السلام عليكم ورحمة الله وبركاته ..
لنبتعد قليلا عن الحوارات التي تسمى مجازا سياسية و فقا لسياسة العرب البسيطة و
التي يعتبرها عامة الشعب عادة سياسية وهي لاتعدى كونها اراء شخصية وتخمينات
ومزاجية في الاختيار لا تعتمد لا على اسس و لا معايير ثابتة ومحددة وواضحة ..
وحتى لا يكون الكلام جامدا و حتى يكون مباشر اكثر اليكم هذا الموقف
(( بس لحد يصفط فيه )) .
:
:
:
ترن ترن
المتصلة : السلام عليكم
أم فلان : وعليكم السلام
المتصلة : معاج أم علان العلاني - اللجنة الانتخابية النسائية للمرشح الفلاني
ام فلان : حياج الله ،، خير ان شاء الله
المتصلة : بس حبينا ندعوج حق الندوة المقامة في اليوم الفلاني ، المكان الفلنتاني
الساعه العلانية ، حياج الله وراح نكون سعداء اب وجودج و هذي فرصة نتعرف علكم فيها اكثر و
تتعرفون فيها على مرشحكم و انجازاته في المجلس سابق و خطتة للمجلس القادم .
ام فلان : لا لا ، احنا ما نبي نصوت ولا شي ، اشفادونا فيه النواب ، أنا كنت ابي هالنائب ينقل
بنتي من مدرستها الي تدرس فيها لين بيت التمويل لانها ملت من التدريس وما سوالنا شي .
و ولدي كان مفصول من المدرسة رحنالا نبيه يتوسط لنا عند الوزيرة هم ما سوالنا شي و بعدين
تعالي نائبكم العلاني ضد اسقاط القروض و احنا الصراحة ناس مديونين لان الصيف اللي طاف خذينا
سلفة سافرنا فيها فرنسا و ايطاليا و النمسا ،، و شرينا سيارة كايين حق بنتي بعد حرام تروح
الجامعه يزوغ قلبها من المواتر (( توني متعلمة الكلمة من اخوي )) و تحس بالنقص فلازم
اندللها هووووووو .. و لا شرايج ؟؟ و شسمه نائبكم ما سوالنا فرع بالمطقة و لا حتى
حط مظلات سيايير حق بيوتنا .. سياييرنا اذبحتها الشمس .. و بعدين تعالي ليش نائبكم
ما وزع علينا هدايا برمضان والعيد .. و ما الى ذلك (( حلوه وما الى ذلك ها )) ..
يعني نائب و نائب ولا شفنا منه شي .. !!!!!
طبعا المتصلة ويها بالضبط صار >> .. هااااااااااااا
بس اختي انتي تعرفين شنو وظيفة النائب و شنو دورة بالمجلس ولا هالشغلة خافية عنج ..
المظلات حق سياييركم .. شوفيلج اي شركة بالوسيط دقي عليها و حطولكم مظلة
و القرض الي ما خذينا عشان تسافرون و تدللون بنتكم هذا مو مشكلة لا النائب ولا مشكلة الدولة
وكل واحد يمد ريله على قد كمبله اقصد الحافه .. !
و بعدين يا اختي الفرع الي تبونه بالمنطقة هذا مو شغلة النائب يوزع عليكم ورقة ويسألكم شنو
تبون حق المنطقة لان النائب دورة في المجلس تشريعي يعني يساهم في اصدار قوانين
وتشريعات تنظم الديرة وتساهم في عملية الاصلاح ..و المفر..
قاطعتها
ام فلان : فكيييييييييييييييينا زين ولي عافبج من هالكلام الفاضي النائب اذا ماراكض لنا و حق
عيالنا اشخانته عيل بالمجلس احنا ليش معطينا اصواتنا .. حلاااو السالفة ولا نلعب !!
المتصلة : يا اختي انتي سمعيني و عطيني فرصة اتكلم كليتيني بقشوري الله يهداج ..
المفروض نغلب مصلحة الكل على مصالحنا الشخصية ونهتم بنحن مو بالأنا ..
يعني نغلب مصلحة الكويت و نشوف النائب شنو قدم حق الكويت وحق الشعب ككل مو شنو سوا
حق بنتي و ليش ما رجع ولدي حق المدرسة ..!!
اذا كانت معايير اختيارنا للنائب اهيه شنو سوالي انا و كل واحد ووحده بينظرون للمسألة من منظور
شخصي فهني على الديرة السلام ..تقولي نائبنا ما سوى شي صح ..
ام فلان : اي ما سوى ولا شي ولا خدمنا
المتصلة : هل اطلعتي على انجازاته بالمجلس السابق ؟؟ اتوقع اوصلت لكم الاعلامية صح ؟؟
ام فلان اي بس من الباب لي الزبالة وانتي بكرامه ،، ما أحب اقرى
المتصلة : الله يهداج ما تبين تقرين ولا تبين تحضرين محاضرات و ندوات ولا تبين تسمعيني
عيل شلون حكمتي ان النائب ما يشتغل ولا سوالكم شي ؟؟
نزين تسمحين اختصر كلامي و انهي اتصالي معاج بسؤال و ان شاء الله التقي معاج بالمقر و حياج
الله
ام فلان : اي تفضلي بس لا تطولين بروح اشوف الكيكة بالفرن لا تحترق
المتصلة : اي خير ان شاء الله ،، بس شنو مواصفات المرشح بنظرج الي لى اساسها انتي
تصوتين ؟؟
ام فلان : والله .. والله .. مممممممم .. مممممممم .. ما في اتصال بصديق او حذف اجابتين
و لا تدرين شلون .. الكية احترقت بروح الحق عليها .. يالله مع السلامة اشوفج بالمقر
و يصير خير ..
جك .. سكرت التلفون
المتصلة : عفية عقلية على هالناس .. تبي تصوت و اهيه اساسا مهيه عارفة
شنو مواصفات وماعايير الاختيار حق المرشح الي تبيه او المرشحة (( بالمشمش طبعا ))
:
:
:
طبعا مشهد مادري موقف خيالي لكنه يصير وايد و بشكل كبير خصوصا عن الحريم ..
الوحده او الوحد يبني قناعه ما تعتمد على اساس و لا تى معيار معين وانما يا امه نظرة
شخصية بحته .. او قناعات مبنية على قيل وقال ووكالة يقولون ..او على المزاجية (( أنا
هالنائب مو داش مخي !! )) .. مع ان المفروض الواحد يحط معايير معينة ويبدي يقيس
النواب عليها وعلى اساها يختار .
و السؤال لكم اهوه ،، شنو مواصفات المرشح الي تختارونه بنظركم و شنو معايير
اختياركم للمرشحين ؟؟
عابرة