سؤال وجواب الفزعة،، عندي محل طباعة و تصوير و متوهق

[أبا بدر]

السلام عليكم
،،
اخواني الاعزاء

فتحت محل طباعة و تصوير قبل 6 اشهر
و الان كل شي جاهز
لكن عندي مشكله في التسويق و زيادة المبيعات

اللي عندة نصيحه لا يقصر

ترى الراي مهم

المشكله لو احصل تعاملات مع معاهد او مدارس

اللي عنده راي يقوله يالطيبين


ربك كريم​

 

[بدوي ذرب]

بروشرات تتوزع علي البيوت وعند ابواب المدارس

ومندوبين لمدارس البنين ومندوبات لمدارس البنات

واحلي شئ

 

[نبعة الريحان]

بالتوفيق أخي الكريم :إستحسان:

الدعاية عن طريق الواتس أب والتويتر

التصوير بأقل الاسعار بالفترة الاولى

يعني 3فلوس

عشان تستقطب الطلبه بهذهِ الفترة

وتوزع رقمك على المدراس أو تضع ملصقات على كل مدرسه.!
وتتفق مع مطعم يذهب للمدراس كل يوم عشان تحط فيه إعلانك
​

وأعطيني العنوان أيييك أنا


​

 

[مهاجر من الشمال]

بيني وبينك خوش مشروع كثر البطايق على سييايير الطلبة في الكليات

انا يوم كنت ادرس ما اطلع الا ولاقي كرت محل على سيارتي

على طاري هذا يا ترى كم يكلف مشروع الطباعة هذا ؟؟​

 

[AlBadel]

شايف خير هالمحل يازميل
وبصراحة أنا مستغرب لطلبك المساعدة وهذا حقك وبالمقابل واجب علينا
نعم مستغرب لأن أي مشروع تجاري دائما فترة عمل الـ6 أشهر للمشروع كافية
وتعطيك مؤشر واضح
أما بالأستمرارية أو التوقف
لكن ممكن سؤال مهم عشان تتضح الرؤيا
1 ) هل أيجارات المحل + العمال مدفوعه طول الـ6 أشهر الماضية
( بشرط أن تكون بدون تأخير )

 

[جيمس بوند الكويت]

الله على الاقتراحات المتخلفه

مع احترامي للكل

حبيبي تبي تمشي شغلك وتسوي دعاية سوها باحترام وبدون ازعاج للناس

شنو يعني تحذف اعلانات على بيبان الناس وسياييرهم !

احسن شي اعلان بجريده ولا على منتدى معروف مثل هالمنتدى

ثاني شغله اغلب اشكال المطابع تسد النفس

اهتم بالشكل

وموفق خير

 

[أبا بدر]

الله لا يحرمنى منكم جميعا
مشكورين

بدوي ذرب
نبعة الريحان
مهاجر من الشمال
البديل
جيمس بوند الكويت

الله يعطيكم العافية
كلامكم طيب

ويفتح لي ابواب

بس شغله التوزيع و التلصيق
فيها اذيه للناس مثل ماقال اخوي جيمس بوند
و ما احس انها مرتبه

اللي عنده افكار لا يبخل علينا

و الاخ اللي سأل عن التكاليف و الايجارات
التكاليف عاليه و المشروع يصرف
ولله الحمد ما تأخرت على ايجار او راتب

زيدونا بأرائكم ترى الراي مهم
:وردة:​

 

[بوعوض]

اربط نفسك مع المصريين لانهم كلهم معلمين ^_^

 

[بقيييط]

اتبع نصايح جمس بوندك وبيرزقك الله

حبيبي ماينفع الا الي قالولك الشباب توزع وتلصق ولا غيره اقوولك اقلبه سمبوسه وفلافل احسن
​

 

[مواطن طبيعي]

حط جوائز واغراءات للزباين


1 تصوير اول مره مجاناً على حساب صاحب المحل

2 توزيع صورة صاحب المحل وهو مبتسم ومتفائل مع رقم المحل

3 تقديم كعك وشاي للزباين المنتظرين اكثر من 6 دقائق 5 ونص ماياخذ

4 توفير كراسي مريحه للزباين مع تلفاز 42 بوصه بجميع القنوات العربيه والاجنبيه

5 يحق للزبون ان يدخل عند العاملين ويزعجهم لآن اهم شي راحة الزبوون

6 خصم خاص للمدرسات الكويتيات والمواطنون الصالحون

بظرف شهر

تصير مطبعتك الخايسه اشهر من حلويات شويطر


​

 

[عبدالله .]

اخوي مواطن طبيعي ذكر اللي كنت بقوله
اهتم حيل بالشكل الداخلي للمكان
إذا زحمة دايماً خل في ارقام وترتيب وقعدة نظيفة وضيافة عالخفيف
اهم شي اهتم بالاستقبال ترا هو واجهة اي مكان تجاري
ضيف خدمة الترجمة اعتقد هالخدمة حيل عليها طلب ترجمة التقارير الطبية وبحوث الطلبة
وضح للناس خدمتك اللي تقدر تقدمها بعض الناس يتفاجئ لما يسألك عن شغلة وتقوله روح سوووها في مركز الطالب
مثلاً عمل سكان للمستندات وإرسالها بالبريد
او طباعة محتويات موجودة في ايميلك الشخصي

وحال توفر مواقف خاصة لزباينك

وبالتوفيق إن شاء الله
​

 

[غيث]

الله يوفقك يارب ويجعله باب رزق وينميه لك ​

​

أخي الفاضل يقول الله عز وجل
يمحق الله الربا ويربي الصدقات
فحرص على ان لايخالط مالك السحت
وتصدق حتى يربية الله لك والذي لا إله إلا هو ستجد بركة مالك​

 

[OK]

الله يرزقك اخوي

اول شي حاول اتعامل مع القوائم بالجامعه او التطبيقي خلال فتره الانتخابات لان اعلاميتهم راح تكون كبيره
تعامل مع الجمعيات والروابط بالجامعه واطبع لهم اللي يبونه
وعندي شغله لو تنفذها راح يتعاملون معاك هالاطراف حاول توفر خدمه توصيل للمكان اللي يبونه

واعلن بالنت كثر ما تقدر وانا مدونتي موجوده اذا حاب نتعاون
​

 

[عذب الاطباع]

اهم شي انك تخفض الاسعار شهر بالكثير على شان تطيّح اسعار منافسينك

وانتبه من تصغير الاوراق ( البراشيم )