http://www.alshahedkw.com/index.php...le&id=80251:---33----&catid=478:01&Itemid=457
بعد ارتفاع اسعار الخرفان والأسماك بالكويت حيث وصل سعر متوسط الخروف العربي 120-150
(علاوه بدل الغلاء احيانا ماتجيب لك طلي)
ووصول سعر الأسماك المحليه والمستورده لمستويات قياسيه
(اضعاف الزيادات برواتب المواطنين)
وبعد نسيان معظم العوائل الكويتيه طعم اللحم العربي واستبداله بالمستورد وبعد نسيان طعم الزبيدي الكويتي واستبداله بقواطي التونه والساردين
سيطال هذا الارتفاع الدجاج والبيض ويمكن يجي يوم الكويتي بدال مايشتري الدجاج بالكرتون راح نشوف (ملاحم دجاج مجمد) هذا ياخذ فخذ لعائلته والأخر ياخذ صدر لوجبه الغداء واللى ماعنده عائله راسه وراس زوجته ياخذ جناح يمزمز فيه
سألت احد التجار وقلت له ليش ياطويل العمر بترفعون الدجاج والبيض؟
قالي
الزمن تغير والحين الدجاجه تبيض بمستشفى خاص والديك ندزه يدرس برا
وفرخ الدجاجه من يفقس نحطه بحضانه لغايه مايكبر
فالتكاليف ارتفعت علينا !
نصيحتي للمواطن الكويتي اللى على قد حاله من الحين يعود نفسه ويعود عائلته يخلي
يوم بالأسبوع الغدا عباره عن فول وجبن وشده جرجير مع طماطه وقلاص ماي
قبل الطفره الماليه اذكر كنت اخذ الطلي العربي بـ28 دينار واعزم عليه الربع عشا بالمخيم
والحين عقب الطفره الماليه اخر عشا عزمت عليه الربع برياني من مطعم هندي
مال مضخه جبد
يارب تنهي هالطفره الماليه اللى ماأستفدنا منها الا المشاكل والنهب والسرقات والأسعار الجنونيه وتبيد ارصدتهم اللى جمعوها بالحرام