الحين راح نكمل سالفة البنت وموقف الرجل من سدير
لما صارت الساعه 4:30 تقريبا قلت حق الرجال يا خوي المشكلة انشالله انحلت ... والشرطه
موجودين ... قال ماراح امشي الا لما اتخلص هالمشكله وسبحان الله اذا حصل اي شي انا راح
اكون شاهد انك لقيت البنت وانا كنت شايفها مع اهلها ... وقالي سبحان الله البنت لا يكون فيها
شي وبعدين اتصير المشكله كلها عليك... والله اهنيه بكل صراحه اعجبت بهذا الرجل وبموقفه لما
قال هالكلام (بالفعل لك مني التحيه ) .. المهم قعدنا انا وياه عند باب بنده وقعدنا انسولف وطبعا
الشرطه واقفين عند الدوريات... والبنيه واقفه عند ظهري... الساعه تقريبا صارت على 4:45 صباحا
... رحت انا حق رئيس الشرطه والبنت معاي قلت له ما أظن أحد فقدها من اهلها والا كان رد احد
للمكان ودور عليها... رد علي الشرطي وقال خلينا نعطيهم فرصه يمكن احد يجي.. انا اهنيه رديت
حق صاحبي وقعدنا انسولف وبنتي معاي... بعد اشويه ما اشوف الا الشرطي جاي وقالي انت وين
لقيتها بالضبط ... رديت عليه واشرت له على المكان .... قالي طيب انت اهلك معاك والا لأ.... قلت
له لا والله اهلي مو معاي... قالي بهالحاله راح ناخذ البنت معانا لمركز الشرطه ... وراح نسلمها
حق اهلها اذا جانا اي بلاغ عن فقدان البنيه ... رديت عليه وقلت له يا خوي هذي بنت صغيره والله
ممكن تخاف وبعدين مركز الشرطه بيكون لها صدمه... رد علي وقال ما فيه الا الحل هذا... رديت
عليه وقلت له ليش ما تاخذها واتوديها تلعب مع اعيالك ليما الله يردها لهلها ... رد علي وقال ما
اقدر... انا اهنيه سكت وضاق خلقي... تدخل صاحبنا اللي من اهل سدير وقال انا عندي اهل واولاد
ممكن اخذ البنت مع عيالي واذا احد سأل عنها دقوا علي تلفون وانا اجيبها المركز.... انا اهنيه
استانست قلت والله هذا راي حلو وخوش راي... اهنيه كان الشرطي حيل متعاون قال ما عندنا
مشكله بس تعطيني اثباتك وعنوانك... وافق الرجل وعطاهم عنوانه واثباته ورقم تلفونهم ... اهنيه
انا حمدت ربي ان المشكله انحلت... ولكن الصدمه كانت غير لأن الموضوع ما مشى على حسب
اللي نبيه.
راح الشرطي ومسك البنت عشان يعطيها الرجال ما نشوف الا الصياح والصراخ ... والله صراخ على
بالي ماتت البنت من البجي ... اهنيه هدها الشرطي كان ترجعلي وتمسك دشداشتي ... اهنيه
سكتت البنت (قلت بس السالفه ماراح تنحل والبنت جابت الشبهه لي) ... بعدها الكل قام يضحك
... المهم الخطه اختربت والنور طلع وصاحبنا مو راضي يمشي وأهل البنت ما ردوا حق المكان...
اهنيه تكلم رئيس الشرطه وقال حق الدوريه الثانيه تمشي... مشى صاحب الدوريه الثاني اهو
واللي معاه... وقعدنا انفكر شنسوي الحين ... قال الشرطي ما فيه الا انك تاخذها معاك واتوصلها
لنا المركز... قلت بس شلون راح تنزل اهناك اكيد راح اتصارخ وتبجي... ولا زال صاحبنا من سدير
واقف معاي (بس عقب ما صار انا صار ما ودي انه يروح لأن المسئله تعقدت وما ودي أقوله روح
)..
رديت وقلت حق الشرطي ما فيه حل غير ننتظر لما تنام وعقبها ياخذها الرجال معاه (صج فكره
بس المشكله محد يدري متى راح تنام والشرطي راح يخلص الشفت ماله بعد ساعتين تقريبا)
رد علي الشرطي قال ما فيه الا ناخذها وخلاص... انا بصراحه سكت والله التعب بين على اشكالنا
واهي بس تدور حواليني.
بعد اشويه ما اشوف الا ولد صاحبنا اللي من سدير جاي يركض من سيارة ابوه ويقول يالله يبه
نبي نروح البيت... رد عليه وقاله ارجع للسياره وروح نام داخل السيارة اذا تبي تنام... الولد كان
عمره تقريبا سبع سنوات... اهنيه رجع يركض وما اشوف الا البنية راحت تركض وراه (بيني وبينكم
انا بغيت اروح اركض للسيارة عقب ما هدتني)... اهنيه ناداه ابوه وقاله العب معاها يا عبدالعزيز ...
طبعا الكل على اعصابه ويشوف هاللحظه عشان بس تلعب معاه...
شوي والا قاعدين يلعبون... اهنيه قال الشرطي حق صاحبنا حاول تروح معاها ليما توصلون السياره
وبعدها اتخلي الولد يلعب معاها ويلاهيها عشان يركبون السياره وتاخذها معاك البيت........
والله العظيم يا اخوان هذا اللي حصل بالضبط
بس هل تتوقعون ركبت السياره وانجحت الخطه اللي جت بالصدفه والا لأ؟
اخلي لكم التوقعات .... وللحديث بقيه
تقبلوا تقديري واحترامي