رنين هاتف نقال.... ولا أحد يجيب...
بعد ساعة...
رنين هاتف نقال... ولا أحد يجيب...
بعد أربع ساعات...
رنين هاتف من رقم مختلف... يرد: ااالوووووووو!
( هلا هلا اخوي... شلونك؟
معاك احمد محمد من طرف ناصر بو بدر... )
يرد: اي احمد اي بطيخ!
( باستغراب: مو انت المسؤول مشعل؟ )
يرد: أي نعم! ومنو انت عشان تتصل علي!
( ياخوي انا متصل عليك عن طريق صديقك ناصر بو بدر... اللي كلمك امس بخصوص موضوع...)
يرد مقاطعاً: اخوي شكلك طاق الطوفه وتعلمني شلون ارد.. ومو انت اللي تعلمي من اللي متصل علي واللي ما اتصل علي...
( أخوي انا ماغلطت عليك عشان تقول طاق الطوفة ! )...
يرد: الغلط كله انت مسويه... تتصل علي وتقول مو غلطان... الحين تقولي من وين لك رقمي..؟!
( رقمك لهالدرجة سري؟! ... أخوي حقك علي انا غلطان واسف على ازعاجك ).
يرد: سكر الخط ولاعاد تتصل...
___
بعد دقائق رقم المسؤول مشعل يتصل على الخط الثاني...
يتصل مرة ثانية.... لا أحد يجيب عليه...
يتصل مرة ثالثة... يقوم احمد محمد بالضغط على مشغول...
يرسل رسالة المسؤول: فيه شيء؟
يرد أحمد: عندي ناس ماقدر ارد عليك...
يرد مشعل و هو لايعرف اذا كانت أمرأة أو رجل من يرد عليه: اَمر شنو فيه لان دوامي خلص!
يرد احمد: شوف اكلمك بالليل لان الحين عندي اهلي وحريم... فيه واحد راح يتصل عليك اسمه احمد
خلصه وشوف شنو يبي... وبعدين اكلمك...
يرد: اتصل علي قبل شوي... راح اتصل عليه...
نقال احمد يرن من رقم مشعل...
يرد: أخ احمد... انا اَسف شنو كنت تبي؟
( طال عمرك موضوع الـ....... اللي أوراقه موقفه بإدارتكم وعليه مخالفات ومحتاج مساعدة منك وتوقيعك...).
يرد: طيب... هذي اوراقه موجوده على مكتبي... وين المندوب؟
( المندوب برا موجود اسمه ياسين).
يرد: خله يمر علي بعض نص ساعة.
( حاضر طال عمرك ).
يرد: حقك علينا ياولد عمي اللي مايعرفك مايثمنك...
-
بعد ساعة ياسين يتصل باحمد... المعاملة خلصت واستلمت كل شيء وانا طالع برا الادارة...
-
بالليل... مشعل يرسل رسالة... موضوع الاخ احمد خلصته بعد تامرون على شيء...
أحمد يرد من الخط الثاني : ( طس ).