خيمة بـــــــــدو
ليه المسـاء عـوق الشقـاوي وطبّـه
وليه الهبـوب تصحي القلب لا بـات
وليه القـمر يدعي جريـح المحبّـه ؟
ويقول له يا هيه .. ما فات .. ما مـات
جرحك ظهر لو قلت لـ الوجـه خبّـه
ولـ الحزن في ضحكك رسوم وعلامات
وليه المطر بـ الذات ريحه .. وصبّـه
كنّه رسولٍ بيـن الأحبـاب بـ الذات ؟
أشتــاق فيـه لـ شوفتـك وأتنـبّـه
لـلي نسيته مـن مواقـف ونظـرات
لا أستـانس الخافـق ذكر مـن يحبّـه
ورجع يراجـع في الوناسات مـا فات
يا مرتـع القلـب الحـزيـن ومربّـه
يزيـن بك مثـل الذهب صدر الأبيـات
هيهات ينسى القلـب شخـص ٍ لعبّـه
وهيات يدلـه خاطـري منـك هيهـات
سبّك مديـح ومـدح غيـرك مسبّـه
تقول وأذنـي صوتها تقـول لـك هـات
ونـبع الغلا عنـدك وعندي مصبّـه
ومن الولا .. في خافـقي لك .. ولايـات
وطيفك حطب عيني .. وعيني مشبّـه
والشوق بـردٍ ما انقطع لو لـ لحظـات
ومكانـك الصدر ولـك القلـب شبّـه
بين الضـلوع اللـي فردهـا التنهـات
ولك بيـرقٍ في القلـب حبـك يهبّـه
شـامخ ولا هزّه مـن العـذل غـارات
محبتـك في الوقـت ذا مـا تشـبّـه
إلا بـ خيمـة بـدو بيـن العـمـارات
أن شفـتني ضايـق وأهوجـس وأسبّـه
أخاف غدر الوقت .. والوقـت دورات
لا تحـسب أن دمـعي نـزل دون سبّـه
أبكي من الفـرقا وهي ما بعـد جـات
الـيـوم كــل أمورنا .. مستتـبّـه
وبكره ما ندري وش مـعه من مسـرّات
أربّ قلبـك مثــل قلـبـي أربّــه
مـا يخـلفه كـثر العـذل والمسافـات
