سؤال وجواب شرايكم اتوكل علي الله ؟

[ابونايف المطيري]

السلام عليكم ورحمه الله وبركاته.

فكرت اخذ قرض يكون لزواج والسياره والباقي اشتغل فيهم بأي شي



بنك بوبيان يعطيني 30 الف ل 12 سنه والفوائد 13 الف والقسط 300

الربع يقولون زين فشرايكم اتوكل علي الله ؟

 

[Anu]

محد راح يجاوب على السؤال غيرك
اذا انت قد القرض وتقدر توفي وتسدده توكل على الله
حدد مخاطرك و حدد لفلوس بشنو راح تسوي فيها بالظبط و الباقي الي بتشتغل فيه جم راح يكون وشنو راح يصير اذا ما توفقت بالشغل الي بتشتغل عليه
وهل القسط 300 دينار راح يأثر على راتبك الحالي او لا او بصوره ثانيه هل راح يأثر بميزانيتك ؟
اذا تقدر تدفع ال 300 وانت مرتاح وما تهمك زين ام اذا ممكن تأثر راجع نفسك و راجع حسبتك

مو عيب الواحد ياخذ قرض ولكن حسب الاماكنيه و قدرتك على السداد بالاضافه ان القسط هذا ما يأثر عليك او يضيق على اهلك

و بالتوفيق ان شاءالله

 

[عبدالرزّاق السّنْهُوري]

يعطونك 30 الف لمدة 12 سنة والفائدة 13 الف والقسط 300 ؟! الفائدة اللي ياخذونها منك تعادل 43.33% من اصل القرض هل هذا بنك إسلامي!!! يعني المبلغ اللي انت راح تسدده 43 الف دينار .
اسأل شيخ عن هذا القرض و هل هو جائز شرعاً.
12 سنة =144 شهر
144 × 300 = 43200 دينار

انت راح تسدد 43200 دينار قرضك خسارة وانت خسران وهذا ربا النسيئة ولا يخدعونك بمقولة بنك إسلامي.​

 

[ابونايف المطيري]

اخةي عبدالرزاق نفس سؤالك سئلته للموظف ورد علي هذا بنك اسلامي ويعتبر هذا مرابحه ؟

 

[عبدالرزّاق السّنْهُوري]

اخةي عبدالرزاق نفس سؤالك سئلته للموظف ورد علي هذا بنك اسلامي ويعتبر هذا مرابحه ؟

يابونايف لا يضحكون عليك بسالفة المرابحة 13 الف تكسر الظهر لو انها 5 او 6 الاف نقول ممكن مرابحة هؤلاء مرابحتهم اسوء من ربا البنوك .​

 

[جيمس بوند الكويت]

هذا ربى شلون بتوكل على الله ؟

المرابحه هي ان يشتري البنك بيت لك كاش مثلا ويبيعه عليك تقسيط بسعر اعلى من سعره الاصلي على اساس انهم خدموك بشرائه كاش وبيعه لك اقساط فانت تدفع مقابل الخدمه

لكن الي تقول عليه ربى مو مرابحه

موفق خير

 

[بدركوم]

اولا اخذ قرض للزواج وشراء سيارة مناسبة لك توكل على الله مع التفريق بينهم

ثانيا بخصوص التجارة لا انصحك باخذ قرض الا ان كنت متاكد ٩٥٪ بنجاحها لانك لا قدر الله وخسرت فهناك بنك يطالبك باصل المبلغ والفائدة وهي تختلف عن شخص لديه فائض مالي ويود استثماره وخسر فلا احد يطالبه بشئ

ثالثا لا تستمتع لاي موظف بنك يقدم نصائح وتاكد من جميع الاوراق بنفسك وما يناسبك انت شخصيا واستفسرت عن كل ما يجول بخاطرك المعاملة ستاخـذ من الموظف ١٠ دقائق وتاخذ من مالك وتفكيرك وراحتك سنوات عديدة

بالتوفيق

 

[السلطان العثماني]

ماأنصحك .. بس اذا تقدر تصبر على 300 دينار تنسحب منك 12 سنة وبعد ماتتأكد ان القرض مو ربا اخذه

 

[الديمقراطي]

نصيحة أخ لأخوه لاتسلم رقيتك لبنك
واذا مضطر اخذ الي يكفي لزواج فقط
لاغير اما السياره فا اخذها اقساط ع مدى سنتين
والتجاره ابعد عنها لأنها محتكره لناس

 

[mystery]

السلام عليكم ،،

بالنسبه لمبلغ 30.000 على 12 سنه والفايده 13000

جدا مبالغ فيها نسبه الفايده ..
الفايده حاليا 5%

يعني لو تاخذ قرضك من بنك تقليدي الفايده بتكون تقريبا 10000 كحد اقصى
والقسط بحدود 280

مع العلم نفس المبلغ اللي بتاخذه وبنفس مده السنوات،،

ونصيحه مني ابتعد عن البنوك اللي تشرب من دم العميل مثل بنك بوبيان والتمويل والاهلي المتحد والدولي،، واضمن لك تتعامل مع البنوك التقليديه الاخرى

والله ولي التوفيق

 

[مساعد الشويب]

نصيحه اخ وحسبه عاقل


المبلغ بالكامل 43200 الف

الفايده 13200

القسط 300

بيدك 30.000 الف

بتزوج بــ ١٢ الف اقل تقدير

وبتشتري سياره اقل شي 7000

باقي 11 الف

قول بتهايط وبتسافر شهر عسل هذي ١٠٠٠ دينار

باقي 10.000

نصيحه احمد ربك ع العافيه ومسك ارضك

 

[ابونايف المطيري]

انا حسبتي
10000 الاف سياره

10000 زواج

5 الاف للوالد

و5 الاف بيدي

واحد من ربعي بصراحه اقنعني كلامه قال اخذ الحد الاقصي 38 الف واشتر كل الي تحتاجه والباقي حطه بالبنك للظروف ويكون قسطك واحد ودقيت علي الموظف وحسبلي ياه



38 الف الفائده 22 الف القسط 335 علي 14 سنه

 

[mystery]

اخوي بو نايف الظاهر ما قريت ردي..

عموما انا ما ادري اي بنك تتعامل وياه اللي تكون فايده 22000 !!!!!!!!!!

على المده اللي تبيها تكون الفايده بحدود 15000

والقسط 315

على 14 سنه ...

مره ثانيه
المبلغ 38000
المده 14 سنه
القسط 315
الفايده 15000



والله يوفقك،،

 

[السلطان العثماني]

لا تاخذ ترى غيرك هلكان من القروض ويبجون ليل نهار

ترى بتعاني 14 سنة .. كيفك​

 

[ابونايف المطيري]

يربع انا باخذ قرض لزواج والسياره واثاث الشقه مو لعب

انا بنكي بوبيان يعني اسلامي بس طلع ذبح اسلامي


توني داق علي الوطني عشان اشوف جم يعطون


30 الف 12 سنه الفوائد 9 الاف. القسط 277

بس ماقدر لانه ربا


بكرا ان شا ء الله بروح بوبيان وبوقع علي

30 الف مع الفوائد 42 الف والقسط 295 المده 12 سنه والله المستعان شنسوي الظروف حدتنا علي القرض

 

[tsq8]

نصيحتي انسى الموضوع
الفائده الي بتدفعها 43% من القرض شنو 13000 فائده وايد حرام
و لو انت موظف عادي جم معاشك بصير 1000؟ تخيل 30% من معاشك ضايع لمده حياتك ترى مو شويه
لا تاخذ قرض حتى لو اسعار القروض في البنوك التقليديه 5% احتمال كبير الاوضاع الاقتصاديه تتحسن و الفائده ترتفع الا 10-15% و تبجي بعدها و انت بنص تسديدك .

انصحك اصبر على الزواج خله بعدين ليما تحس انك قادر تصرف على البيت و اتسانس بعزوبيتك لان الزواج ما يونس الا اول الايام و هذي نصيحه على طبق من فضه لا تستعجل على الزواج

تخصصي اقتصاد تمويل

 

[الكويت بلاد العرب]

نصيح خذ الي يغطي زواجك وسيارتك والاثاث فقط
ابعد عن التجاره
حتي تسدد قرض الزواج
ومبروك مقداما

 

[اليعربي]

يعني حياتك كلها بتقضيها ديون وتسديد


حبيبي

اربع الاف تعطيك الحكومه زواج واضنها صارت سته اذا مو غلطان

زيدها قرض 10000 الاف وسلك اموورك

والسياره مالها داعي جديده اخذ مستعمل ومع الوقت تصلح اموورك


انت من بدايتها تبي تخرب بيتك وتحرق حياتك بقرض افلاطوني

خمسه بيد الوالد وخمسه بيدك وسياره عشر الاف يبا هذا قرض مو لعب الظاهر مستهين حيل بالامر
والي نصحك فيه عز الله ما يبيلك الخير

لا تزعل مني بس صراحه قهرتني

أي ظروف حدتك ظرووف وانت تبي تعطي الوالد خمسه بيده وخمسه بيدك وسياره عشره الاف اذكر الله

وشنو هالتجاره الي راس مالها خمسه الاف !!!!! هذا اذا ما طيرتها بشهرين

لا توقع مع البنك واذكر الله واحمده على العافيه وابني حياتك صح ولا تهدمها من بدايتها
تبي تاخذ اخذ عشره وسلك اموورك

 

[Anu]

ماله داعي تشتري سياره ب 10 الاف

اخذ قرض بس للزواج اخذ بالكثير 15 الف وكان الله غفور رحيم

في سيارات ارخص او ودك تكشخ يمع من معاشك ولا تهلك نفسك

 

[ابونايف المطيري]

نصايحكم علي العين والراس. بس انا اقتنعت وحذت القرض من اسبوع

30 الف 12 سنه. والفوائد 12 الف والقسط 295. والبنك اسلامي يعني 12 سنه واخلص بس ماله شغل الفايده ترتفع


واشتريت سياره ب 8 الاف والوالد 5 الالف وحظيت 15 بوديعه وبعد جم شهر بحطهم ببنك مصري هذا فلوس الزواج. ومشكورين علي النصايح