رصد غلاء الأسعار المفتعل (للمتابعة والمقاطعة)

[الطرح الهادي]

انا صاحب محل اجهزه الكترونيه والشركات كانت تبي تسوي عروض بهلا فبراير وتسوي خصومات لكن بعد الزياده وقفت الخصومات

قناعتي: كل التجار يبون الربح ، لكن بدال ماترفع السعر ، سوا خصومات وخل الكل يشتري منك
لو نزلت الفلوس والناس كلهم رافعين السعر حط اعلان بالخصومات الناس راح تقارن الاسعار وترجع تشتري منك
بالنهايه بدال ماتبيع 30 تلفزيون راح تبيع 100 فتكون ربحت اكثر وهم كسبت زباين جدد 

 

[Capello]

ياشباب تامنون بالله حتى مستشفيات الولادة زادت اسعارها !!

لي ولد عم جاه ولد قبل كم يوم .. يقول كنت ماخذ الاسعار قبل فترة
لما حددوا انه لازم عملية قيصرية تقريبا 500 الى 540 د.ك

ارتفع السعر فجأة بعد خبر المنحة الى 740 !!!


طبعاً بدون مقدمات بعد خبر المنحة مباشرة حتى لايتم رصده من وزارة
التجارة النايمة والي حذرت وبدأت تعمل بعدها بفترة .. طبعا هالفترة
سمحت للكل يرفع !!

أحاول اجيب اسم المستشفى مع الاسعار وكافة التفاصيل بأقرب فرصة
وياليت نشوف باقي المستشفيات والعيادات الي راح يلجأون لها الناس
خصوصاً عيادات الاسنان وعيادات التخسيس وما إلى ذلك .


جزاكم الله خير

 

[سعد الهاجري]

بااااااااااااااااااارك الله فيك

 

[Ronaldo]

السلام عليكم ورحمه الله وبركاته

قبل اسبوع تقريبا وديت اهلي حق سوق العربيد وفصلو ب ١٧ دينار ،،
اليوم مريتهم ولقيت الي ١٧ صار فجأه ب ٣٠ دينار
ولما سألتهم عن ارتفاع الاسعار قالو مالنا شغل صاحب المحل اهو الي حط الاسعاار

الظاهر المنحه بتطلع علينا باون

 

[Serenity]

أتمنى فتح صفحه رسميه بالتويتر للحمله رصد غلاء الأسعار .. و إرسال برودكاستات بالبلاكبيري و الأيفون فيها زيادات الأسعار للشركات الجشعه , حتى تصل لأكبر عدد ممكن

 

[محروسه ياكويت]

مشكور اخوي على الموضوع واشكر كذلك ادارة المنتدى على تثبيت الموضوع .........:وردة:

والكيفيه بمحاربة الاسعار هي المقاطعه والبديل موجود منطقة الخغجي السعوديه الله يديم الرخص للزرقات القريبه وعندك الجمعة والسبت للتسوق بالدمام والله اسواق ومجمعات عالميه واذا لك خاطر البحرين من قريب ...

ومن تغلا تخلا .........

 

[جامعي]

حليب الصافي .. 1 لتر ×4
قبل الزيادة : 0.990
الحين : 1.100

 

[kuwait q8]

التجاره بس فالحين يصدرون بيانات نبى عمل نبى ضبطيات للمخالفين بالاسعار

اذا خالفوا جم واحد راح يخافون الباجى ! ولا السالفه فيها مجاملات للتجار على حساب

الناس البسيطه ومحسودين على المنحه , الله لا يوفقهم هالاستغلالين ,

 

[777حمود]

يااخواني والله والله الوضع خطر والمعاناة راح تبداء في شهر 3 وبعدها

الامر فوق التجاره المفروض تشكل لجنه لمتابعة الاسعار

 

[أحمد التميمي]

المشكله احنا البدون مالنا منحه والزياده على الجميع ! والله مدري شنسوي !

 

[زارع الزيتون]

سوني بليستيشن زادوا سعره 40-50 دينار

 

[كاتب^مؤجور]

شباب الا يفون يقولون ارتفع سعره بشكل خيالي الي كان فور جي ٢٤٠ صار ٣٣٠
وانا اتوقع مع نزول المنحه ماراح تلقا ايبود ولا ايفون بالسوق
فا اخذو الحذر والي يبي يوصي عليه من برا ولا يطلبه طلبيه احسن خصوصا اذا بيشتري اكثر من واحد

 

[زارع الزيتون]

شماغ البسام الابيض زادوا سعره دينار

 

[زارع الزيتون]

الحب المصري ماركة بنان زاد سعره 25%

 

[زارع الزيتون]

تذاكر السفر ولعت

 

[العضيله]

عصير أطفال السعوديه برتقال ٨ حبات

ارتفع من ٨٧٠ الى ١٢٠٠

 

[العضيله]

بالنسبه للايفون سأل عنه ٢٥٥

 

[رؤى]

الحلو بموضوع المنحه ان الشعب الكويتي كله اتفق على فضح التجار المتلاعبين بالاسعار

يعني هالموضوع في مثله بكذا منتدى بالذات المنتديات الكويتية الي تضم اعداد كبيرة من الاعضاء

هذا غير القروبات في الواتس آب والـ بي بي ام

المهم .. شوفوا بنت الحلال شتقول , هذه مشاركة من منتدى ثاني

انا اللي متأكده منه سيتي سنتر السوق الاحمر

هالسوريين كلهم متفقين على نفس السعر واسعار بجايم اليهال اللي كانت على 2.500 مسوينها ب3.500

والترننجات مالوت البر كانوا على 5 الحين على 8 و10 هديتهم وطلعت وقتلهم خوش اتفاقيه

ولا يقولي السوري على ضحك ( ما احنا كمان ما بيطلعلنا من الحب جانب انتوا الامير عطاكن واحنا بناخذ منكم منحتنا ) جان اقوله

عناد عليك ماني شاريه وخليته وطلعت عاد رحت بعدين سنتر بوينت وشريت لهم

وهذه وحده ثانية

انا امس رايحه اليوسفي بشتري فريزر و جوله المهم عطانا اسعارهم قاله ريلي خلاص نيي باجر نشتريهم و احنا طالعين جان يقوله بس حاول قبل ال1000 لان بعدين يمكن الاسعار انا من حرتي اتليقفت و رديت عليه قتله نقولك باجر تقول ال1000 قال اها شكلكم مش تبع ال1000 قتله اي احنا مو تبعه عناد قطيعه

اشكره يعني .. ! الثالثه

امس حجزت غدا من مطعم ملاس بو خماس اذا تعرفونة وانا يعنى زبونة واخذ منة غدا كل مايونى ضيوف من برا 0لقيتة زايد على كل وجبة نص دينار سالتة ليش قال هاذى اسعارنا من زمان 0اشكرة يكذب 0قلتلة انا ماخذة منك قبل اسبوعين 0ماعرف يرد0

الرابعه

عقب يوم من قرار بابا صباح الله يخلية كنت رايح بن العميد جان اسمع البايع يقول حق المراة اللبنانية جدامي

بصوت واطي ان بيرفعون اسعارهم من يوم الاحد يعني اليوم اسمعه اتقولو بصوت عالي وموعاجبة شو راح يصير 5 لما

صار دوري طبعا اتليقفت وسئلتة بترفعون اسعاركم قالي اية يعني جميع انواع القهوة كان سعرهم 4,600 حق الكليو

صار ب 5 و الهيل كان كيلو 10 راح يصير 14 دينار حسبي الله عليهم ينو

الخامسه .. صدمه ماكنت متوقعه حتى المحلات الكبار !

اليوم الصبح وحده من بناتي طلعت مبحر خلصت 10 واختها تخلص 12.30 جان اقولها امشي نتمشى بالافنيوز علما تطلع اختج

من الامتحان وبنات كنت لابسه عزكم الله جوتي ماخذته من 3 شهور تقريبا من ريفر ايلند وسعره ب25 ورب الكعبه

المهم ولا اشوف لوحه محطوطه عالباب سيل جان ادش قلت بشوف الجوتي بجم صارررررر اذا نازل سعره واايد باخذ لون ثاني

والله يا بنات اني دشيت شفت الجوتي موجوده بس اللي موجود لون بني وحاطين عليه سعر 35 انا هني @@

جان اقوله بجم هذا ولا يقولي ( مدام عاملين عليه سيل كان سعره 45 هلاء ب35 ) قتله لا والله !!!!!

جان اقوله في منه اسود لان اللي ماخذته اسود جان يقولي ايي فيه قتله روح ييبه راح يابه

جان افصخ جوتيي وحطيتهم يم بعض قتله الحين هذول مو نفس الشي جان يقولي ( ايي مدام نفس الشي ) ازا عندك زيو ليش

ما بدك اسود ! جان اقوله انا مابي اشتريه انا ببين جذبكم ولفكم ودورانكم هذا من 3 شهور انا ما خذته ب25 ديناااااااار

الحين مسويه ب35 وسيل بعد عاد اهو تبلعم طبعا ولحظه مدام ويمكن التج غلط لحظه اتأكد قتله اتأكد براحتكم


عموما هذي آخر مره ادش فيهااااااا محلكم وراح ابلغ كل رفيجاتي واللي اعرفهم عن هالسالفه

- بن العميد

- اليوسفي
- سيتي سنتر
-مطعم ملاس ام خماس
- محل ريفر آيلند
- يوريكا

ليش ما يسكرون محلاتهم , بالذات سيتي سنتر استغلال مو طبيعي !​

 

[كويتاوي]

اخواني اخواتي اعضاء المنتدى الكرام

اشكر الجميع على المشاركة والتفاعل لما فيه مصلحة الجميع

واحب ان انبه ان هناك تسويق مبرمج في الاعلام المقروء والمرئي

حول موجة الغلاء وارتفاع الاسعار

وان هذا الشيء طبيعي ومتوقع

لكي يتقبل الشعب الكويتي بكل سذاجه هذا الغلاء الفاحش

لذا ارجوا من الجميع الإلتزام بالمقاطعة وضربهم بقوة بحيث يستفيقوا من غفلتهم واعتقادهم بأن الشعب الكويتي غبي ولا يتعلم من تجاربه السابقة

لنعطي هؤلاء الوافدين والذين يتحكمون بالاسواق ومعايش الناس درساً لن ينسوه لسنوات طويلة قادمة وستجعلهم في اي اجتماع للإتفاق على خنق الشعب الكويتي ان يفكروا طويلا جداً قبل ان يقرروا زيادة فلس واحد فقط.


انتبهوا لهذه الحملة التي تسوق الغلاء القادم وتريد ان ترسخ في عقولنا الباطنة ان هذا امر طبيعي

بحيث تجعلنا ونحن نتسوق ونلاحظ اي غلاء نقول لأنفسنا ولمن حولنا بكل غباء وسذاجه

(نعم هذا ماقال الإعلام والإقتصاديون عنه انه قادم .. إنه الغلاء الذي اجتاح العالم)

استفيغوا من غفلتكم

وتحيه للإعضاء الكرام جميعاً


قبل ان اختم هذا الرد

هناك نوع آخر من الغلاء يتمثل في تقليص كمية المنتج وليس زيادة سعره

مثال حي وواقعي

الخبز الإيراني .. أصبح بحجم اللبناني .. وبإتفاق كافة الخبازين الإرانيين

حسبي الله ونعم الوكيل​

 

[abo_ahmad_k]

والله المنحه هذي طلعت علينا عكسيه

والله يا الربع محل بالافنيوز يبيع اكسسوارات حريمي اسم المحل اعتقد اكسسواراتي حروفه مفرقه

دشت المحل ام عيالي تبي تيجان للبنات لقتهم على اربعه ونص

وثاني يوم بشرق ونفس المحل بتسع دنانير

يا تاجر ياغبي تبي تزيد زيد نص دينار او دينار تزيد الدبل

صج تاجر غبي وحمار