ليش بالله ما تبينا نصاب بالاحباط!!!!
علشان تتوطف..يبيلك تنتظر بالدور طابور و لا طابور المخابز ايام الغزو
علشان تحصل على بيت العمر.. لازم تتنف عدل و تنتظر 16 سنة و تتشلخ و تزوج عيالك و بعدين يمكن يعطونك
علشان تتتع بالرعاية الصحية لازم تشوف لك واسطات الدنيا علشان تحجز موعد عند طبيب الاسنان او لاجراء اى عملية او حتى لصرف دواء معين...
و حتى لو كنت صاحب حق و محتاج فعلا للعلاج بالخارج..لازم تسحب معاك نائب من صباح الله خير و تخليه يعابل فى موضوعك
علشان تروح تجيل من الجمعية لازم تحتمى و تطلب مساعدة ام العيال فى تحمال مصاريف حرب غلاء الاسعار
علشان تروح دوامك مبجر.. لازم تطيح بازدحام ما تطلعه منه الا بعد ساعتين ..هذا غير اللى يبى يودى عياله المدارس و يرجع ياخذهم
علشان تطلع من البيت لاجل الترفيه ما لك الا 20 كيلو متر ( واجهة بحرية) و شوية مطاعم
علشان تخلص لك معاملة عادية فى اى وزارة من وزارات الكويت..تحتاج الى اسبوع كامل من الروتين الممل وبالاخير يرتفع ضغطك و ما يخلصون شغلك
علشان تروح تخيم انت و اهلك.. لازم تسافر السعودية حتى تلقى طبيعة عذراء ما وصل لها البانشى
لاو تعبى سيارتك بالوقود من السعودية قبل ما ترجع الكويت..لان الوقود عندنا اغلا مع اننا دولة نفطية
و بنفس الوقت بعد تشترى حاجياتك من هناك مرة وحدة لان الجمعيات عندنا ما ترجم و اغلب اعضاءها حرامية
لا رياضة و لا سياحة و لا وناسة
و هم ما تبوننا نصاب بالاحباط؟!
لا يكون على بالكم كل الكويتيين عندهم شاليهات و مزارع بالعبدلى و يواخير( قصور) فى كبد و ارصدة و ورث يقدر بالملاييين و كلنا ساكنين الضاحية و مدخول غير المعاش و سيارات تتبدل كل 6 اشهر؟
لا تقولون حساد و حقودين.. لكن لو عبرنا عن شعورنا بالاحباط كفوا السنتكم عنا خلونا نعبر عن حالة الاحباط على راحتنا
و على فكرة اتوقع ان المواطن الصومالى افضل حال منا
لان المواطن الصومالى ما عنده زحمة شوارع و لا عنده علاج بالخارج و لا طابور ديوان الموطفين و لا ازمة غلاء اسعار و لا ينطر 15 سنة للرعاية السكنية..و لاعنده ساحل بحرى مسيطر عليه من قبل 5% من الصوماليين و لا يروح يخيم و يشترى من بره ديرته..ولان اصلا ما عنده دستور فيه تكون الدولة ملزمة بالتوظيف او بالرعاية السكنية او الطبية.. علشان جذى مو متأمل شى من الدولة و مريح باله و لا بحاجة الى انه يستعين بالنواب علشان يمشون معاملات....و لا حتى عندهم امراض الضغط و السكرو لا عندهم ناس عنصرييين و طبقييين... كلهم حلجان ملحان و فقارة مثل بعض.. و لا عندهم ( ولد بطنها ) و لا (حديثى العهد بالصومال)
بس يمكن احنا احسن منهم لان عندنا كاكاو
..خلونى اروح اكل كاكاو ..خوفى ييي اليوم اللى يمنعوننا مه بعد