الباجي علينا
قلت لا يا بو محمد عندنا و عندكم خير و قوم تعاونوا ما ذلو
قال بو محمد : عيل خلاص شورك و اهدايت الله
قلت لهم : خوش خل اروح ابشر الاعضاء
قال بو طلال :
لا تقول لهم خل الكلام بينا
قلت يا بو طلال لازم ايعرفون حتى
لا ايحسبون حسابهم قبل ويشترون او يتفقون مع المطاعم
قال بو محمد : ماكو طريقة انسويها بدون ما ايحسون
ان احنا المتكفلين بهذه الرحلة ؟
قلت : يا بو محمد ما في طريقة إذا ما علماهم راح ينفذون
الاتفاق اللي اتفقنا عليه على اساس الحريم يتكفلون بسوالف الاكل ..
و اذا ما علمناهم راح مثل ما قلت يتفقون مع المطاعم او ايحسبون احسابهم
خل اعلمهم و خلاص
قال بو محمد : خلاص اللي اتشوفه
قلت : الربع ابشركم بو محمد و بو طلال قرروا
يتكفلون بتكاليف الرحلة كلها
يعنى الرحلة راح اتكون مجانية :إستحسان:
:وردة: :وردة:طالعت و جوه الاعضاء كلها تهللت فرحا و استبشروا خيرا :وردة:
وقال الجميع بصوت و احد جزاهم الله خير ما قصر بو محمد و بو طلال
عساهم على القوة
قال بو طلال : و انت بو عبدالله و يانا
يا الربع ترى حتى بو عبدالله اهو اكثرو احد فينا امساهم
قال الاعضا جزاكم الله خير ثلاثتكم ما قصرتوا و الله يعطيكم العافية :وردة:
قال المختصر :
الحين متى ان شاء الله موعد الرحلة ؟
قلت : ان شاء الله يوم الخميس القادم و الباب مفتوح لكم جميعا و لعائلاتكم صغار و كبار
خلاص يا جماعة اليوم ان شاء الله
انا بتصل على شركة نادي اليخوت و احجز عندهم
نادني خالد وقال :
عمي بوعبدالله ابيك بسالفة
قلت له : خير ان شاء الله اشفيك لايكون تناجرت مره ثانية مع بسطويسي
قال : لا
الحقيقة انا شاب و مو متزوج و انتوا رحلتكم رحلة عائلية
و انا عزابي اشلون ؟
قلت له : تعال مع امك و ابوك و خواتك إذا عندك خوات
قال : خواتى كلهم عند ازواجهم و امي و ابوي شيبان
ما اعتقد فيهم شدة رحلة مثل هذه
قلت له : خلاص لا تحاتى انت ولدنا منا و فينا تعال بروحك .. حياك الله ..
قال : مشكور عمي ما قصرت
قلت للجميع :
انتباه
يا جماعة اللي خايف من دوار البحر يروح اي صيدلية و يشتري حبه ضد الدوار
نبي رحلة مميزة نجتمع فيها كأسرة و حدة على المحبة و الخير
ولا صار معنا ضيوف من خارج الشبكة مثل حريمنا و اعيالنا
اكيد راح اتكون مميزة جدا
نسأل الله أن ييسر لنا هذه الرحلة و يبارج لنا في اوقاتنا فيها
قال الجميع :
آآآآآآمين
الى هنا انتهى الفصل الاول
أوف ما بغىت اخلص
تعبتوا ها
ادري تعبتوا و انتوا تقرون
شسوي هذا انا
ما اعرف الاختصار
تحملوني :وردة:

و تابعوا الفصل الثاني قريبا إن شاء الله تعالى
:وردة::قلب::وردة:
محبكم
القلب :قلب: الكبير ​

 

[الدّر]

خو ش رحلة كروز

متابعين بشغف

 

[ياسين الحساوي]

أبدعت وصلت وجلت مع بنات أفكارك أخي الحبيب بوعبدالله
وياترى من راح يكون النوخذة اللي تطمئن له الخوافات؟

متابعين بشوق لك وللسيد إلهام فكرك
:إستحسان:

الى هنا انتهى الفصل الاول
أوف ما بغىت اخلص
تعبتوا ها
ادري تعبتوا و انتوا تقرون
شسوي هذا انا
ما اعرف الاختصار
تحملوني :وردة:

تبي الصج تعبنا...الظاهر بنات أفكارك قرقة وايد

إذا ما تقدر اتجعمهم بيصير موضوعك ولا مسلسل تركي
هذا واحنا ماركبنا اليخت..شللي بيصير في البحر مع المصرقعات من الخوف؟
:باكي:
بس الشهادة لله جهدك واضح بحرصك على جمال الطرح والتسلسل
قواك الله ونحن بالإنتظار
:وردة:
​

 

[( القلب الكبير )]

مساكم الله بالخير جميعا

أبدعت وصلت وجلت مع بنات أفكارك أخي الحبيب بوعبدالله
وياترى من راح يكون النوخذة اللي تطمئن له الخوافات؟

متابعين بشوق لك وللسيد إلهام فكرك
شللي بيصير في البحر مع المصرقعات من الخوف؟
:باكي:
بس الشهادة لله جهدك واضح بحرصك على جمال الطرح والتسلسل
قواك الله ونحن بالإنتظار
:وردة:​

اضحك الله سنك يا بومحمد مت من الضحك :وردة:
الحقيقة مداخلتك هذه خلتني اغير الخطه المرسومة
اوحت لي بشغلة بخصوص المصرقات
راح انشف ريجهم مثل ما نشفوو ريجي
اصبر خل يركبون البحر و راح اتشوف
و جزاك الله خير على التشجيع بارك الله فيك :وردة:
الشغلة الثانية
ابي منكم جميعا احبتى الكرام اطولون بالكم عليّ
انا هالشكل .. ما اعرف اختصر من عمري
وأي موضوع اكتبه فأنا استرسل فيه
الاحداث غالبا تكون مترابطه وعندما يأتني تنبيه بأن الموضوع
قد تجاوز 10000 حرف او كلمة
اضطر لتجزئة الموضوع و هذه التجزئة تسبب لي ربكة
و احيانا انسى بعض الأمور وو أحيان اخرى اضطر لحذف جمل
و اتعب كثير جدا في تنسيق الموضوع مره اخرى بعد حذف او ألغاء جمل بسبب
تجاوز عدد الاحرف او الكلمات تصير لخبطه عندي وايد
لذا افضل ان تكون مواضيعي دفعه و حدة حتى لو كانت طويلة
و سامحوني :وردة:


​

 

[( القلب الكبير )]

قواكم الله احبتى الكرام :وردة:
اشحالكم يا هل الكويت
اتابع معكم
و نبدأ بالفصل الثاني
و قبل كل شئ هناك ملاحظة
تغير في الخطة المرسومة لهذه الرواية بعد مداخلة استاذنا بو محمد حفظه الله
أنا كنت ناوي اسبق الجميع و اطلع من شاليهي الى الجزيرة مباشرة
لكن الحين لا
خليت أولي عبدالله ياخذ أمه و خواته يوم الاربعا و يسبقنا هنا
و انا راح ارافجكم في الرحلة لسببين
أولا :
ما ابي اعطي احداثيات الرحلة حق احد و تالي ايعرف مكان الجزيرة و ين في
ثانيا :
ابي آخذ بثاري من ام فواز و ام العيال و انشف ريجهم مثل ما نشوفوا ريجي
ساعة ذاك اليوم اقنع فيهم ما يقتنعون اللي خايفة من الفك المفترس
و اللي متأثرة بفلم قديم
و عشان هيك يا زلمه أنا راح اجننهم اشوي
بس خل يركبون البحر
بيني و بينكم رحت احد المحلات الخاصة بالأدوات البحرية
و عندهم مجسمات حق بعض الاسماء
و شفت عندهم قرش طوله 3 امار تقريبا و نفس لون الفك المفترس
يتحرك بالرمونت كنترول عن بعد و شريته
و اتفقت مع كابتن اليخت و طلبت منه إذا و صلنا نص البحر
ايخليى الجرجور هذا يفتر حوالين اليخت
و اذا يقدر ايسوي حركات معينه بحيث يظن الظان ان اليخت تعرض
لصدمة ايكون افضل
قال الكابتن : ليش يا بو عبدالله بدك تعمل هيك
قلت له : بدي اجنن في البحر اللي جننوني في البر
و خلاص اتفقنا على هذا
المشهد الاول :
عقب لوية أمس اجتمعنا
ثاني يوم في الاستراحة مثل العادة
و قلت لهم :
انا خلاص حجزت اليخت لمدة يوم كامل
و الرحلة تبدأ الساعة 8 صباحا الجميع موجود عند نادي اليخوت
لا احد يتأخر رجاء
قالت سنين : 8 الصبح ؟
ههههههههاااااييي
8 الصبح انا توني صار لي ساعتين نايمة خلوها الساعة 11 الضحى
عشان انا اشوي
قلت لها : لا ما ايصير يدوب الوقت يكفينا
8 الصبح يبينا ساعتين ليما نوصل صارت الساعة 10
ما تبين تستناسين
قالت : خلاص يوم الاربعا بحاول انام امبجر و اذا ما نمت اخذ حبه منوم
وبوصي امي حبيبتى تاخذ بالها مني غشان ما تروح عليّ نومة
قلت :
المهم يالربع الحاضر يبلغ الغائب
يوم الخميس ضروري التواجد قبل الساعة 8
رحلتكم راح تستغرق تقريبا ساعتين و نصف
و انا ان شاء الله مثل العادة راح اطلع من الشاليه
يعنى راح اكون هناك من يوم الأربعاء مع الاهل
خلاص اتفقنا
و اللي لا سمح الله ايحصل له ظرف طارئ ما يقدر يجي
يبلغنا حتى لا ننتظر
الحريم يتواصلون مع ام فواز اللي تعتذر منهن
والرجال يتواصلون مع بو طلال اللي بيعتذر منهم
الحجي هذا كان يوم الثلاثاء
يوم الاربعا قبل الرحلة بيوم قالت لي ام فواز و اهي متضايقة
بو عبدالله ألحق
قلت ها عسى ما شر ؟
قالت : أفراح الروح اعتذرت ما تبي ترافجنا
قلت : أفا ليه عسى ما شر
قالت اما ادري الظاهر عندها ظروف
انتظرت افراح الروح ليما ادخلت بالليل
و قلت لها : افراح ليه يا عزيزتى شنو هذا الخبر المزعج
قالت : و قد اغرورقت عيناها بالدموع والله يا عمو ابوعبدالله غصب عني :وردة_ذابلة:
انا حابه اكون معاكم في هذه الرحلة المميزة التى تجمعني بكم على الطبيعة
بس ظروف الدراسه و بعد المسافة بيني و بينكم
هي السبب
عاد انا طيبت خاطرها و قلت
لعله خير يا بنتى الغالية لعله خير ان شاء الله في عطلة الربيع
نحاول ان نهيئ انفسنا مره اخرى و نخرج في رحلة برية و تكونين معنا
لا تحزني يا عزيزتى
ثم كفكفت دموعها و ام فواز تمسح على رأسها :وردة: بحنان :وردة:


المشهد الثاني :
يوم الخميس عقب صلاة الفجر تميت صاحي
و أنا من النوع لا صار وراي شغل ما انام و لا حتى اشتهي الأكل
انتظرت ليما الساعة 7 دقيت سيارتي سلف باتجاه نادي اليخوت و صلت تقريبا 7 و ثلث الطريج كان فاضي
طبعا انا رحت اجيك و اتفقد اليخت و اتطمن على الوضع
تابعوا ،،،،


​

 

[( القلب الكبير )]

آآآآه يا قلبي
اللي كنت خايف منه صار :وردة_ذابلة:
بكل اسف
صار لي جريب ساعتين و انا اكتب و انسق
و فجأ انمسح كل اللي كتبته :باكي:
آسف جدا احبابي الكرام
هذا الشئ يسبب لي احباط
ضاع و قتى و جهدي سد ي و الله المستعان
شاء الله وما قدر فعل
و البحمد لله على كل حال
شكلي ما راح اقدر اكمل اليوم
اعتذر :وردة:​

 

[( القلب الكبير )]

و هذا الاخ شملان و لد بو محمد الحساوي
عدنا من جديد
بعد جهد جهيد في اعادة صياغة ما فقدته قبل قليل
و الحمد لله رب العالمين
المشهد الثالث :
هناك في الجزيرة ... ام عبدالله كالعادة ايضا صلت الفجر و اقعدت
تذكر الله ليما الشروق و انتظرت ليما الساعة 8 و نص قعت اعيالي من نومهم
و هي اتقول لهم
يالله يا اعيالي استعدو عندنا اليوم ضيوف لازم نكون مستعدين لأستقبالهم
بعد ساعة ان شاء الله ابوكم و اصل مع الضيوف
ننتقل للمشهد الرابع
نعود الى نادي اليخوت انا طبعا مثل ما قلت لكم رحت اتفقد الوضع
و خلال هذه الفترة بدأ الاخوان و الاخوات يتوافدون
انا كنت فوق في غرفة القيادة مع الكابتن
والربع كلهم الحمد لله تواجدوا هم و اعيالهم
و انا من فوق بيني و بين بو طلال اتصال
قلت : ها بو طلال صبحك الله بالخير
قال بو طلال : هلا بو عبدالله االله ايصبحك بالخير
قلت : ها بشر الكل موجود ؟
قال : الحمد لله الكل موجود محد تخلف
قلت : خوش عيل الحين نبدأ على بركة الله
ودقايق و انزل ... لكم
طبعا الدقايق هذه كنت اتفق مع الكابتن على الفلم اللي :شيطان:
بطفر فيه ام فواز و ام العيال
حرك اليخت على بركة الله
الجو بفضل الله كان صافي و الهوا حلو
نزلت انا و سلمت على الجميع
قال بو طلال :
بو عبدالله أعرفك على الاخ بو فواز و اعياله
و هذا الاخ شملان الحساوي و لد بو محمد
وهالشباب الحلوين اعيال ام العيال و اعيالي طلال و اخوانه
قلت : و النعم و الله يا هلا و يا مرحبا فيكم جميعا فرصة سعيدة
انشوفكم و انتعرف على هذه الوجيه الطيبة
يا مرحبا
قال بو فواز : و النعم فيك يا بو عبدالله
الحقيقة بعد اذن اخواني .. اتحجي نيابة عن جميع الضيوف الجدد
اللي أول مره تشوفهم و تلتقي فيهم
نحن السعداء و لنا الشرف نلتقي فيكم جميعا و اتعرف عليكم
ام فواز دايم تذكرك و تذكر بومحمد و بوطلال
و باجي الاخوة و الاخوات ربعكم بالخير
قلت له : جزاها الله خير هذا من طيبها الله يبارج فيكم جميعا
الحقيقة انا كان من زمان و دي نجتمع مثل هذا الاجتماع
و نتواصل و الحمد لله تهئأت لنا الظروف وهذا حنا مجتمعين بفضل الله تعالى
و الحمد لله رب العالمين
طبعا كان هناك طاقم خدمة في اليخت قدموا لنا المشروبات الباردة و بعض
المعجنات الخفيفة


​

 

[( القلب الكبير )]

نتابع المشهد الرابع

لما ابتعدنا عن يال البحر وانتصفنا البحر وبدأت المباني المطلة على البحر
تختفي شيئا فشيئا
و انا عيني على ام فواز و ام العيال و باجي الحريم اللي كانوا خايفين
من البحر
انتبهت حق أم فواز و شفتها قاضبة دشداشة بو فواز
وأهو كل اشوي ايوخر إيدها و اهي اترد مرة ثانية تقضب دشداشته
بكل قوة كأنها خايفة ينحاش منها
ام العيال كذلك قاعدة بين اعيالها و كل اشوي اتمد ارقبتها و اطالع البحر
كأنها ادور على شئ
باجي الحريم لاهين مع اعيالهم و ايطالعون البحر مستمتعين بالجو
و سنين التيه قاعدة على سطح اليخت بروحها
زين ما ايطيرها الهوا
نزلت و رحت صوب ام العيال
و قلت لها
ها ام العيال اشفيج ادورين شئ ؟
قالت : لا بس اطالع البحر
قلت لها : أخاف ادورين شئ اسمه الفك المفترس
قالت : ارجوك يا بو عبدالله لا تذكرني خلني ناسية
قلت لها ناسية متأكده ؟
ما اعتقد انج ناسية السالفة
قالت : اشدارك ؟
قلت لها : اعيونج و حركاتج و نبرت صوتج ايقولون انتى مو ناسية
ملاحظة :
( انا اتفقت مع الكابتن قلت له لما ايشوفني ارفع إيدي فوق ينفذ اللي اتفقنا عليه )
طبعا انا رفعت إيدي و عطيت الكابتن
المهم
قلت حق ام العيال بسأل سؤال و ابيج اتجاوبين عليه انتي و ام فواز
و قبل لا أسأل السؤال
طالعت بو فواز و غمزت له بعيني و هو فهم القمندة
لأن ما شاء الله بو فواز امبين عليه ذهين
قلت :
ام فواز احمارة القايلة و ين تطلع بر و إلا بحر و متى تطلع ؟
قالت ام فواز : احمارة القايلة تطلع على البر وحزة الظهر
قلت : ها يام العيال اشرايج كلام ام فواز صحيح ؟
قالت ام العيال : إي صحيح احمارة القايلة تطلع حزة الظهر
قلت : عندج خبر انتي و ام فواز
اكو شئ بحري مثل حمارة القايلة يطلع بالليل و النهار ؟
اطالع بو فواز يتبسم و ده يضحك ولكن لما تلتفت عليه ام فواز يسكت
ايسوي نفسه ساكت
قالت ام العيال : قامت اتبالع ... ها شتقول بوعبدالله
قال بو فواز : إي صج انا سامع اكو شئ بحري مثل احمارة القايلة يطلع بالليل
حق البحرية و اهل الحداق
ام فواز قالت : و اااااي يا حسرتي :باكي: انا شالي خلاني أوافق و اجي معاكم
بسطويسي كان قريب منا و يسمع الحوار بيني و بين ام فواز و ام العيال و بو فواز
طالعته اشوفه ايبالع وجهه محتقن مو طبيعي
قلت له : ها سبع البرمبة اشفيك مو طبيعي ؟
قال : بوعبدالله الكلام عن الحيوان البحري صحيح و إلا جذب ؟
قلت لا صحيح ما قط سمعت عنه ؟
قال : لا .. اشلون لا طلع لنا شنسوي ؟
قلت : احنا و حظنا و إذا طلع لنا بعد شنسوي حالنا حال اللي طلع لهم من قبلنا
ام العيال أهي و أم فواز في حالة ما ينحسدون عليها
يرجفون من الخوف
اشوي يا جماعة الخير
وإلا ذاك الصوت العالي اللي لجنا لج
ياويلي و يلاه ... يا و يلي و يلاه ...
يالربع ألحقوا
هاااه هذي خولة اشفيج عسى ما شر
قالت : شفت شئ طويل و له ذيل هقوتى انه حوت :باكي:
اهني عاد أم فواز قالت : ياويل قلبي و يلاه .. الله ايعدي هاليوم على خير
ام العيال اسمعت خولة اتقول حوت حطت إيدها على راسها
وولا كلمة
اشوي و إلا شئ يصدم اليخت بقولة كلنا حسينا فيه
قلت : الله و اكبر شنو هذا يا كابتن
جاء الكابتن يركض وقال : و الله مش عارف
اشوي و إلا و احد من اعيال أم العيال يقول :
يما يما .. شفت الفك المفترس ... يما الفك المفترس الحقي
ام العيال اسمعت ولدها ايقول الفك المفترس
قامت تبجي و اتصيح يما يما .. انا عايزة ماما و دوني لماما :باكي:
ام فواز تعلقت برقبة بوفواز و اتصيح ارجوكم انا كمان عايزة ماما
ارجوكم ردونا البيت :باكي:
خولة من الخوف اقعدت على حيلها و بنتها نوره و اسعود و لدها حواليها
باجي الحريم
( فوضت امري و ربما و خجل و شتات )
مو عارفين شيسون خايفين بس ماسكين نفسهم كل و حدة حاضنة اعيالها و قاعدة
اشجع و حدة فيهم :إستحسان:
الدر .. الدر ما شاء الله عليها شجاعة و ذكية و افهمت القمندة
بس مثلت دور الخائفة مثلنا
سنين التيه .. مثل ما قلت مو هامه شئ قاعدة على سقف اليخت
وما عندها غير ههههههااااي و هههههههاااي
كلما تسمع
ام فواز تصيح او ام العيال خايفة
و الشباب
( البرنس و بومعاذ و المختصر و مع الله )
هم شكلهم خايفين و مصدومين و بين امصدقين و امجذبين
بقى khalid ahmed و 0utsider
هذيلا هم اذكيا ما شاء الله ما مشت عليهم اللعبة
khalid ahmed لأنه كل نجرة مع بسطويسي حب ايمثل دور الخائف
عشان ايخلي الخوف ايزيد عند بسطويسي
لكن 0utsider لا ..
اهو اللي بط الجبة
بس اشوهانه بطها لما اكلت و انتهت تقريبا
قال : هههههي يا جماعة انتو من صجكم صدقتوا هذه اللعبة اللي لعبها عليكم بوعبدالله
لا يا با ماكو شئ لا فك مفترس ولا احمارة القايلة
جان اتقول خولة : ابك اشلون ماكو شئ و هذا انا شفته بعيوني
شيئ طويل و له ذيل ويحوم حوالينان و ولد ام العيال شافه بعد
صج يا ولد ؟
قال و لد ام العيال : اي خالتى صج انا شفته لا و له اقرون بعد
عاد ولد ام العيال قام أيألف من عنده حجي
جرجور و له اقرون
هذا ثور مو جرجور
اهني عاد انا من شفت بومحمد و بو طلال يضحكون
ما قدرت اتمالك نفسي و ضحكت حيييييل من قلب
و كملها بو فواز بعد قام يضحك
قالت ام العيال : اشفيكم تضحكون اكو شئ ايضحك ؟
حوت كبير في البحر و له اقرون مثل ما قال اولدي حبيبي حوالينا و انتو تضحكون
قالت ام فواز : صحيح ليه تضحكون احر ما فينا ابرد ما عندكم
قلت حق ام فواز و ام العيال و خولة :
انتوا خايفين صج ؟
قالوا : إي عيل شتشوفنا
قلت انتوا خايفين من شنوا ؟
من هذا اللي في البحر ؟

ألتفتوا و راهم و شافوا الجرجور قريب من اليخت
ردوا قاموا ايصارخون و يبجون :باكي:
و الشباب ايناقزون
قلت حق الكابتن :
يا كابتن خلاص OF
تعال انزل و عطني الرمونت
ولما عاطاني الرمونت قلت تعالوا يا ام فواز و انتي يا ام العيال و يا الجميع
هذا الفك المفترس اللي كنوا خايفين منه عباره عن
مجسم اصطناعي يتحرك بالرمونت كنتورل
انتوا جميعا كنتوا معانا في
برنامج الكامرا الخفية
حياكم الله
اهني عاد ام العيال و ام فواز قالوا
يعلك العافية يا بوعبدالله
جذي اتسوي فينا
وألتفت أم فواز على بو فواز و قالت :
بو فواز
انا جايبتك عون صرت لي فرعون
طييييييب احتشوف بعدين
قالت خولة يعلك شقول يا بوعبدالله
صبيت اعظام ارجولنا
ليه و انا اختك ليه هاااااه
قلت لهم
كنت اتغشمر و حبيت اسليكم و أونسكم
قال بسطويسي : أمحق غشمرة انا قلبي بغي يوقف من الخوف و الخرع
الى هنا
انتهى المشهد الرابع ​

 

[كاتب عن الحق]

ماااشاء الله

اشسويت يا بو عبدالله وديت الأعضاء رحلات في المحيطات وسوالف وقصص وهم راقدين في بيوتهم


؟؟؟

 

[رُبـّـمــا]

قرأت رأس الموضوع
وحبيته
بس تكفى اخونا الذهب بوعبدالله
مابي اخم واغسل مواعين
:باكي:













ابي اقعد يم النوخذة وأعد اللولو

 

[( القلب الكبير )]

​

قرأت رأس الموضوع
وحبيته
بس تكفى اخونا الذهب بوعبدالله
مابي اخم واغسل مواعين
:باكي:

ابي اقعد يم النوخذة وأعد اللولو

يا هلا و غلا باختى الغالية @رُبـّـمــا سيدة الشبكة بلا منازع :وردة:
يا مرحبا
حياج الله و الحمد لله على سلامتج :وردة:
الحقيقة
تواجدتج في الشبكة ما عاد نشبع منه
يدوب انشوف اسمج و كم مداخلة
وهب جك بم
ربما نو بدي هير
على كل حال
ابشري
انا لو رادة عليّ ما اخليج تخمين و لا اتغسلين اموعين
لكن في كل مرة اكون خارج الشبكة
الظاهر انتي مثلي
ما اتحبين اتشوفين شئ طايح بطريجج و تمشين عنه
انا هكذا
احب الترتيب و النظافة
عموما كما اسلفت
لا خمام و لا مواعين
انت راح تتواجدين في مكان معززة و مكرمه فيه
بس اقرئ الموضوع و راح تستانسين و ايد ان شاء الله
تحياتي :وردة:
​

 

[رُبـّـمــا]

ممتااااز قرأت الحكاية
وانتظر المشهد الخامس
بس اهم شي ان مشاركتي بالحطة ماي

جنكم ندرون ان معاشي منتف

ولد ام العيال حبيته يوم قال شفت قرون الحوت :قبلة:

يا سلام
خوش جو عيشتنا فيه يا بوعبدالله
عاد صج عندي رغبة اشوف الجميع على الحقيقة
ونكشت هالكشتة الونيسة

لو احنا عنقريز جان الحين قاعدين انحدق بجزيرة بوعبدالله

بس خلونا نكمل الرحلة عالورق هم زين

 

[رُبـّـمــا]

يا هلا و غلا باختى الغالية @رُبـّـمــا سيدة الشبكة بلا منازع :وردة:
يا مرحبا
حياج الله و الحمد لله على سلامتج :وردة:
الحقيقة
تواجدتج في الشبكة ما عاد نشبع منه
يدوب انشوف اسمج و كم مداخلة
وهب جك بم
ربما نو بدي هير
على كل حال
ابشري
انا لو رادة عليّ ما اخليج تخمين و لا اتغسلين اموعين
لكن في كل مرة اكون خارج الشبكة
الظاهر انتي مثلي
ما اتحبين اتشوفين شئ طايح بطريجج و تمشين عنه
انا هكذا
احب الترتيب و النظافة
عموما كما اسلفت
لا خمام و لا مواعين
انت راح تتواجدين في مكان معززة و مكرمه فيه
بس اقرئ الموضوع و راح تستانسين و ايد ان شاء الله
تحياتي :وردة:
​

ظروف والله يا اخونا الطيب

بالنسبة اني مثلك ما احب اشوف شي طايح
عز الله

مرة لقيت بقعة شاي جامدة على الارض بمرر الادارة
جان انادي البورتر يمسحها
وانا ااشر عالبقعة واكلم البورتر والا مار يمي اهم مسئول بالادارة

ابتسم لي ونظرة عيونه تقول اشهالفراشة الذربة
- شدة ع الراء



بانتظار بقية احداث الرحلة

بس يومين ما يكفون نبي تمديد

 

[أفراح الرّوح]

ههههههههههههه
ياحلاااتك ياكويت :قلب:وأهلك واللهجة المزيووونة .. ياسلاام،كل يوم يزيد تعلقي بيكم ،ماشاء الله عليكم،
واااااايد استانست باللي قريتو ،ههههههه،وللحين بضحك ونا اعيد القراءة مرة تانية وتالتة ،
عمّو بو عبد الله ،رغم أنني مافهمت بعض التعابير إلّا أن الفضول يقتلني حتّى تخبرني معنى'النّوخذة'ارجوووك ،
وناا اموووت عالبحر ، له طعم خااص جدّا بالنسبة لي ، أصلا اراه بصفة شبه يومية ثناء روحتي ورجعتي من الدراسة ،
بس ما أحب جذي ، وما أرتاح إلا لما اكون دااخل أعمااقو ..يااي شعور أهبل أخبل ، ذكّرتني بأيام الصيف المثيرة عمّو
صج الدراسة خطفتني وغيبتني عن هذ الرحلة البحرية،بس معليش،نعوضوها بربيعية عن قرييييب ،
ومارح تكون لي حجة أبدْ ،وعسى ماننحرم من أفكارك،كان الاسلوب واايد ممتع ، وذكّرني باستراحة عمّو ياسين،
يلاا اخليكم الحين ، وأردّ ان شاء الله لمّا ينكتب شي يديد،وعساك عالقوّة عمّو ، ونا معاكم بكل خطوة:وااااااااااااااااااااو ياحلاتك يابحر:قلب:

 

[( القلب الكبير )]

قواكم الله أحبتى الكرام
نبدأ بالفصل الثالث و الأخير
و يتكون من عدة مشاهد
احاول اختصر حتى لا تشعروا بالملل
المشهد الأول
عقب فلم الرعب اللي عاشته ام فواز و ام العيال على و جه الخصوص
هدأ الجميع و كنا خلال عرض الفلم قد قطعنا شوطا طويلا في البحر
باجي حوالي ساعة إلا ربع الحقيقة طرات على بالي
الجوهر الثمي و اللؤلؤة المصونة التى لها مكانة اخوية خاصة في قلبي اختي الغالية أم فيصل
@الجمآن :وردة:
لكن سبحان الله العظيم في هذه اللحظة
قالت ام فواز
بوعبدالله يا حسرتي نسيت أقولك شئ
قلت خير ان شاء الله اشفيج ؟
قالت : نسيت أقولك اختنا @الجمآن لما اعرفت بنطلع رحلة
دقت عليّ و قلت برافجكم بس انطروني للساعة 8 و نص
أكددت عليّ و انا نسيت اقولك
وتوها داقة عليّ تقول لي و ينكم
انا عاد تضايقت
و تالي قلت ما عليه أكيد اكو حل
طالعت مني .. مني لمحت طراد صغير و هذا الطراد اشبه ما يكون بقارب النجاة
لكنه سريع مثل الصاروخ :إستحسان:
عاد انا قلت مادام السالفة رواية خياليه خل استغل هذا الخيال
طلبت من الكابتن ايطرش سايق الطراد الى نادي اليخوت بسرعه
قال ليش يا سعادة البيه ؟
قلت : و انا كلم اقولك شغلة اتقولي ليش و تسأل عنها
اختى تنتظر هناك
المهم
قلت حق ام فواز دقي على الجمان وقولي لها الحين يوصلج
سايق مع طراد صغير ابيض امخطط بازرق سماوي و عليه علم مكتوب عليه
:وردة: جزيرة المحبة و السلام :وردة:
اركبي فيه انتى و اعيالج و تعالي
طبعا مثل ما قلت لأن الرحلة خيالية أوصلت الجمان و اعيالها
خلال 5 دقايق
أوصلت الجمان ورحبنا فيها و خذت مكانها
و اهي مستناسة مع اعيالها وقالت :
اخوي الغالي بوعبدالله و الله آسفه جدا إذا تسببت لكم بأي أزعاج
قلت : افا عليج بس انتى اختى و منا و فينا و الرحلة بصراحة
ما تحلى إلا بجمعتنا كلنا :وردة:
لكن انتى الله ايهداج قاطعة صارلج شهرين و زود ما شفناج و لا سمعنا حسج
قالت : غصب و الله و انت اتعرف و الجميع ايعرف مالي غناة عنكم
بس الرحلة هذه الحقيقة ما بغيت اطوفها و فرصة اجتمع مع الجميع
قلت : حياج الله و الساعة المباركة بس
طافج نص عمرج
قالت : شاللي طافنى ؟
قلت : برنامج الكامرا الخفية
بطولة ام فواز و ام العيال و خولة
سوينا فيهم فلم رعب بحق و حقيقي زين ما ماتوا علينا من الخرعة و الخوف
بس الله يستر من الحريم مالهم آمان
أكيد بيخشون بقلوبهم و بريدون لي الصاع صاعين
المهم و انا اخوج حياج الله و الحمد لله لحقتى علينا قبل لا نوصل الجزيرة

بعد اشوق
يات يمي الدر و قالت
بوعبدالله متى نوصل امطولين
قلت لها .. جربنا ... شوفي بدأت الجزيرة تظهر لنا من بعيد



اقتربنا منها شيئا فشيئا و استعد الجميع للنزول
الساعة جريب 10 و عشرين دقيقة وصل اليخت
نزل الأعضاء و عائلاتهم ورا بعض
ما شاء الله تبارك الرحمن الجميع تبدوا عليهم السعادة و النشاط
و اعيالهم ما شاء الله ركض و صيحه يتسابقون منو اللي ينزل أول
كان باستقبالنا أولدي عبدالله و امه و خواته
الحريم راحوا مجلس الحريم
و حنا الرجال جلسنا في مكان خاص فينا انا كنت مهئ هذا المكان


صالة كبيرة مطلة على شاطئ البحر و كذا بالنسبة لصالة النساء


دخلنا و كل و احد أخذ مكانه قلت
اعرفكم على اولدي عبدالله
حبيبي عبدالله شوف و انا ابوك هذا عمك و بو محمد الحساوي
و هذا عمك بو طلال و هذا عمك بو فواز و هالشباب اخوانك
شملان و البرنس و مع الله و بو معاذ و المختصر و الفيلسوف آوت سايدر
وخالد و بسطويسي .. هذا بسطويسي شفته عدل
وبعد هذيلا اخوانك اعيال ام العيال واعيال بو طلال .. الله ايوفق الجميع ان شاء الله
و يبارج في الجميع
قام اولدي عبدالله و رحب فيهم جميعا و شكرهم على تلبية الدعوة
وتمنى لهم أوقات سعيده

نتابع معكم لاحقا إن شاء الله

​

 

[( القلب الكبير )]

المشهد الثاني :
ننتقل الى الجانب الآخر
الى مجلس الحريم
ام عبدالله : يا هلا و يا مرحبا خواتى زارتنا البركة :وردة:



قالت ام فواز :
يا هلا فيج اختى ام عبدالله انا اختج ام فواز
و هذه اختج ام العيال
و اختج فوضت امري واختج ربما واختج خوله ام اسعود
و باجي خواتج و بناتج خجل و غنيمة ( بنت بو محمد الحساوي ) سنين التيه و شتات













قالت ام عبدالله : و النعم و الله فيج و فيهم هذه و الله الساعة المباركة :وردة:
اشوف خواتي و بناتى اللي كنت اسمع عنهم من بوعبدالله
اختى ام العيال كيف حالج حبيبتى عسى ما تعبج البحر يقولون
كنتي خايفة من الفك المفترس صح هالحجي
قالت ام العيال : بصراحة يا ام عبدالله انا اول مره اطلع رحلة بحرية
و كنت خايفة حيل بس لما ركبنا هذا اليخت بصراحة ما حسيت بشئ
لا موج ولا فك مفترس ولا شئ
قالت ربما : اولا انا سعيدة جدا اكون ضمن هذه المجموعة في ضايفة اختى الحبيبة ام عبدالله
و الله حبيتج من قبل لا اشوفج :وردة:
قالت ام عبدالله : حبتج العافية حبيبتى :وردة: انا اسعد و الله
قالت فوضت : انا بعد يا م عبدالله سعيدة و ايد انى اتعرف عليج و اشوفج
بسم الله ما شاء الله الله ايهني بوعبدالله فيج وفي بناتج الله ايحفظهم لج :وردة:
قالت ام عبدالله : حبيتى :وردة: ما عليج زود انا اللي فرحانة و مستانسة فيكم :وردة:
قالت الجمان : حبيبتى ام عبدالله أنا بصراحة من الاسباب اللي خلتنى اشارك بهذه الرحلة
كان و دي اشوفج و اتعرف عليج معزتج من معزة اخوناالعود بوعبدالله
قالت أم عبدالله : حبيبي يا ام فيصل :وردة: الله يجعلنى عند حسن ظنكم فينى ولا يخلني منكم حبيباتى :وردة:
قالت الدر : حبيبتى ام عبدالله :وردة:انا اشكثر سعيدة اليوم بصراحة ما اقدر اعبر عن فرحتى و سعادتى
يكفي اقول اليوم عندي يوم مميز ان التقي باختي ام عبدالله زوجة اخونا الكبير بوعبدالله
و اخواتى في الشبكة اللي اجمعتنا مع بعض :وردة:
قالت ام عبدالله : حبيبتى ام غنام :وردة: انا اللي سعيدة و فرحانة فيكم جميعا الله يبارج فيكم يا رب :وردة:
قالت خولة ام اسعود : انا بعد حالي حال خواتى اللي اسبقوني بالكلام بصراحة ما خلو لي شئ اقوله
كنت مترددة اشارك بهذه الرحلة لكن الحمد لله انى الحين متواجدة بينكم اتعرف عليج يا الغالية ام عبدالله :وردة:
قالت ام عبدالله : و الله ياوخيتى خولة مهما اقول و اعبر عن سعادتى و فرحتى بتواجدكم اليوم :وردة:
ما راح اقدر اوصف شعوري حياكم الله جميعا :وردة:
خجل قالت : حبيبتى ام عبدالله :وردة: انا واخواتى سنين التيه و شتات ما عندنا كلام
نقوله اكثر من اللي قالوه خواتنا كل اللي قالوه يعبر عن مشاعرنا و سعادتنا جميعا
بلقائج يا اختنا الغالية ام عبدالله :وردة:
قالت ام عبدالله : حبيباتى :وردة: كلكم الله ايحفظكم :وردة:
قالت : غنيمة : و انا بعد خالتى ام عبدالله من شفتج دخلتى قلبي من اول مره :وردة:
قالت ام عبدالله : تسلمين حبييتى هذا من طيبج :وردة:
اعرفكم على بناتى : هذي ( ست ابوها ) اكبر اعيالي
وهذي الوسطية ( كيداهم )
و هذه الجعدة ( السنيوره )
قالت سنين التيه : هههههاااي ست ابوها و كيداهم و سنيووووره يا حلو بناتحج و اسماءهم
قالت ام اعبدالله : انتى الاحلى :وردة: لا ازيدج من الشعر بيت
بوعبدالله ساعات ايسمي اولدي عبدالله ( زينهم ) اسماء صعايده
إلا تعالي يا سنين ليه ما جبتي الوالدة معاج
قالت سنين : امي ما اتحب تطلع و تخاف من البحر بعد
قالت ام فواز : جان اقنعتيها يا سنين الله ايهداج بس حالها من حالنا
قالت سنين :هههههههااي ا قنعها انتوا بالغصب اقتنعتوا و يتوا
امي مثلج يا ام فواز تخاااااف من البحر و متأثرة بفلم بس يا بحر ههههااي
قالت ام عبدالله : هَو .. حتى انتِ يا ام فواز كنت خايفة من البحر بسبة فلم بس يا بحر .. صج هالكلام يعنى
و الله على بالي بو عبدالله ايتغشمر
قالت ام فواز : لالالا يا اختى ام عبدالله كنت اتغشمر و هم صدقوا
قالت ام عبدالله :المهم حياكم الله و هذه الساعة المباركة
اليوم خلوا اعيالكم و بناتكم الصغار يلعبون على كيفهم و ياخذون راحتهم
و انتوا حبيباتى خذوا راحتكم المكان مكانكم اعتبروا نفسكم في بيوتكم و حلالكم

هانت يا شباب هانت
راح انتهي من الرواية اليوم
باجي مشهدين و انتهي بحول الله



​