جلسة طبخ .. الضبان

[خالد المطيري]

السلام عليكم ورحمة الله وبركاته

اليوم راح ابتدي اقدم لكم اطباق خاصة لمحبي الضبان والأهم منه عكرة الضب

حياكم الله هذا طبخنا بالجواخير والمزارع مع الربع

ببتدي الطبق المفضل عند الربع وهو مجبوس الضبان بالطماط :إستحسان: ،،،، وسيتم الاستعانة بالصور من النت بس الطبخ على طريقتي الخاصة ..

مجبوس الضبان

نحتاج :

زيت - بصل - ثوم - طماط - بهارات - عيش امنقع ومغسول - بقدونس - معجون طماط - ملح - مكعبات ماجي - وضبان ( عدد 2 ) يفضل ضبان السعوديه لانها مليانه لان الضب الكويتي ضعيف ومافيه لحم

الطريقة :

نجيب الجدر ونحطه عالنار ومعاه زيت وننطره يحتر عقبها نحط البصل ونحركه ليما يصير لونه بني وعقبها بحط الثوم وانقلب ونحط البقدونس والبهارات ومكعبات ماجي وانحرك وانقصر على النار اشوي
وبعدها نحط المعجون عدد 2 ونصيف فوقهم الطماط المفروم وانحرك

وهذا شكل الضبان بعد ما انقطعهم

نسلق الضبان بروحهم لمده ساعه بماي وملح وبزار وبصل كبار وليما يخلص يكون شكله جذي

عاد نجيبه ونحطه مع الخلطه وانحرك عشر دقايق نحط العيش ونحمسه معاه ليما اتحس العيش تشرب الخلطه ونزيد عاد الماي ليما انغطي العيش كله واتحط الملح ونحرك كل جم دقيقه وبعدها لي شفنا الماي نشف انقصر عالنار حيييل ليما يستوي الضبان والعيش وبعدها انقدمه وايدامه لبن والا بدون ايدام كيفك

بالعافيه

الطبخة الثانية

حمسة مع بيض الضبان ،، لذيذه

 

[خالد المطيري]

حمسة مع بيض الضب ،،،

نحتاج :

زيت - بصل - بهارات - ملح - ثوم - معجون طماط - مكعب ماجي - كزبرة خضرا - اشوية طمام مفروم والاهم من هذا كله بيض الضب

جيب الضب الكبير

وافتح بطنه وطلع منه البيض وهاذي صورته

اخذ البيض وغسله عدل

وبعدها حط اشوية زيت بالمقله ومعاها بصل واحمسه اشوي وحط الثوم والبهارات ومكعب الدجاج واحمسه اشوي وقصر عالنار وبعدها حط الكزبرة الخضرا وحرك وضيف المعجون وحرك اشوي وبعدها ضيف الطماط واشوية ماي

حرك وضيف بيض الضب بعد ما غسلته وحط اشوية ملح وحرك ليما يستوي البيض

وبعد 5 دقايق طف الجوله وجيبلك خبز ايراني واكل عليك بألف عافيه

 

[خالد المطيري]

والحين مع مرقوق الضبان ،،،، :إستحسان:


نحتاج :

معجون طماطم - بصل - بهارات , ملح , ليمون أسود - زيت - مرقة ضبان مسلوقة - خضار مشكلة بطاط وقرع وجزر وكوسا وفلفل اخضر - وضبان عدد 2 نص مستوي يعني مسلوق من قبل

الطريقة نبتدي بسم الله :

نجيب اشوية زيت ونحمس البصل فيه ونحط الضبان ولا تنسون العكره

ونضيف الخضره عليهم وانقلب مع البهارات ومكعب ماجي مع اللومي والملح ونضيف المعجون مع التقليب ربع ساعه

نصب امرقه الضبان عليهم

وانحركه 5 دقايق ليما يصير شكله جذي

وبعدها ناخذ عجين طحين وماي وانكوره ونرقه ونحطه مع المرق وانحرك وحده ورا الثانيه

وكل ربع ساعه انحركه ونتركه ساعتين مع التحريك كل مده ليما يستوي العجين والضبان ويصير هذا شكله بالنهاية عليكم بالعافيه

هذا الموضوع اهداء مني للسلطاني وكل من يحب الضبان

 

[شارلوك هولمز]

الله يهداك يا المطيري في ناس للحين تاكل ضبان ؟

كل هالخير وهالنعمه الموجودة وللحين ناكل ضبان ؟

 

[خالد المطيري]

الله يهداك يا المطيري في ناس للحين تاكل ضبان ؟

كل هالخير وهالنعمه الموجودة وللحين ناكل ضبان ؟

احبه واموت فيه وبخاطري اسوي مطعم لطبخ الضبان بس واتوقع بيصير الربح قوي اشرايك اتشارك ؟؟

من ما يحب الضبان له طعم غريب ما يوصف والاهم منه العكره .. تعال مر عندنا واذوقك من ايدي بشرط ماراح تستغني عنه :إستحسان:

 

[Modest]

الله يديم النعمه ...

انا قبل من اشم ريحة طبخ الضبان تلوع جبدي

كنت اشرهه على عمي الله يطول بعمره لما ياكل ضبان كل سنة مرتين او ثلاث ويطلع برحله بالبر شهر اربعه مع عياله ..

وهم جارنا كل سنة ضبان بس الحمدالله وقف عن الامر هذا من 10 سنوات تقريبا ..

بس اول مره اسمع ان احد ياكل بيض الضب

يصير شكشوكة ضب

 

[شارلوك هولمز]

احبه واموت فيه وبخاطري اسوي مطعم لطبخ الضبان بس واتوقع بيصير الربح قوي اشرايك اتشارك ؟؟

من ما يحب الضبان له طعم غريب ما يوصف والاهم منه العكره .. تعال مر عندنا واذوقك من ايدي بشرط ماراح تستغني عنه :إستحسان:

عالعموم عافية يا المطيري

وإنشاء تفتح مطعم ضبان يكسر الدنيا

 

[@Noura@]

عالعموم عافية يا المطيري

وإنشاء تفتح مطعم ضبان يكسر الدنيا

والله فكرة

بتقاعد وكنت أفكر أفتح حضانة مناسبة لتخصصي

بس مطعم ضبان بيكون ربحه أكثر ...!!

 

[مجموعة إنسان]

الله يديم النعمة والله لاعت جبدي

بس أبي اعرف أشلون تطبخونه بقشوره بدون ماتسلخونه لأنه قشوره باينه حلي اشلون ماتقصون فيها
​

 

[الرحال]

لللفائدة /

حكم أكل الضب شرعا :
​

وأما الضبّ، فالأصل فيه الحل دون كراهية، عند جمهور العلماء من أهل المذاهب الأربعة وغيرهم، ودليل ذلك، ما رواه البخاري عن خالد بن الوليد رضي الله عنه قال "أتي النبي - صلى الله عليه وسلم - بضب مشوي، فأهوى إليه ليأكل، فقيل له: إنه ضب، فأمسك يده، فقال خالد: أحرام هو؟ قال: " لا، ولكن لا يكون بأرض قومي فأجدني أعافه " فأكل خالد، ورسول الله - صلى الله عليه وسلم - ينظر" وفي رواية "لم يكن بأرض قومي"،