>>>>>>>>
ياحى الله بو صويلح وسوالفك المملحة
منور ياوحش الشاشة والطباخ
ههههههههلايبه راح بالك بعيد لا والله مااستدرجك
ولاعرفك ولاقصور والنعم فيك ..ولكن
(كل على جيله يطرب .) .دامك من جيل الطيبين
وايام سبوت راحت وبقت ذكرى جميلة من زمن اجمل :باكي:..
ايامها كانت هبة اغلبية الشباب والربع الرائعين اللى حسبة الاخوان وعلى قلب واحد .
.هههههههه اتذكر ايام سبوت فى الثمانينات ..كنا نمشى وى بعض خاصة بالطلعة من الروكى ..على البحر .
.تذكر بو صالح .. الغابة الكثيفة المظلمة لين توصل للشارع العام علشان ناخذ تاكسى للسكن .
.نطلع وى بعض ستة او ثمانية علشان فى قطاع طرق من العتاة والمجرمين اللى متعلقين فى الاشجار
اذا شافوا اى كويتى او سائح بروحه
يهجمون عليه وفيهم يرشون بخاخ مخدر علشان يسلبون فلوسه ..فكنا نحذرهم ونمشى وى بعض
علشان يهابون من كثرتنا ..
اغلبية السواح كويتيين وقلة ليبيين..السعوديين كانوا ممنوعين بسبب ان بولندا كانت دولة شيوعية
وكانوا الاماراتيين للتو هابين بالسفر وقلة هناك .
وتدرى الكويتيين بالطنازة خبرة هههههههه ..
والامارتى الخال كان لابس جينز ..
عاد الكويتى اثناء نجرته وياه رد عليه :
ياعمى طيير انت وى الجينز اللى لابسه اقص ايدى اذا
مو لابس تحت الجينز ..وزاار .
والنعم فى عيال المزين ولكن ماتذكر المطينة لكونى ليس من اهل خيطان ولم اسكنها .
.بيتنا قبل فى المرقاب فريج المطران المتفرع من الفريج الاكبر المسيل
وقرب مسجد المطران وانا من مواليدها وعشت طفولتى فيها
لين تثمن البيت وهدم..وكانت احلى ايام ..:باكي:
خيطان كان شباب كشافة مدرسة عمر بن الخطاب
يخيمون ويانا بالمعسكر الكشفى .وكانت احلى سمرات ..
ايضا خيطان علاقتى فيها ان البعض من ربعنا واصدقائنا طلعوا
من المرقاب وسكنوا خيطان فيهم من طلع لهم بيت حكومة
فى بيوت التركيب شمال سينما غرناطة وفيهم من اشترى هناك
بعد تثمين بيوتهم ..وكنا نزورالاصدقاء ربعنا
اتذكر سوق خيطان القديم فى السبعينات وكان سايد وطريق واحد فقط لمرور السيارات ..
لانه كنت وى اخوى العود بسيارته وكان ماتم 18 سنة وماعنده ليسن وفوق هذا دش بالغلط عكس السير .
.ماحسينا الا بويهنا جيب شرطة الاسود القديم المفتوح الابواب وفيه ضابط شاب ملازم نجمة
واللى يسوق حارس اسواق شايب كاشخ بالشماغ والعقال بشعار والبدلة .
.الضابط سامحنا لكوننا مو من اهل المنطقة وماندرى انه سايد واحد ...
ولكن الحويرس عصب و استخف علينا وقعد يلقى علينا محاضرة قانونية
والملازم يطالعه ويتبوسم ويقوله خلاص سامحهم يابو فلان .وطاح الحارس فينا زف وتجعم .
.كان حارس الاسواق وقتها هيبة ويخووف بمثابة قائد منطقة ..
اخر شى بشق الانفس سامحنا الحارس مرددا لاخوى :
لاعاد تعودها يالهيس الاربد وتسوق بلا ليسن
الله ياخذ هالوجيه الباااارده ..
كنا نضحك على حماس الحارس .وشكرا عمى الحارس
ونردد بسريرتنا : هذا وانت بو الفشيش .لاانت من الشرطة ولا انت من الجيش ..
اعتقد مكان سوق خيطان القديم ..حاليا البراحة الكبيرة المقابلة لمخفر خيطان
ومجمع الدبوس والمحاميد ..اعتقد او ممكن مخطئ ؟؟!!
تحياتى :وردة:
الله يحيك ويبجيك يابوطلال
ههههه
ذكرتنا بالروكي عسى الله يغفر لنا ولك يابوطلال ههههه
تذكر البودي قارد ماله الشاب اللي مجسم هههه ياحليله هذا كان صاحبنا ويحترمنا ونحترمه لاننا نبتعد عن المشاكل
كنا نتعاون معاه ضد الليبيين اللي خبرك كل يوم جايين ويتهاوشون من غير سبب
تذكر اهل التكاسي بالليل هههه
والله كانوا يعرفون شقتنا من غير مانقولهم هههههه
اتصدق بوطلال مرة طلعنا من الروكي والبنكه وقتها لك عليها هههه جان نروح من صوب الغابه ونضيع ههههههه والله ماردينا الا من يوم صار الوقت متأخر
على طاري السمرات في خيطان هههه لاتخليني اطلع الخماجير مالتنا هههه بس يالله نبي نضحك شويه
كان عندي عود وشاريه من السبعينات ب 70 دينار من محمود الكويتي وراعيه سعود الراشد الله يرحمه وكنت اعزف عليه
كل مانسافر ناخذه ويانا
وديناه ويانا لسبوت وحولنا السهرات بالشقة وصارت هيصه وزنبليطه حتى الجيران قاموا يسهرون عندنا ونشوي لهم ونعشيهم ههههه
تصدق هههه من يوم سافرنا ضاقت خلوقهم وقالوا متى تجون مرة ثانيه
شافوا الاكل والطرب والشرب ببلاش والضحك والسوالف بالاشارات ههههه
الله من مرة اكلنا من المطبخ تالي الليل من اكلهم هههه تدري ماكو مطاعم ولامحلات
واحد من الربع بالصبح يبوق الحليب اللي عند البيبان ههههه
وين ذكرتنا بسوالف عميه صج
عسى الله يغفر لنا قول امين
اما سالفة الوزار الاماراتي فهذي صعبه ههههه
قبل ترى مانلبس السروال الطويل وقت الظهر ودايم بفنيله ووزار
اما اذا انت من مواليد المرقاب يعني انت من مواليد سنة 1945 هههه الناس طلعت منها 1955 تقريبا وراحوا منطقة واو يعني الدسمه وبعضهم الفيحاء وبعضهم خيطان والقليل منهم راح الفروانيه والاغلبيه راحوا الشاميه مثلنا لمن ثمنت وبعدين ثمنوا الشاميه ورحنا خيطان
سوق خيطان طال عمرك اوله انا اقولك
شفت المسجد اللي بالبراحه اللحين اللي قبال مجمع الجيعان
ماكوا غيره هذا المسجد لحد اللحين يعتبرونه اثري ولم يتم ترميمه
هذا المسجد وانت جاي من دوار المخفر وحاط هذا المسجد على ايدك اليسار عقبه فيه لفه على اليسار
هذه اللفه وانت رايح الى مجمع الدبوس اهو سوق خيطان بالضبط
كانت البيوت اللي على اليمين اول سوق خيطان كلها لبوي وعمي وقاموا الله يرحمهم يقسمونها ويبيعونا
اما البراحه اللي انت تقصدها امام المخفر هذه نسميها براحة اعزكم الله البقر ههههه
قبل دايم نمشي حفاي وندوس على خروج البقر اجلكم الله ههههه جهال صغار
اما بيوت التركيب هذولا توهم مسوينها في اول السبعينات
اما حرس الاسواق فكان لهم هيبه وقتها وبعدين شوي شوي حتى صار الضباط الكبار اللحين لايحترمهم الكثير من الشباب ومع الاسف الشديد ان يكون ذلك
