شادي الخليج
عضو مميز
الشكر لله يا ولد عمي خالد4 ورجائي ثم رجائي إن تدعو للشيخ جابر ولي .. هذا أعظم معروف وأعظم شكر تقدمه لي .. ولك مني اكون معك اول بأول لين توصلك اول شحنه وتعرف كيفية الشراء من المواقع بإذن الله .. ولا ابي إلا مثل ماقلت دعوة صادقة بجوف الليل لأبومبارك
شوف ولد عمي .. اول شيء تروح لأقرب بنك تتعامل معاه ، ولنفترض الأهلي ، تقول لهم ابي بطاقة للشراء عن طريق الإنترنت ، يعطونك البطاقة ، اول شيء تسويه تعمل تحديثات لجهازك وبرامج حماية ومكافحة ملفات التجسس ، وإذا تنظف الجهاز ، تتوكل على الله وتدش لمواقع الشراء العالمية .. مثل amazon.com ، تفج لك حساب زي طريقة المنتديات تقريباً بس الفرق إنك راح تسجل فيه معلومات إسمك وعنوان البطاقة ( وعنوانك بأمريكا اللي عطوك ارامكس ) ويوصلك التفعيل على بريدك الإلكتروني .. بسم الله تروح وتتسوق من امازون وتدفع اللي تبيه ببطاقتك البنكية .. من توصلهم الفلوس بيشحنون لك البضاعة وبيرسلون لك رقم تتبع الشحنة علشان تتابعها وتشوف وين وصلت بأمريكا ، ليما توصل صندوقك بآرامكس ، عقبها تدش موقع آرامكس وتفج بريدك وتشوف الشحنات اللي وصلتك وبيصرفون لك رقم بولصية شحن ثاني غير الأولاني مال موقع امازون .. تابع هالرقم ليما تعرف انها وصلت الكويت وزهب فليساتك للدفع
فيه مواقع امريكية مزادات واشهرها ebaY .. هذا طبعاً لازم تربط بطاقتك البنكية مع موقع امريكي إسمه paypal تدش الباي بال وتسجل رقم بطاقتك وتسجل اكاونت عندهم زي المنتديات وتنتظر رسالة التفعيل وهالرسالة تحصل عليها بكشف حساب البنك او تتصل عليهم ويملونك رقم تفعيل بطاقتك ، ارجع لموقع paypal هذا الموقع اليهودي فيه ميزة إسلامية رائعة ( رغم انهم يهود لكنهم صاروا اجود مننا ) .. اذا عجبك شيء بموقع ebay تدفع للبايع اللي يكون مواطن امريكي او آسيوي او كندي او بريطاني فلوس عن طريق موقع paypal ، وباي بال يقولون للبايع إشحن البضاعة خلاص فلوسك موجودة عندنا ( ولا راح يسلمونها له إلا بعد 45 يوم يعني شهر ونصف ) ليما يتطمنون إن الشحنة وصلتك وانها زي ما ذكرها البايع ومافيها عيوب .. ولو صارت خلاف اللي صار ترفع عليه قضية وتسترد كل فلوسك والبضاعه خلها عندك
:إستحسان: مو ربعنا طايحين ( البضاعة المباعة لا ترد ولا تستبدل ) لكن دير بالك من الصينيين ( اللي هم نسخة من العرب ) لا تشتري منه لو يجيب لك رولز رويس فانتوم موديل 2010 بودي لونين وبـ 1000 دينار لا تشتري منه .. تراهم مقاصيص وزقمبيه يعرض لك بضاعة وهمية .. وإذا دفعت الفلوس قام وسكر حسابه وإنحاش لكن paypal يصيدونه ويرجعون فلوسك .. وبعضهم يعطيك رقم بوليصة وهمي ، وبعضهم يماطل ليما تخلص مهلة الـ 45 يوم من باي بال ويستلم الفلوس وينحاش .. فإبعد عنهم بعد الأرض عن زحل انا يامحاجيك رافع 11 قضية على هالصينيين ، ويالله يالله إستلمت فلوسي وبعضها والله إنخصم منها لإن الباي بال كانوا محايدين ومايدرون من يصدقون .. انا الشاهد الله ماوصلني شي ، وهو يقول انا شحنتها وبليز قف مي ماي موني .. فلذلك ( بضاعة تشتريها من الصين .. إقبض من دبش )
يالله عساك تروح لهم هناك وعساك تسلم من شرهم .. خلك ياولد عمي ع اليهود وربعهم بأمريكا .. من جذيه حكموا العالم ، بقوة القانون وحماية الحقوق .. الله يخلف علينا سليحط
اعذرني ع التحلطم ، خبرك ما نيوز عنه ، فيتامين تحلطم
.. اتمنى تكون إجابتي واضحة .. أي سؤال خذ راحتك انا هني مابي إلا دعواتك
