رد جريدة الشاهد --وهذا الرابط---http://www.alshahedkw.com/
====================
=========================
مسلم.. تعال لي بالوجه لا تلعب تحت الطاولة
Tuesday, 06 December 2011 وينك يا مسلم، قعدت انطرك، وانطر ردك عالسريع كما عودتنا دائماً، سريع الرد، سريع الثورة، سريع بتوزيع الاتهامات يمينا ويسارا، لم تترك أحد حتى نواب مطير لم يسلموا منك، أرهبتهم وهددتهم، منهم بورمية ومنهم حسين مزيد اللي خوفته باللي دزيتهم له ذيك الأيام وطاح قال قلبي يعورني.
وينك يا مسلم ليش اختفيت؟ اسئلة وجهت لك اياها ومن أدب الحوار الرد على الأسئلة أو تستعين بصديق أو تحذف اجابة أو الاستعانة بالجمهور كالعادة.
على طاري اختفاءك، يقولون من شهرين »Tiger« اختفى، وين راح؟
مسلم، تبي الأمور تهدى ومن ثم تدز لي مطاريش تبي تقابلني بالسر كما عملت أكثر من مرة؟ أمس الطاحوس وسعد العجمي اتصلوا أكثر من مرة بمحمد الملا بالليل عقب الساعة الواحدة، اشيبون؟ يبون يدشون وسطاء للتهدئة؟ واذا أنكرتوا نطلع برنت التليفونات، كما دخلوا وسطاء للتهدئة قبل رمضان؟
تذكر شاللي صار قبل رمضان؟ ما خليت سعد العجمي يقعد مع محمد الملا في أول اجتماع لك بمكتبك للتنسيق بين كتلة العمل الشعبي و»الشاهد«؟
واللي كانت نتائجها انك تجي تسوي مقابلة في تلفزيون »الشاهد« مع محمد الملا، وكان الاتفاق أن يأتي أحمد السعدون بعد رمضان وباقي أعضاء الشعبي بالوقت الضائع، بعد ما تاخدون الأمان، مو هذي جملتك لين تدخل الأماكن المظلمة تسأل: أمان؟ وهذا لم يكن الهدف الحقيقي، بل كان الهدف انك تجي التلفزيون بحجة اللقاء وتدخل علي بمكتبي كما يفعل جميع السياسيين، لكن أنا ركبت سيارتي وطلعت قبل ساعتين حتى ما أعطيك شرف لقائي.
مسلم، تذكر العام؟ تذكر سكرتير تحرير »الشاهد« المصري أحمد عبدالعزيز، تذكر لما طلبت منه لقائي وقلت له أنا اختلف مع صباح لكن أحيي شجاعته وجراءته؟ تذكر لما ضغطتم انت وأحمد عبد العزيز: خل نلتقي خل نلتقي، وقلت لك: شرفني في مكتبي، رديت: لأ، مكان ثاني، قلت لك: الديوانية، قلت: لأ خل نلتقي بمكان محايد، في مكتب المحامي ثامر الجدعي.
تذكر جوابي لك: من لم يتشرف بلقائي علنا، لا يشرفني لقاؤه.
تذكر لما دخلت غرفة الاجتماعات في مكتب الشيخ فيصل المالك وكيل وزارة الاعلام السابق، وكنت انا وهو مجتمعين، وكان معك مقدم برامج طلع مرة ومحد عرفه، وكنت جاي تتوسط يرجع يقدم برامج مرة ثانية وهددت فيصل وتزبدت عليه، تذكر كلمتك حق فيصل لما قلت له: اذا تلفزيون الكويت ما يبي أبناء الكويت الشرفاء احنا عندنا تلفزيون »الشاهد« وهذا الشيخ موجود؟
تتحرش فيني؟ تنافقني؟ كل اللي سويته ابتسمت بوجهك.
مسلم، ليش مصر تكون بوجهين، جدام العالم بوجه، وتحت الطاولة بوجه ثاني؟ عيب تحت الطاولة، انا ما أعرف حق اللي يشتغلون تحت الطاولة، ولا أحبهم، ولا أحترمهم، »Tiger« هو اللي علمك اللعب تحت الطاولة؟ هذي نتائج من يعاشر تايغر، اللي يعاشر قوم أربعين يوم يصير منهم.
مسلم، داز لي الوشيحي من موقع الكتروني إخباري مسميني شيخ الخضار؟ يعني عيب شيخ الخضار؟ هذا شرف. يعني اللي يشتغلون بالخضار وشركات الخضار من أبناء العوائل والقبائل كلهم عليهم (*)، والا بس أنا شيخهم؟
وشيحي، جيت اشتغلت عندي 19 يوم، كم عطيناك باليوم؟ ألف دينار انت ومعدك والا كم؟ في فترة الانتخابات اللي فاتت وما هقيت تمسك الفلوس طرت بلبنان تتمتع وتغندج حالك في لبنان، يعني شلون تتغندج؟ شتسوي؟ مفهوم الغندجة عند اللبنانيين لها أنواع كثيرة، انت أي نوع غندجة تتغندج بالفلوس اللي عطيتك اياها، وعقب ما صرفت فلوسي اللي عطيتك إياها بلبنان ورديت مفلس تبي تكمل برنامجك اشقلت لك؟ قضبتك الباب، لأننا اقتنعنا بأنك مدعي إعلام ولا تنفع، تبي تنتقم؟ تقول السجان دفع لي عقب ما تركني حاتم، منو حاتم ومنو السجان والا خايفين يرفعون عليكم قضايا؟ وأقول لك كل من يرى الناس بعين طبعه، كان انت وإلا مسلم، الله خلقني شيخ ولد شيخ أدفع ما يندفع لي.
استرجلوا، سموا الناس بأساميها، اذا كنتوا رجال، فأنا لا أختبئ وراء هذه الأقاويل يا وعيلي يا يامي يا من تقول انك عجمي، انا عجمي أكثر منك، انا خوالي عجران، العجمان »ألاد عجم« ان قاموا شياطين، وان قعدوا سلاطين، العجمان
لا يأتمرون بأمر من يدفع لهم، اذا كنت رجال ياوشيحي صف مع مسلم وتعال لي وجه لوجه والله لا أعريك، لأطلع سوالف مصر ولبنان، تبي نسولف سوالف الجيش وسوالف الثانوية وقبلها المتوسطة؟
وشيحي، كلُُ ُ يرى الناس بعين طبعه، أيام كنت بالراي كنت تمجد بودي وجاسم الخرافي ومرزوق الغانم، وتالي قلبت عليهم، ويوم كنت عندي كنت تدخل علي المكتب وتقول: شيخ شقول واشلون اقابل الضيف، ساعدني، نجيب منو؟ والحين قلبت علي؟ الحين من تاخذ تعليمات منه؟ ومن يوجهك شتسوي في برنامج »الشوك« على فكرة كم يدفعون لك في الحلقة في قناة اليوم، أكثر مني، ولا أقل؟
مسلم، أنا صباح، تعال لي كاش، تعال لي بوجهي، لاتدزلي مواقع وكتابات حتى خايفين يحطون اسم كاتبها.
عار، استرجلوا، بسكم شغل ولعب تحت الطاولة.
والله ولي التوفيق.
صباح المحمد