سؤال وجواب الخروج من المدنيه والدخول الي العسكريه

[تجمعنا الكويت]

بسم الله الرحمن الرحيم


السلام عليكم ورحمه الله وبركاته

والصلاه علي اشرف الانبياء والمرسلين سيدنا ونبينا محمد صل الله عليه وسلم


اما بعد انا واعوذ بالله من كلمه انا الحمدالله توظفت مدني بشهاده ثانويه عامه + دروه كمبيوتر 9 شهور وصراحه مثل ما انتو عارفين الحين بهالوقت العيشه بالكويت وزياده الغلاء الي صايره بكل مكان ومثل ما انتو عارفين المدنيه رواتبه خاصه اصحاب الشهادات القليله تكون صعبه عليه العيشه وحاليا لو تبي تزوج اكيد تبي تاخذ قرض زواج لانه مثل ما انتو عارفين قرض الزواج الي تاخذه مايكفي لانه المهور صراحه غاليه عندنا علي ست الاف وانت صاعد المهور تاخذ قرض من البنك ويقعد يخصم نص معاشك شلون راح تعيش بالمستقبل ووانا صراحه مفكر اني اطلع من المدنيه واقدم علي العسكريه واصير رقيب براتب ضعف الي اخذه من المدنيه وطبعا مثل ماانتو عارفين هالايام قاعد نشوف امتيازات حلوه قاعد ه تصير حق العسكرين من زيادات وحق الي يتقاعد معاشات سنتين مقدما

بس انا سؤال الاهم الحين انا صارلي موظف مدني 4 شهور هل بامكاني ان استقيل من وظيفتي واقدم علي العسكريه معا العلم انه عمري لغايه الان يسمح بدخولي العسكريه

​

 

[بن ذى يزن]

لا تقدم استقالتك
قدم على العسكريه
واخذ من المدنيه اجازه رصيدك كله ٦٠يوم
ودش الدوره قدرت تكمل خل استقالتك عند المدير
وقوله موضوعك وعط اخوك وكاله عامه يراجعلك
باستقالتك قبل لا تتخرج

بس لحظه

احسبها عدل ترا العسكريه عكس حريتك
يعني ممكن راتب وتقاعد مبكر
بس احسب حسابك انك تعيش وتاكل وتنام وتروح بيتكم بكيفهم مو بكيفك
(.....................................)

 

[بو اسماعيل]

الداخلية يدورونكم

يصير و الوضع طبيعي

المهم لا تستقيل قبل تضمن قبولك بالدورة

 

[بدر الروقي]

العسكرية التزام طول ماتلتزم والله محد يقدر يقولك شي بالعكس راح تدلع لكن الغياب وعدم الانظباط يطبق عليك القوانين العسكرية

 

[joblak]

انحش
:باكي:
​

 

[سطام الظفيري]

نصيحه ​

كمّل جامعه ​

العسكريه لعنت مترس صحيح معاشاتهم قويه​

بس يطلعونها من خشمك


والله يوفقك ​

 

[فهد3000]

عليكم السلام ورحمة الله وبركاته،،،


اخوي انا عكسك كنت عسكري وراتبي 955 ودوامي 4 دقايق عن البيت واجازات ودوام خفيف،،،

بس تبقى بالنهاية عسكرية يكفي عقوباتها 1_حجز 2 _ توقيف(سجن بالدوام)

3_ خصم 4 _ سجن عسكري 5 _ حرمان


يتفنون بتعذيبك النفسي ،،،،


وقدمت استقالتي والحين ان شاءالله راح اتوظف بالجمارك ،،،

وعندي استعداد اتنازل عن نص راتبي في سبيل الحرية وماادراك ما الحرية،،،،،


لاتقول المعاش مايكفي اذا الله بارك بمعاشك ثم عرفت تدير امورك المادية صح راح يكفيك



المدنية تاج على رؤوس المدنيين لايراها الا العسكريين

 

[بقيييط]

قبل لا ادش العسكريه الله لايهينك حط كرامتك عند اهلك

​

 

[kwt.store]

اذا ناوي على العسكرية
عليك بالحرس الوطني

كلهم كويتيين
تصوت بالانتخابات
تقدر تكمل دراستك عندهم

 

[Bader1974]

ادخل عسكرية ولا تفكر

كافي ان العسكري يقدر يتقاعد عمره ٤٠ سنة

مو مثل المدني يتفاعد عمره ٥٥ سنة وكل يوم بصمة

وبيني وبينك العسكرية راحة عندنا بالكويت مو مثل الدول الثانية

 

[الديفي]

انا جربت العسكريه "بالتجنيد" والمدنية

العسكريه كنت تحت ضغط نفسي كبير
من الصبح بالـ 7:15 نوقف بالطابور بالساحه سواء بالصيف الحار او الشتاء البارد
واذا امرنا نفسيته تعبانه يـزفـنـا ويسمعنا كلام مطول ويتركنا واقفين بهالحاله

وبالعسكريه البدون العسكري يـزفـك ويتفنن بإستفزازك يعني يقولك وقف لا تمشون ماراح تطلعون من المعسكر وهم واصلين عند الرتب الكبيره

لكن الحسنه الوحيده التقاعد المبكر 40 سنه

اكره شيء كنت اكرهه هو ان قبل نهاية الدوام يأتي امر حجز لكامل القوه وخلاص تشوف العسكر رايحين يتغدون بالمطعم.. وانا اشـتـعـل من داخلي اريد افــارج هالمكان ..
هذا غير المناورات تنام بالخيمه بس فيه بوفيهات وسفرات لدول الخليج اذا فيه مناورات مشتركه

المدنية:
راحه المدنيه دوام فلاتي.. حتى اللي عندهم بصمه يبصمون ويزرقون للكافيهات بالمجمعات او يروحون البيت ينامون!
الراتب مقصوف اي ضعيف والتقاعد لما تصير مومياء


اعرف شخص كان مجند معاي حب العسكريه والتحق وصار عسكري. واعرف شخص كان بالبترول راتبه محترم ترك البترول والتحق العمل بالوزارة قلت له في واحد يترك البترول؟ قال ابي اشتري راحتي!

 

[الكتالوني]

هههههههههههههههههههههههه
تبي تطلع من المدنيه وتدش عسكري ؟

هههههههههههههههههههه

لا لا ماني مصدق
انت ماخذ الدنيا بالشألوب ؟ :باكي:
تبدلني وازيدك ؟
صارلي سنه ونص وانا طالع من العسكريه وعندي عايله وناطر اسمي بالديوان
ابي اي مكان لو معاش 300 وااااااااااالله نعمه
لا اطمح بشيئ غير الكرامه
العسكريه اول ماتدخلها راح تسأل اول سؤال :
وين حقوق الانسان عنهم ؟

 

[تجمعنا الكويت]

واختلفت الاراء اشكر الجميع علي الردود والي الان الفكره تدور برأسي علي العموم شكراا جميعا ....

 

[Q8 1]

اذا معزم وعندك ظروف روح الجيش او الحرس عندهم اماكن ممتازه
الداخليه الحين متعبة جدا
فى المناسبات وقت ما الناس تفرح وتطلع وتزاور الشرطه محجوزين
وفى العطل والاعياد مثل راس السنه والعشره الاواخر والعيدالوطنى وبدايه المدارس
واى حدث انتا فى العمل
دوام شفتات وتواصل اجتماعى صفر صحيا صفر ماديا صفر كله مطاعم وبانزين
اكثر الاقسام تعب هى دوريات المرور والنجدة والقوات الخاصه واهى اقرب اماكن تتوزع فيها بعد التخرج
<< الكلام لصاحبى فى المرور

موفق الله يعينك

 

[تجمعنا الكويت]

اشكرك ياكويتي والله الحمدالله مافي ظروف صعبه عندي ولكن يوميا نعيش غلاء مو طبيعي ماتدري بعد سنه سنتين يزيد هالغلاء ويصير راتبك يالله يكفيك ربع الشهر بعكس العسكريين قاعدين نشوف لهم امتيازات كل بين فتره وفتره يحببون العالم فيــــــــها

 

[تجمعنا الكويت]

قبل لا ادش العسكريه الله لايهينك حط كرامتك عند اهلك ​

يعني تبي تقولي انه العسكريين جميعهم مالهم كرامات ياخي شهالمنطق الي بعقلك

كنت قاعد معا نقيب مغوار يوما من الايام وسئلته عن هالمقوله هل صحيح انه العسكري ماله

كرامه رد وقالي الي يقولك هالكلام حط اصبعك بعينه :وردة:

 

[jassem]

اهم شى تشترى راحتك يا اخوى .. اهم من 400 دينار الزياده الى يطلعونها من حديده جبدك .. ويجرحون كرامتك فيها .​

انا معاك وكلامك كأنه قاعد يدوس على جرحى الأليم ​

فعلا غلاء اسعار جنونيه والزواج فى الكويت صار لمن استطاع إليه سبيلا .. والحياه صعبه صارت .. بسبب حقاره التجار فى الكويت ​

لكن تقدر اتكمل دراستك .. فى الجامعات وفى المعاهد او الدورات او الدراسه فى الخارج . الطريج جدامك مفتوح من غير مطبات هوائيه ​

وموفق موفق ياخوى ​

ونته تريد وانا اريد والله يفعل مايريد​

.​

 

[بدر الروقي]

السلام عليكم اخوي ترا حنا بالكويت والعسكرية بالكويت فرق عن دول ثانيه نحمد الله والله عايشين بنعمه وبعدين اذا انت رب اسرة لازم تتعب وتكشف عشان اهلك وعيالك مافي شي والله دوام يتعب ولا ابي دوام مريح شوف رزقك وين وروح واهم شي التزام تام والله راح تعيش ملك في العسكرية لكن تمرد وغياب وعدم التزام راح تتعب أنصحك ادخل وشوف رزق بكرة تتقاعد وانت مرتاح والتعب منسي هاذي الحياة اذا ماتعبت وانت بعز شبابك متي تبي تتعب عشان عيالك
الله يرزقك ويوفقك