ماذا يحدث فى الاسواق ؟

سليل الجود

عضو مخضرم
انا وحده مالله عطاني حب السوق لكن هو شر لابد منه ...

الدبوس خبري فيه من سنه الف وحطبه .. حذفني حظي العاثر له قبل يومين ...

والا نفسهم الشباب مثل ماهم قبل كم سنه لازالوا يفترون وكل واحد طاق النسفه ...

يعني عيب خلاص عدوا العشرين والثلاثين متى الواحد يحشم نفسه ويحشم سنه !!

طبعاً البنات مايقصرون ... والله يسامح الامهات مدري وشلون يمشون بناتهم بهاللبس يعني معقوله ماتشوف لبسها ومكياجها قبل لاتطلع السوق ..!!!

ايوالله ان السوق شر لا بد منه اختى الفراشه

والدبوس لولا الخياطين اللى فيه والا محد يدشه

وفعلا اثرتى نقطه مهمه

العجوز محتشمه ومتغمغه وما ينشاف منها شى

وبنتها مسويه عرض ازياء وعرض ميك اب

اهنيه الشره على الام

تسلمين على المداخله اختى الفراشه


 

سليل الجود

عضو مخضرم
سليل الجود اذا تبي تعرف منبع الفساد بالديره روح المنطقه الحره وبالذات الحين برمضان

ركز معاي برمضاااااااان بتشوف العجب انا صارلي تقريبا من شهر 1 بحدى القهاوي اللي هناك

كنت اشوف بنات يدشون القهوه مكان العائلات طبعا :) بس اللي حاصل الحين شي غريب

من بعد الساعه 8 القهاوي تنترس من هالبنات العفيفات والجنوس قمت اخاف تغرق المنطقه من

كثر الذنوب طبعا غير اللي يتمشون على البحر وستاربكس بطل توه ...وعينك ما تشوف الا المغازل

والتصفط ...يخرب بيتهم الشيطان ما يركبهم الا برمضان استغفرالله ....

المنطقه الحره انوخذت يالربع ...:confused:

افا يا طلال

اثاريك تروح قهاوى

وانا اقول طلال الى من المسيد للبيت

والله شوف يالغالى

القهاوى خبري فيها سنه 98

ولكن الفساد فى القهاوى امر طبيعى لانه مكان خاص للمدخنين

ويمر عليه العاقل واللى ضاربه فيوزاته

ولكن الاسواق امر ضرورى للعوائل التى تريد التسوق

شاكر مرورك يالشيخ
 

ابوشـهاب

عضو مميز
اي والله مدري اشصاير بالسواقة كل مكان زحمة زحمة
كأن الناس مشايفين خير
المعاش كله طار من اول يوم بداية رمضان ونهاية رمضان العيد
 

سليل الجود

عضو مخضرم
فعلا... الشخص يتردد مئة مرة قبل أن يخرج إلى السوق بسبب هذه الظاهر

و لا ألوم فقط الشباب بهذا الأمر... بل بعض الفتيات في المغازل أدهى و أمر!

و أقولها و بكل ثقة... البنت المحترمة بلباسها و نظراتها و مشيتها و سلوكها... تلقائيا بل مستحيل أحد يقترب منها!

و يقولك مسكينة البنت.. لا بسة عباية و منقبة... بس أي عباية وأي نقاب؟؟؟

نقاب بو خيط... و مطلعة حرة المكياج كله بمنطقة العين.. و العباية مطرزة و مخصرة و مزركشة... و يقولك محتشمة!!!

و الله يا اخوان.. الأسواق في أروربا مليئة بالنساء و الشباب و الذين عليهم من لباس تكشف أكثر مما تستر

لكنهم بالأدب و الإحترام يفوقون بكثيييييير عن أكثرية الشباب و البنات عندنا

و الكل ماشي بحال سبيلة لا خز و لا غمز و لا تحاذف أرقام و لا بلوتوث و لا ... إلخ!

------------

بإذن الله سأقترح قريبا على أحد الأعضاء الكرام لطرح موضوع إنشاء هيئة رقابية في الأسواق... و المرافق السياحية...

تحياتي


ان شاء الله ينجح مشروعك اخوى الكريم

ويكون لدينا نوع من الشرطه الاجتماعيه

تجوب الاسواق وتعاقب كل من يسىء الى الذوق العام

بس الخوف من الليبرالين يقولون انتوا تقيدون حريه الشباب !!
 

سليل الجود

عضو مخضرم
الكويت كلها فساد في فساد...!
والله اليوم اندهشت مريت صوب سوق السالمية صوب الفنار والعصير ولا هالشرطة ما يوقفون الا البنات!...والمشكلة ان بعض البنات يوقفون بممنوع الوقوف ويجيها الضابط او الشرطي ويسولف ويضحك ويوم جيت انا وصفطت ورا البنت عشان اطلب من نفس المطعم...جاني الضابط (بوجه ودر وراحت ابتسامته) ويقولي حرّك سيارتك هني ممنوع الوقوف!!!
صراحة شي يقهر....يعني يالقـــو...........د.............................البنت تخليها توقف بممنوع الوقوف على كيفها وتغازلها وترقمها وتقعد ساعة تسولف معاها....ولما انا اجي او يجي غيري من اصحاب الشنبات تجي تطلع عضلاتك وتستخدم سلطتك علينا!!....اللي يبط الجبد انه يستخدم سلطته عشان يغازل.....يا جماعة الكل ملاحظ ان كل ما تشوف دورية موقفة سيارة تلقى اللي داخلها بنية قطعة!!! شهالمسخرة والله انها مسخرة...
نطرت شوي....ولا الاحظ ان الضابط دخّل راسه من دريشة سيارة البنت وينكت معاها والظاهر (قاعد يلمسها من فخوذها او شي)....
وبعدين يقولون وين هيبتنا!!!! شوفوا اشكالكم انتوا اول وشوفوا تصرفاتكم الوصخة وبعدين تعالوا تحجوا
صراحة....ياخي تحس انهم جهال ومو تكانة الله
بالله وين هالبلد تعتمد على هالاشكال


نعم اخوى الحقانى كلامك سليم

هالنوعيه التافهه من رجال عش الدبابير

فرق عن رجال الداخليه فى الثمانينات

قبل رجوله واخلاق وامانه واخلاص وحرص على البلد

الحين مياعه وقصات ومخصّر ومسوى تنظيف بشره

وبدييكر ومنكير وهالعطر

اذا كان هؤلاء هم الموكل بهم حفظ الامن والحفاظ على اعراض الناس

اين نذهب؟
 

سليل الجود

عضو مخضرم
انتشرت ظاهرة المعاكسات العلنية وبدون خجل ليس في الاسواق فقط بل في كل مكان في البلد

و الذي يتحمل هذا الأمر هو رب الأسرة الذي ترك الحبل على الغارب ..

ولسا اللي يعيش يشوف .

نعم رب الاسره يتحمل ولكن ليست المسئوليه كامله تقع على عاتقه

فضعف هيبه الدوله المتمثله بوزاره الداخليه تتحمل الجزء الاكبر

لانها المسئوله عن حفظ الامن وحفظ النظام داخل البلد
 

سليل الجود

عضو مخضرم
إن كانت أخلاق و سلوكيات أبنائكم يا عرب لا تستقيم إلا بالعصا و الخيزرانة و "الدّرة" فهنيئاً لكم حالة التخلف و الجهل التي تعيشونها الآن ..

يكون مونسنا يعني ، تتسوق بأمن و أمان يقول الأخ .. سيارة فولفو مو مطاوعة ..

رجاءاً مرة ثانية اذا بغيت تتخيل تخيل و أنت ساكت ، لا تشاركنا بتخيلاتك اللي اتييب الحارج ..

شسمك أنت شسمك ؟

اقول يا ولد سليمزى شوى شوى علينا

مادري عنك عربى والا نمساوى حضرتك

مشكله اللى فاقد الهويه ومع هذا يبى يعطى رأى فى مسأله

يلا بابا اشرب عصير سن كويك عشان يروح الحارج

وروح نام


 

سليل الجود

عضو مخضرم
اي والله مدري اشصاير بالسواقة كل مكان زحمة زحمة
كأن الناس مشايفين خير
المعاش كله طار من اول يوم بداية رمضان ونهاية رمضان العيد


الزحمه والله يا اخ بو شهاب

تتحمل مسئوليتها الداخليه وضباطها المرتشين

انت طالع باشكال اللى يسوقون

اسهل رخصه قياده بالعالم يحصلونها بالكويت

ليسن ب 150 دينار وسياره قسطها 40 دينار

وتفضل شوارع الكويت ترحب بك

والضحيه اهو الشعب الكويتى

بالنسبه للمعاش

ابشر كلها يومين وينزل المعاش
 

ستانفورد بينيه

عضو بلاتيني
الحل لمثل هذا النوع من المعاكسات هو بإتباع طريقة معالجة إمارة دبي لمثل هذا النوع :

اولاً : عدم تواجد الشرطه الرسميه داخل الاسواق و استبدالهم بالشرطه المدنيه " المباحث "

ثانياً : أي شاب تثبت معاكسته لأي فتاة يتم القبض عليه من قبل " المباحث " و تصويره مع إرفاق اسمه الثلاثي و نشره في الجريده الرسميه لعدد ثاني يوم مباشره لكي لايتدخل في الموضوع لاسفير ولا غفير.

هذا الحل جعل اسواق دبي على كثرة السافرات فيها لاتجد من يتحرش فيهم أو يعاكسهم بالإجبار و جعل الشباب الاماراتي المعاكس يتوجه للمعاكسه في الامارات الاخرى خشية الفضيحه و التشهير !!
 

سليل الجود

عضو مخضرم
الحل لمثل هذا النوع من المعاكسات هو بإتباع طريقة معالجة إمارة دبي لمثل هذا النوع :

اولاً : عدم تواجد الشرطه الرسميه داخل الاسواق و استبدالهم بالشرطه المدنيه " المباحث "

ثانياً : أي شاب تثبت معاكسته لأي فتاة يتم القبض عليه من قبل " المباحث " و تصويره مع إرفاق اسمه الثلاثي و نشره في الجريده الرسميه لعدد ثاني يوم مباشره لكي لايتدخل في الموضوع لاسفير ولا غفير.

هذا الحل جعل اسواق دبي على كثرة السافرات فيها لاتجد من يتحرش فيهم أو يعاكسهم بالإجبار و جعل الشباب الاماراتي المعاكس يتوجه للمعاكسه في الامارات الاخرى خشية الفضيحه و التشهير !!

اخوى ستانفورد

تتوقع احد بالكويت يتجرأ انه يقترح هالاقتراح فضلا عن تنفيذه

والله ياكلونه هالتجار واعضاء مجلس الامه

ويقولون له : نعم نعم نعم هذا اللى ناقص تفضحون عيال العوايل

وعيال القبايل

الفرق بين الكويت ودبى

ان دبى فيها شخص واحد وهو صاحب قرار يخطط وينفذ

والكويت فيها الف صاحب قرار وكل قرار يرقع القرار اللى قبله

لين صرنا ما نترقع

 
أعلى