اختي العزيزة الحلوة
طلب قصيدة نابعة من مشاعري واحاسيسي
وهذا ما جادت به القريحة التي تؤرق افكاري (حالياً)
إكتب اشعار
قالوا لي اكتب اشعار ... صور حبك والاسرار
لا تتكتم خل نتعلم ... واعزف حبك في الاوتار
قالوا لي إكتب اشعار
خذت البنسل وانا محتار ... دارت في راسي الافكار
قال البنسل لازم نرسل ... لو كلمة حق الاخبار
في الديرة زادت الاسعار ... والكاسب منها التجار
تلوا اللقمة من غير رحمة ... حتى وأهي بإيد طرار
وأسترخص نوط الدينار
هم قالوا إكتب أشعار ... قلت شاكتب وانا عندي جار
شايف حاله مأذي عياله ... صوته طالع ليل ونهار
ما يرحم اطفال صغار ... ولا يفهم بحقوق الجار
خلا البسمة تموت باسمه ... وموًت في طبعه لزهار
خوفي والله البيت ينهار
ردوا قالوا شللي صار ... احنا قلنا نبي اشعار
تحكي الحيرة وليل الغيرة ... لابد قلبك حب واختار
لابد حبك صار مسمار ... في ضلوعك وانت محتار
هذي القسمة لو بس كلمة ... خبرنا لو خلك زار
شتسوي من غير ما تغار؟؟
قلت يا ربعي راسي دار ... حتى البنسل راسه دار
طفلة صغيرة تحت سديرة ... تطلب ربها تقط كنار
طفلة والوالد جبار ... ما خلا حق بنته دار
بنته بوحده .. وهو ما عنده ... مديون وحافي وقمار
ومريته بنت الاخيار
مو بس الحب .. له اخبار ... الديرة مليانه اشرار
منهم غادر منهم ثاير ... ما يفرق بين ماي .. ونار
الحب مو بس عشق واسرار ... الحب رحمة وعطف وانوار
حتى الرحمة صارت نغمة ... في الْسانا مثل المنشار
خوفي لا نطلع كفار
ربي يا مربي الاشجار ... ارحم أمًة تحب وتغار
