يامل قلبٍ خذاه الهم وخذ القوم
مع كل طِرقه.. يجيه الهم قدامه
لا ماحلالي سهر ولا حلالي نوم
كدّر عَلي عيشتي والليل ما نامه
وإليا غفة نص عيني .... كنّه الجاثوم
يبرك علي الصدر وكنّه يغرس أسهامه
ياليتني ما عرفتك يالسياسه يوم
واللي عرف دربها ياطولها ايامه
أثر السياسه بحر غدار لهل العوم
كم واحدٍ راح في بطنه بعد عامه
ما ينومن بحرها ....... لو السفينه بوم
وش عاد من دشها يمشي علي اقدامه
شفت المواقف تبدل مثل لبس إهدوم
في كل يوم الرجل .... يذبّ هندامه
احدٍ تخلّا عن اللحيه وخلّا الصوم
خلا نهاره ... وخلّا الليل و إقيامه
من عقب ماكان فوق المنبر المعصوم
غيّر مكانه ...... و كنه منتهي زامه
واحدٍ نعدّه صقر واثره ولد للبوم
وقت المواقف يلين و لانت عظامه
في وسط قاعة شعبنا كنًّه المنجوم
تايه و رايه غدا ما يسعف إلهامه
واحدٍ تخلّا عن الدستور لهل السّوم
من اجل بضعة دراهم يعلن اعدامه
باع الوثيقه و همّه يقبض المعلوم
من بعد ماقال انا الدستور خدامه
لا تامن الحي وخلّه فالزمن مبروم
إمّا طلع حر والا من حطب دامه
واحدٍ دخل مجلس الامه وهو محكوم
سيئ سلوكه ولكن .... حقق احلامه
من عقب ماكان خادم اصبح المخدوم
جاته على ما تمنى .... فزعة اعمامه
هاذي نماذج لنوابٍ تسمى رخوم
وماعندهم مشكله لو قيل بصّامه
لاجل المصالح حكومتنا تبيع إسلوم
منهج فساد الوزاره معلن إجرامه
واللي ثبت في مكانه للشعب معلوم
معروف واضح لنا ما نكس ألهامه
ما هم قليلٍ و لكن وضعهم مفهوم
حربٍ عليهم من الفاسد مع إعلامه
إعلام فاسد يسمّون البطل مهزوم
كذبٍ و تدليس وفالاعراض هجّامه
في كل يومٍ نشوف انواع طير الحوم
تاكل في لحم الذي دافع عن إسلامه
الخوف من ربنا في هالبشر معدوم
مرضى قلوب العرب ياكثرها اسقامه
مع ما جرى ما تغير ثابت الزيزوم
فوق الجبل حطّها وترفرف أعلامه
كل مابنا فالبلد .. بنيان جا مهدوم
من سبّة الحاسد اللي كثرة انعامه
كنه ليا شاف نهضتنا تقل ملطوم
بالوجه و محوّل بتسعة عشر قامه
هو يحسبن العمر ماينتهي ويدوم
ماظنتي نفسه اللي ... قيل لوّامه
ياللي تشيل الحمل واطيح ثم اتقوم
غيرك على حملها ... يقدر و ببهامه
إشعيل شال الحمل فوق الظهر مردوم
واثر الذي شد عفشه.. ناسي اخطامه
ماني بظالم ....... ولكني انا المظلوم
من عرض شعبٍ يعيش اليوم باوهامه
كلمه ونشبة مع بو بخيت فالبلعوم
ودّه على قولها .. لمن جهّز خيامه
زولك عقب مانجحت العام يالموهوم
ماظنّه ابينشرى لو جبت سوّامه
وعورتك بانت وبشتك للخصر مزموم
عاري ولو كان جسمك ساتره خامه
هاذي همومٍ علي وكني المدعوم
أفكها والحديد ... إيفكها إلحامه
بو بخيت
Twitter@BoBaKeeT