نيووو ستايل
عضو فعال
الدراسه بالخارج موضوع يمس اغلب المواطنين لان اعداد الطلبه لايستهان فيهم
وجامعة الكويت ما تتحمل اعداد الطلبه اللي يتخرجون كل سنه لان لها حد معين
ومافي غيرها جامعه حكوميه والجامعات الخاصه مبالغ جدا في رسومها الدراسيه
يعني امالك الا الخارج وهالموضوع عند التعليم العالي الله يعينكم
يعني عادي تدرس بجامعه وعلى اخر سنه يلغون الجامعه واللي فيها وماراح نعترف بشهادته
ويقولون هذا تطبيق القانون زين انا الحين بدرس بجامعه شنو الضمان اللي يخليني ادرس وما يصير فيني مثل ماصار بالفلبين
اخواني موضوع الفلبين اخذ اكبر من حجمه اعلاميا
وضخمه الاعلام بشكل رهيب والسبب الله يعلمه
وانا من المتضررين من هالقرار الظالم والتعليم العالي فاشل بكل المقاييس
واي واحد يسال نفسه ليش بس الفلبين باثر رجعي
وقرار الوزيره لمصلحتها وتصفية حسابات على حساب الاف الطلبه
وبعد قرار ايقاف الجامعه وانا اراجع التعليم العالي اسبوعيا وكل مره الرد يكون للحين ماصار شي
يعني فوق انهم موفقن الطلبه معلقينهم
وكل ما امرهم يقولون في لجنه تدرس الموضوع يعني لجنه تدرس موضوع اربع شهور
تسالهم منو اعضاء اللجنه يقولون للحين ما شكلوا اللجنه يعني اربع شهور شيسون
وبعدين شكلوا اللجنه وكلمت رئيسه اللجنه وقالت مستحيل ترد الفلبين
هذي جامعات -خمبقه- قلت دام تدرون انها جذي ليش مبطلينها بالاساس
طبعا ماكو جواب مقنع ولكن شنسوي حكم القوي على الضعيف بداعي الاصلاح
والاصلاح كان على ايد الوزيره السابقه نوريه الصبيح بالغاء الجامعات
باخر ايام وزارتها بعد ما سمعت انه فيه تشكيل وزاري جديد وما استدعوها
عرفت انها خارج الحسبه فلازم تصفي حسابها باخر اربع ايام من الوزاره
هذا الاصلاح اللي بطول فترتها الوزاريه ما همها الا باخر ايامها
واي واحد يحسبها بعقله ليش باخر ايامها سوت هالشي!!!!
فانا قلت موضوعهم مطول خلني الحق على نفسي واغير الجامعه
سألت عن جامعات مصر قالوا في جامعة مصر للعلوم والتكنلوجيا وانا اعرف فيها كذا طالب
واغلبهم مو ناجح لانها صعبه ودراسه بانتظام
امرنا لله مالنا غير هالجامعه
التعليم العالي عطاني الطلبات وقال خلص الطلبات وروح لمصر وسجل
لان نظام التعليم العالي ما يسجل الا شهر 9
بس يعني جيب قبولك ونفتح لك ملف
خلصت كل الاوراق وطرت لمصر عشان اخذ ورقة عدم ممانعه من الملحق الثقافي اللي بسفارة الكويت بالقاهره
رحت للملحقه الثقافيه ابي الورقه تقول الجامعه موقفينها
شلون موقفينها وانا قبل لا اطير معترف فيها وماعليها كلام قالت الجامعه فيها مشاكل
وانت شمعنا تبي هالجامعه في جامعة اكتوبر سجل فيها اذا تبي الدراسه
وقبلك ردينا اكثر من واحد يعني مو بس انت -وتفتخر بالشي هذا-
وطلعت جامعة اكتوبر دراستها بالانجليزي ورسوم الدراسه نار
شلون التعليم العالي يقول روح مصر جيب القبول ونفتح لك ملف
والملحق الثقافي مسكر الجامعه يعني مافي تعاون بينهم واللي يتوهق الطلب
ولو تروح الحين وتسال عن الجامعات المعترف فيها بمصر تلقى اسم جامعة مصر موجود
يعني منو المستفيد من هالشي
واذا التعليم العالي يسكر جامعة عشان الطلبه زادوا فيها وينطرهم يقلون عشان يفتحونها
راح تعرفون عقلية تعليمنا العالي اللي ضيعنا
والملحق الثقافي اللي يلغي جامعات على راحته بدون لا يبلغ التعليم العالي
وانا موجود بالسفاره لقيت واحد يدرس طب ثلاث سنين ماخذ تفرغ دراسي
بعد ثلاث سنين طلبوه الملحق الثقافي يقولون انت من متى تدرس اسمك مو موجود عندنا
وصارت له مشاكل وعلى كلامه ان اوراقه كلها سليمه وفاتح ملف وراح للسفاره قبل لايدرس
بس يجون بكل برودة اعصاب ويقولون اسمك مو عندنا واحتمال اذا ما لقوا اوراقه راح يطالبونه بالمعاش اللي يمشي له لانه طالع تفرغ دراسي
وهذا يوم واحد راجعت السفاره لقيت هالمشكله فما بالك لو تروح كل يوم شنو راح تلقى؟؟؟
وهذا انا بالقاهره روحتي كلها على الفاضي
والتعليم العالي ضيعني مرتين مره بالفلبين والحين بمصر
واللي ايده بالنار مو مثل اللي ايده بالماي
واغلب الناس يقولون جامعات تجاريه ليش تحاسبون الطالب وما تحاسبون الوزاره اللي فاتحه هالجامعات
واخر ماتفكر فيه الطالب
بس ما اقول الله يعينا ويسهل علينا