الجدول الصيفي للابناء .. مقترحات

[الناظر]

السلام عليكم

بما ان الصيف على الابواب

اللي يقرا على باله الثلج للحين ماذاب في وسط الدائري السادس

على العموم نرجع حق محور حديثنا

ماهي افضل الاماكن في الصيف الواحد يدخل عياله عندهم طبعا دون 6 سنوات

اماكن حلوه وثقه في نفس الوقت ... تفيد الابناء سواء من الناحيه الذهنيه او البدنيه

وياليت تكون هذه الاماكن عن تجربة شخصيه .. يعني صارت لعيالكم مو لكم

اتمنى يكون هذا الموضوع مرجع لكل شخص يحاول يدخل عياله في الصيف ... منها نتبادل

خبرات ومنها نعرف السلبيات والايجابيات لكل تجربه



ودمتم في حفظ الباري عزوجل :وردة:

 

[الناظر]

احد الشباب ادخل ابناءه في احد النوادي قسم الكراتيه

لكن مااشوفها فكره جيده لمن هم دون السادسه .. اولا الاطفال يصيرون عدوانيين اكثر من اللازم ... الرياضه هذه لا تصلح لهم في هذا السن اطلاقا .. الا اذا تبيهم يفنقرون عيال الفريج شي ثاني هذا ... مايقدرون يتقنون الرياضه هذه لانها كبيره عليهم وصعبه وتتطلب تركيز قوي وهو غير متوفر لهذا السن ... اخر شي البيت يصير عندك ياااااااا يوووووووووو واللي يحب النبي يضرب

 

[الناظر]

محد شارك برد .. مو مشكله يا الاعضاء عزابيه وهذا واضح او انهم مطنشين عيالهم وهذا اوضح

على العموم بحط بعض التجارب لعل يجي مرحوم والدين يدعيلنا بظهر الغيب

هناك دورات للدكتور طارق سويدان عن فن القياده وهي خاصه للذكور فقط

وهذه الدورات تعلم الولد وهو صغير كيف يكون قائد ويتحمل مسؤولياته وكيف ينجح بها

 

[الناظر]

حلقات الذكر وتحفيظ القران في المساجد وغيرها من اهم الجداول الصيفيه التي ينتفع بها الابناء في هذه الفتره

ولله الحمد فهي منتشره في جميع المحافظات واغلب المناطق

 

[نمشة قلبها ابيض]

أنا أضم صوتي وياك ,

بس الي عندي عمره عشرة سنين ,

وتفكيره تفكير بو اربع سنين << اسم الله عليه

أبي مكان ثقة ثقة ثقة , أبيه يجيني مثل ما وديته

انتوا عارفين ان كل تجمع للأطفال , يجمع بيئات عديدة ,

يعني مو معقولة أزرع وأربي فيه طول هالسنين , يجيني ورع من ذا الورعان يعلمه جم كلمة ما يعرفها

والا سوالف وخرابيط!

ويهد كل الي بنيته بدقايق!

نبي مكان فيه النخبة من الأطفال << لحد يلومني

لا تقولون لي دكتور الثويني؟ لأنه مايستقبل 14 سنة فما فوق

وبمجال محدود .



ساعدونا الله يخليكم​

 

[الناظر]

عندج حلقات تحفيظ القران ماكو غيرها ... وهي تنشط بالصيف بشكل كبير

شوفي اقرب وحده لبيتكم فهي مناسبه جدا لهذا السن ...

وعسى الله يصلح ولدج ويجعله قرة عين امه

 

[@Noura@]

حلقات الذكر وتحفيظ القران في المساجد وغيرها من اهم الجداول الصيفيه التي ينتفع بها الابناء في هذه الفتره

ولله الحمد فهي منتشره في جميع المحافظات واغلب المناطق

فعلا حلقات الذكر هي أفضل نقطة في جدولك الصيفي

كنت أودي عيالي مسجد البسام في الجهراء ..والظاهر إن شاء الله السنة بعادود نفس النشاط

شكرا لك

 

[alq80]

كان بودي اساعدك

لكن أولادي يحبذون مرافتنا بالسفر

وينتظرون الصيف كثيرا .....