اسعار الاجارات نار... نريد حلا!!

[فهد الرشيدي]

الكويتي يبي دور كامل ب 400 ما راح يلاقي وكل صاحب بيت بتحكم بسعره طبيعي ما سكنت غيرك يسكن


الكويتين ما يبون شقق بحولي والفروانيه والمهبوله يبون شقق على البحر او مناطق سكنيه جديده وقريبه من الديره بسعر رخيص

الحكومه مالها تدخل بتخفيض الايجارات لان الوافدين يسكنون ويدفعون عادي

الله يعيين الي توه متزوج ويبي يسكن برا اقل شي 600 دينار

 

[بو عايد]

افادة قانونية
بالنسبة لرفع الايجار لا تتم الا بعد مضي خمس سنوات على العقد حتى لو كان العقد مسجل لسنة اضف الى ذلك لا بد ان تتبع اجراء قانوني صحيح والا لن تتم الزيادة ويكون باعلان رسمي للمستأجر ولذلك الزيادة عند الاختلاف بين الطرفين يتولى الفصل بينها القاضي
اما عن المشكلة او دعنا نسميها الازمة فالزيادات المهولة للايجارت السكنية الخاصة ترجع لجشع المواطنيين انفسهم فالحاجة تجعل المستأجر يرضى بالجشع للاسف الشديد اما المكاتب والوافدين اللي دائما نسمع انهم السبب الرئيسي في رفع الاسعار بالنسبة للايجارات فهذا السبب عار عن الصحة تماما

 

[Desert Eagle]

بحكم الناس اللي حواليني بقولك الايجارات

دور بسعد العبدلله 480 - 500 في قطع القسايم

وشقه بالجابريه تقريبا حول 400

الاسعااار ولعت فوق لذلك اصبح الطلب على المناطق الخارجيه خصوصاً ( المنطقه العاشره ) كونها خدمياً افضل من الجهراء فالنتيجه اصبحت زياده بالمناطق الخارجيه

ما نقول الا الله يعين اللي عايش بشقه

نصيحتي : اقعد انت واخوانك في بيت ابوك خله 3 ادوار وسرداب وحلل كل متر بالبيت واقعد واخذ بدل الايجار اقعد لما يطلعلك البيت او لما ربي يفرجها عليك وتقدر تشتري بيت

الله يعينكم اسعار البيوت فوق والايجارات فوق

 

[KaLeMaT]

اختي بالنسبة لحق المكاتب العقارية​

هو امر صدر بقانون من وزارة التجارة والصناعة​

والمكاتب العقارية مرخصة من الوزارة​

وتاخذ النسبة مقابل الخدمة التي تؤديها​

وعند البيع النسبة تكون 1 %​

وعند التأجير 50 % ​

وتدفع مرة واحدة فقط​

لكن المشكلة بغلاء الاجارات التي ندفعها كل شهر​

مو بعمولة المكاتب اللي ندفعها مرة وحدة بالعمر​

لا مو صحيح

عفوا اخوي

الترخيص يسمح للسمسار العقاري ان يأخذ 1% عند البيع

و تسمح للمكتب العقاري بإدارة عقارات الغير (تأجير و تحصيل إيجارات ...الخ) مقابل 5% بالمئة من قيمة الإيجار تخصم من حساب المالك

أما المكتب الآن فهو يأخذ 100% من قيمة الإيجار موزعة كالتالي:
50% من المستأجر
50 % من المالك
و هذه غير قانونية

و أتحدى اي مكتب يعطيك فاتورة عليها

و عند رفض الملاك دفع 50% للمكتب يقول المكتب خلاص انا اعرض بيتك مجاني مقابل 50% من المستأجر
فيرفع المكتب الإيجار لترتفع النسبة

فمشكلتنا في المكاتب العقارية فهي من رفعت أسعار الإيجارات

 

[حفيد المختار]

والله الاسعار نار مو بس العقار
كل شي صار نار

 

[ابوصالح]

والله ياجماعة الخير مااعتقد هذا اللي تقولنه صحيح

الايجار بمعدل 200 الى 350 دينار للشقق اما الطوابق فهذا مختلف

انا عندي شقه بس مااجر الا معاريس بس واجارها عارضها 250 دينار وفي منطقة مقبوله جدا والشقة شبه جديدة ونظيفه وديلوكس 3 غرف 4في 4 وصالة سمردحه 4 في 8 متر وحمامين ومطبخ وغرانيت وتكيف مركزي

لحد الان فاضيه بس تراني مااعلنت عنها بشكل كبير لاني ماابي الا كويتي بس ومعرس واللي يبيها حياه الله

 

[ابو فرحان40]

ارتفاع الأسعار جعل الكثيرين يبنون شقق بمنازلهم لتساعدهم على المعيشة ولكن هناك البعض من قليلي الذمة من يطلب اجارات غير معقوله او يرفع الإجار كل فترة لان قانون الإجار سقيم ويسمح للتلاعب من الطرفين لابد من حل لهذه للمشكله التي تسببت بعزوف كثير من الشباب على الزواج خصوصا ان البنات اصبحوا يطلبون الان شقق بمناطق معينه

 

[ابو فرحان40]

الكويتي يبي دور كامل ب 400 ما راح يلاقي وكل صاحب بيت بتحكم بسعره طبيعي ما سكنت غيرك يسكن


الكويتين ما يبون شقق بحولي والفروانيه والمهبوله يبون شقق على البحر او مناطق سكنيه جديده وقريبه من الديره بسعر رخيص

الحكومه مالها تدخل بتخفيض الايجارات لان الوافدين يسكنون ويدفعون عادي

الله يعيين الي توه متزوج ويبي يسكن برا اقل شي 600 دينار

اخوي فهد العمارات اغلبه تشطيب تجاري وغرف صغيره جداً والاهم ماكو مواقف وزحمة غير طبيعية لذلك يعلم اصحاب الشقق بالسكن الخاص ان الكويتي يفضل المناطق ذات اغلبيه مواطنين لتوفر الخدمات والمواقف والعلاقات الاجتماعية خصوصا اذا كانت قريبه من بيت اهله فيرفعون الإجار بمبالغ غير مقبوله

 

[ابو-راشد]

المشكلة شلون يزيد خلال سنتين اجار شقة من 300 الى 480.. لازم يكون فيه مراقبة.. لازم يكون هناك سقف ما يتعداه المالك يكون مبني على مميزات الشقة و المكان...

 

[فارس الجزيرة]

والله المشكلة في جشع الناس
تلقى الواحد توه متهني بالعرس بس ماعنده مكان بالبيت يروح هالايجارات اللي اقل شي ب250
ولو الحكومة موفره سكن للايجار لين يطلع له بيت يكون احسن
الواحد ينطر 15 سنة لين يطلع له بيت

 

[bujassim]

اي والله صدقتوا

وايد احاتي هالسالفه لان عن قريب بطلع وماعندنا بيت حسافه باعوه عالطل ولا جان بانيلي شقه
بس يالله جذيه جذيه انا طالع

 

[غروري^ ضروري]

ضربتوا على الوتر الحساس

انا اعتقد انه الحكومه لازم يكون لها دور بالموضوع يعني اهي تعطينا بدل اجار 150 واهمه يزيدون عليها 200 وفوق؟؟؟؟؟؟؟؟؟


لازم تحدد الحكومه الاجارات بعدد الغرف مثلا 3 غرف ب250 وغرفتين ب170 واللي يرفع اكثر من جذيه نقدم عليه شكوى والحكومه تنصفنا معاهه

للاسف الحكومه خلتنا لقمه سائغه للمؤجرين الطماعين لاعطتنا بيوت ولا وقفتهم عند حدهم

 

[ALI ALQAHTANI]

400 ×13.2 =5280 ريال سعودي بالشهر يعني بالسنة 63360 ريال مرتفعة الاجارات عندكم مرة
اخوي استأجرت له شقة 4 غرف ودورتين مياة ب14 الف ريال في السنة هنا في الرياض مافية شقة تتجاوز 20 الف في اي حي علما ان الطلب عندنا يمكن ضعف اللي عندكم
صراحة الله يعين المستأجرين عندكم

 

[محمد الخريصي]

الأيجارات بالجهراء ولعت والشباب عنده بيت العمر قسيمة 3 أدوار وسرداب وتارسها أيجارات

وبمنطقة سعد العبد الله ( جنوب الجهراء) حتى البقالات مأجرة ومخالفه والناس تأذت

ليش يأجر لأنه محتاج بس مايكون بهالطريقة شقة صغيرة 250 دينار خافوا الله

أنصح بالذهاب للبر وأاعادة ذكريات العشيش ههههه

الله المستعان..

 

[مواطن طبيعي]

وين الحكومه


والله حرام يعطونا 150 والاجارات من 300 وطالع ؟!!!



شالسالفه ؟؟؟ الديره فيها قانون والا مافيها ؟؟؟


بيت الحكومه طبعاً ننطر 15 سنه يمكن يطلع يمكن لا


زين بالفتره هذي وين ننعيش ؟؟!!!

 

[محمد اسماعيل ابراهيم]

بارك الله فيك

 

[الصبيه]

عندي اقتراح


الحكومة تبني بنايات في كل محافظة وبعد و مع كل منطقة حديثة تخصص فيها قطعه من


القطع مثلا ق 1 او 2 او 3 وتأجرها على فقط على المواطنيين وبسعر رمزي مناسب


منها المواطن يستفيد من السكن وسعر الاجار المناسب ومنها الحكومة تستفيد من الاجارات

 

[bujassim]

عندي اقتراح


الحكومة تبني بنايات في كل محافظة وبعد و مع كل منطقة حديثة تخصص فيها قطعه من


القطع مثلا ق 1 او 2 او 3 وتأجرها على فقط على المواطنيين وبسعر رمزي مناسب


منها المواطن يستفيد من السكن وسعر الاجار المناسب ومنها الحكومة تستفيد من الاجارات

التجار ماراح يرضون

يخسرون بهالاقتراح حيل

ف الحكومة ماراح تفكر جذيه

يكفي بدل اجار ال150


وخوفك يزيد 200 دينار تزيد الاجارات

 

[مواطن طبيعي]

التجار ماراح يرضون

يخسرون بهالاقتراح حيل

ف الحكومة ماراح تفكر جذيه

يكفي بدل اجار ال150


وخوفك يزيد 200 دينار تزيد الاجارات

خل يخسرون ويرتاح المواطن


والا التجار اهم من المواطنين عند الحكومه ؟

 

[النوفي]

الطمع والجشع مصيبه

الله يفكنا من الطمااااااااااعين

شقه ثلاث غرف وصاله وجلكم الله حمامين بالجهراااااااء علي 300 وين صارت

​