والله ماني بسهل دخلت على مكتب الوزير بدون واسطة

[بدوي واقعي]

بسم الله الرحمن الرحيم​

أثاري السالفة سهالات​

وقدرت أدخل على الوزير بكل بساطة وسهولة​

رحت أنا وأخي لمعاملة في إحدى الوزارات في منطقة الوزارات ​

المعاملة تعرضنا فيه لظلم كبير​

المجال ليس مجال ذكر المأساة​

ولكن نقول​

دخلنا لمبنى الوزارة​

على مكتب موظف وقام بتحويلنا على موظف ثاني​

دخلنا على الثاني قال المعاملة صعبة بس​

شوفوا فلان يمكن يجد لكم حل لمشكلتكم​

دخلنا على الثالث قال روحوا لمسؤول القسم​

مسؤول القسم باجازة​

رحنا للي فوقه​

مدير قسمهم​

تحته كم موظف​

طبعاً​

المدير​

قصة قصة​

تقدر تقول​

وزير صغير ​

عايش في عالم ثاني​

يطالعك بطرف عين​

والغترة الهدد​

شعليه من قده

؟؟؟

​

وشغلته بس يوقع​

وكل واحد من هالنمونة​

عنده كم سكرتيرة كويتية​

تطيب له المكتب​

وتطلب له الشاي والقهوة​

وتجيب له الأوراق يوقعها​

وهالابتسامة الحلوة على هالصبح​

وووو​

وآخر شيء ​

بصوت ناعم​

أبو محمد تامر على شيء​

ويقولون ليش المدراء يخلون السكرتير أنثى​

؟؟؟​

وأنا متأكد هالسكرتيرة في بيت زوجها ما تسوي كل هالشغل إللي تسويه عند مديرها ومسؤولها​

البيت كل شيء فيه على الخدامة​

إيه تعبانه من الشغل والدوام​

؟؟؟​

عند أبو محمد​

!!!​

المهم​

قالنا المعاملة ما تمشي​

قلت :-

ليش يالغالي​

هذا ظلم​

قلت يمكن قاعدة عبد ( رب ) الحسين عبد الرضا في درب الزلق ​

تمشي​

!!​

قلنا له​

هذا حلال أيتام​

ظلم هذا ظلم​

ما يصير​

لفها معاه يمين​

ويسار​

ما نفع مع هالمدير شيء​

لأني مو من ربعهم​

وإلا غيري نفس المشكلة​

ومشت​

؟؟؟​

!!​

طلعنا من هالمدير​

بخفي حنين​

واحنا بننزل من المصعد​

لقيته ثلاث طوابق​

غير الأرضي​

؟؟؟​

الثالث مكتوب عليه مكتب الوزير​

قلت لأخوي شرايك​

نصعد للوزير​

؟؟؟​

قال من صجك

!!​

قلت أمش​

طلع المصعد ما يودي للثالث​

عند الثاني يوقف​

؟؟​

دخلنا الثاني​

لقينا لوحة مكتوب عليها مكتب الوزير ​

؟؟؟​

توجهنا لها​

دخلنا من باب غرفة شكبرها​

فيها أربع حريم​

؟؟؟​

قلت بكل قوة​

وين مكتب الوزير​

وكأني أقرا ما في عيونهن من كلام​

؟؟​

منو هذا إللي بكل قوة يطلب مكتب الوزير​

هن ودهن يطردوني​

بس خايفين لا أكون واصل ​

حتى ما وجهوا لي السؤال المعروف
​

عندك موعد​

؟؟​

قالوا المكتب

(( مناك ))​

في قلبي ​

قلت والله مشت معاي​

رحت للباب ثاني​

دخلت منه إلا باب غرفة أكبر​

وريحة البخور تضرب في الرأس​

وفيه موظفتين​

قلت بنفس القوة​

وين مكتب الوزير​

؟؟؟​

قالت بواحدة وبدلاخة ​

هاه​

!!​

قلت بقوة

مكتب الوزير وينه​

؟؟؟​

!!!​

قالت وبدون شعور


منيه​

؟؟؟​

!!!​

يا سلام​

الوضع ممتاز​

والسالفة سهالات​

ليش هالعالم يكذبون ويقولون ماتقدر تدخل على الوزير​

؟؟؟​

دخلنا من باب ثالث​

وغرفة ياكبرها كبراه
​

وفيها مكتب كبير و بعيد ​

والله تمشي فوق العشرين متر لين توصل للمكتب​

يوم قربت منه​

قلت لأخوي من الخرعة​

هذا الوزير​

؟؟؟؟​

قال ​

لأ​

وأطالع إلا باب كبير بجنب هالرجل مكتوب عليه مكتب الوزير​

توجهت له​

قال هالرجل إللي جالس على المكتب​

لحظة لحظة ​

وين يالغالي

؟؟​

قلت الوزير​

قال ب:-

كل لطف​

استريح استريح
​

قلت :-​

ها

مدري ليش دلخت

؟؟

​

قال :-​

أجلس ​

قلت :-​

طيب وجلست​

قال:-

آمر شتبي بالوزير​

قلت عندي موضوع​

قال شنو قوله​

قلت ​

الموضوع كذا وكذا​

إلا الرجل قال ما تمشي​

قلت خلني آكله بالصراخ والقوة
:-​

حرام ظلم​

هذا حلال أيتام​

رد علي بقوة​

ياحبيبي ما تمشي​

قلت طيب خلني أدخل على الوزير​

أنا مواطن ومن حقي مقابلة الوزير​

قال وهو يبتسم ما يصير تدخل​

فوضى ​

يوم شفت القوة ما تنفع معاه​

قلت :- يالغالي واللي يرحم والديك خلنا ندخل هذا الباب ماله​

قال:-

ما يصير​

بس إنزل تحت​

تلقى بنات في خدمة المواطن سجل طلب مقابلة وزير والموضوع​

وينسوق لك​

قلت هذا الحل برأيك

؟؟

​

قال :-

إيه​

قلت يالحبيب تكفى ضبطها لنا

​

قال بنفس​

إيه يصير خير روح تحت الطابق الأرضي وأطلب موعد​

قلت يعطيك العافية​

وطلعت أنا في نفسي أقول​

أخ لو إني مدرعم على الوزير مو أحسن​

غلطتي وقفت عن آخر واحد​

والظاهر الحريم دقوا عليه ​

قالوا له واحد داخل بقوة ويقول​

وين الوزير​

وما أمداني وصلت لمكتبه إلا عنده خبر​

؟؟؟​

ورحت وطلبت موعد مع الوزير​

وهذا إحنا لنا سنة​

ماشفناه​

؟؟؟​

وننتظر الموعد

والله كريم

​

شفتوا شلون الدخول على الوزير سهل جداً​

!!

​

 

[سلطانة]

ممكن سؤال؟؟

 

[افتخر فانت مطيري]

والله أنك فحل أحسن من اللي يدقون ويتبجبجون عند القنوات بس اخ لو مكمل أنت فيها روح باجر وسو نفس الطريقة وأخذ سايقكم عشان يشيل أوراق المعامله

 

[عبدالله فيروز]

ههههههههه شي عجيب يا اخونا​

أحلى شي و انت تقول لأخوك من الخرعة هذا الوزير ؟​

 

[YMDYee]

ههههههه عبالي صج دشيت عالوزير

عالعموم الي عجبني بالموضوع اسم عبد رب الحسين عبدالرضا ههههه

من وين جبت رب هو اسمه من غير رب عابد الحسين عالطول استغفر الله

وتشكراتي لك ههههه

 

[أكتواري]

الله يعينك ويعينا والمضحك انه قبل لايكون وزير كان مواطن يصف بالخباز معانا ويتذمر مثلنا وعنده قرض ودشداشته معلجه وحلم حياته يصير رئيس قسم وجاه تلفون بعد ان رفض رجالات الدوله هذا المنصب لاسباب كلنا نعرفها وبعد الحوسه رشحه نسيب اوصديق واتصلو عليه بالليل وقالو تعال صير وزير وعاش الدور وبرستيج وبخور مساكين ربعنا لوبديره ثانيه حتى حناطير مايقضبونهم

 

[ذيب الظفير]

يا أخي جان قايلهم جايكم من طرف ذيب الظفير .........

وفاك عمرك والمعاملة ماشية وامورك زي اللوز .........

بس تدري شلون ثاني مرة اذا بغيت تدخل وما قدرت

قول لسكرتيرة الوزير ....... عندي ممسك على بعض الاعضاء اللي مشرشحينك ........وادعيلي ​

 

[سكر خفيف]

وان دخلت علي الوزير شنو ظنك راح يقولك ؟
نفس الديباجه بيقولك القانون عليك وعلي الجميع

 

[فلته]

بصراحه قصتك حلوه وفيها اثاره وتصلح قصه بطاش ما طاش 0 بس لو لابس بشت او عمامه جان ماردوك

 

[فارس نجد]

المعامله ماراح تمشي

لان الوزير راح يتغير ويقولون لك

اطلب مقابله مره ثاانيه

ومره ثالثه ورابعه

بس شوف لك عضوا بصام وابشر راح تخلص المقابله

​

 

[عساس عوهه]

بسم الله الرحمن الرحيم


والله ,,,,,, وصلت مكتب الوزير ,,,,,, مبروك مبروك

انا صار لي سنتين يادوب وصلت مطبخ الوكيل هاليومين


باقي 4 سنوات واوصل مكتب الوزير انشاء الله

اسلوبك جميل يابدوي ياواقعي :وردة:​

 

[حمد-الراشد]

أنا حسبالي دخلت بسهوله طلعت مادشيت ، انشاالله ربك يرفع الظلم عنك ، حاول تقدم شكوتك بجريده الراي

 

[بو هــــلال]

اخوي بدوي دامك وصلت لاخر باب .... خلاص كمل .... سو فلم لين يطلع الوزير

حسافه عقب كل هالمشوار ما توصل اخ بس

 

[bo-5aled]

هاردلك وحاول مره اخرى .. !​

 

[الاسكندر]

قلت يمكن قاعدة عبد ( رب ) الحسين عبد الرضا في درب الزلق ​

تمشي​

!!​

أيا البدوي زعلت إنه يكون عبد الحسين ورضيت إنه يكون عبد الرضا اللهم لاتعبدنا الا لك ...

قلم يريح .. تسلسل عجيب ... خفة دم أحلى من الفيمتو .. أنت موهبة والله يابدوي واقعي ..

موضوعك التحفة هذا حكاية ... واخلاقك وكلماتك العفيفة في التعامل مع واقع حقير حكاية أخرى تروى لكل متبعر تأبى أخلاقه الا الكلمات المجموعة من مردم النفايات..

سجل أعجابي يابدوي واقعي ولك 1000:وردة:وإلى الامام أيها المبدع وإن شاء تدخل على رئيس الوزراء...

 

[بدوي واقعي]

سلطانة

نعم​

أفتخر انت مطيري


حسافة لو إني مدرعم عليه على طول​

عبدالله فيروز


إي والله تخرعت​

عبالي

الوزير مكتب كبير حيل ومافيه إلا واحد قلت بس هذا هو​

؟؟؟​

اكتواربي


والله صاج عاد هذا الوزير خابره أيام أول بداية التسعينات يفرفر عند عماير المطلقات بضاحية صباح السالم منتصف اليوله كنا إحنا أبو طعش ​

نلعب كورة في البراحة ​

ذيب الظفير

فاتتني أقول له إني من طرفك​

سكر خفيف


لا إذا دخلت على الوزير باشتغل عليه لين يوقع المعاملة​

على قولة سعد الفرج بطيح بخشمه تبوس​

فلته

شكرا وهي واقعية ​

فارس نجد

أنا للحين أنطر سنة يدقون علي لتحديد موعد الوزير وإن شاء الله تمشي​

؟؟؟​

عساس


تبينا نتواعد وندخل عليه حاضرين​

؟؟​

حمد الراشد

اللهم أمين​

بو هلال


هالمرة وصلنا لقبل النهائي إن شاء الله المرة الثانية نوصل للنهائي وندخل عليه​

بعد عشر سنوات والله العالم

؟؟





أبو خالد

قودلك وبحاول مرة ثانية إن شاء الله بس الظاهر أعرفوا شكلي​

؟؟​

 

[بدوي واقعي]

الاسكندر

سعدت بمداخلتك

وورودك مقبولة​

 

[Ben RasheD]

تخيل انت وزير وعندك مسؤوليات عليا بالدولة ويدخل عليك مواطن مو صاحي نفسك

شنو تتوقع ردة فعلك رح تكون بأمانة ؟!
​

 

[بدوي واقعي]

كويتي ​

من ناحة صاحي أو مو صاحي​

اهم شيء إني متأكد إني أصحى منك ​

ولكن أقولك شيء حصري​

الغريب إن كل عالغرف إللي تدخلها علشان توصل لمعالي​

الوزير​

قدس الله سره​

؟؟؟​

!!​

شدعوه كلش مو قبل لا تكون وزير كنت مواطن حالك حالي​

وتقزقز في عماير المطلقات توالي الليوله​

نسينا أيام 92 و93​

الحين المواطن مايقدر يدخل عليه​

؟؟؟​

القهر عارفينه وعارفين سوابقه​

والحين وزير​

؟؟؟


​

 

[حمد-الراشد]

تخيل انت وزير وعندك مسؤوليات عليا بالدولة ويدخل عليك مواطن مو صاحي نفسك

شنو تتوقع ردة فعلك رح تكون بأمانة ؟!
​

اذا الوزير مايبي يستقبل يقعد بيتهم وهو ماوضع في هل المكان الا يخدم المواطنون ، والجويهل عندما استقبله وزير الداخليه مشوف شي تعطلت البلد !