يوم رحت مجمع الكوت

[سليل الجود]

اليوم بعد صلاه المغرب ​

وقاعدين على الكراسى ونتقهوى​

وسوالف على هالجو الحلو​

قال لى واحد من الربع بروح للكوت وابيك تخاوينى​

قلت له يا ابن الحلال​

انا اخر مره طبيت السوق قبل 13 سنه ​

قال يارجال مشينا بس​

المهم​

ونروح للكوت هذا اللى على البحر​

وين قبل المسمكه القديمه ​

تتذكرونها ؟؟​

ترى شالوها وحطوا الحين بدالها مجمع​

<< واللى يرحم والدييييييك!!​

المهم وندش المجمع والا زحمه​

امّا فى عيال صغار مشاخط فى هالمجمع​

واصناف من هالناس رايحه رادّه​

المهم​

فى ولد عمره يمكن 10 سنوات يا حلوه وياحلو شكله ​

متين شوى ودشداشته ضيقه من المتن​

وكشته نافشه وبشرته ممشقه​

الله يعزكم فيه طبع حلو هالولد ​

طبعا ما راح اقوله عشان الذوق العام ​

جان يمسكه واحد من السيكورتيى المصريين​

قال له : انت بتمشى وبتعمل كده ؟؟ امشى اطلع بره​

قال له الولد : انت شششنو تتببى كييفى . سوق ابوك هو ؟​

يعنى ما شاء الله عليه شخصيته قويه هالولد وحبيّته​

قال له الموظف المصري : ايه القرف ده ؟​

قال الولد : مانى طالع انت ووجججهك يالمصري اذلف اذلف​

المهم جان يمر صوبى هالولد اللطيف​

قلت له : تعال حبيبى أنت شنو اسمك ؟ ​

رد علىّ بصوت حاد : وانت شعليك ؟ ​

قلت له : تكلم عدل لا اقطّع العقال على ظهرك مع نظره مرعبه ​

قال : اسمى جمعان​

فديت جمعان انا ياناس​

واقعد اسولف معاه ​

ياحلو سوالفه والله ولا ادرى وين اهله عنّه​

قلت له : شاللى يايبك المجمع ؟​

قال : انا رايح السينما ​

قلت له : زين حبيبى ترى مو حلوه​

انك تمشى وتبصق بالمجمع لأنه منظر مو حضاري كلش ​

جمعان قعد يطالع فينى ويدرس اسلوبى دراسه سريعه ​

وقدر أنه يكوّن نظره خاصه فى شخصيتى ​

قال : تبى شى ؟​

قلت له : سلامتك ​

المهم جان يبتعد عنى ويوم تأكد انه ابتعد خلاص​

جان يقول : يالحضري يال ........​

​

يا حلو كشته واهو منحاش يركض​

ومتبتب وشاد حيله ويلتفت يشوفنى ​

راح جمعان وكملت مع صاحبى مسيره التسوق​

فى هذا المجمع الحافل بالشباب وملاحقتهم للبنات​

على طارى البنات​

<< ايه على طارى الجنس الناعم​

لحظه لحظه​

<< صب له شاى وولع زقاره​

ايه بالنسبه للبنات​

مروا جدامى ثنتين منقبات ووحده محجبه​

وياليتها متنقبه ياليتها​

وترحم الشباب من شر الفتنه​

يعنى الله يحفظها صورتها ليما الحين عالقه فى خيالى مو راضيه تروح​

يعنى نحس بفوائد غض البصر فى هالاماكن​

عسى الله يحسن خاتمتنا​

جميله بشكل يفوق الوصف والخيال البشري​

الجمال المثير ما هو مقاييس لا ** حتى يحرّك ضمير يا زين فهمك.​

فعلا فى بنات فتنه للناظرين وحيره للعيون واشغال لقلوب عباد الله​

ونسأل الله السلامه يا أخوان​

ونعوذ بالله من الفتن ما ظهر منها وما بطن​

تقاربوا جزاكم الله خير فى درس دينى​

<< لا يسمعنا بو عمر​

لا جد يعنى شنو هذااا​

اللى قدر يمسح من عقلى الطفره الرومانسيه​

وحده مع رفيجتها نوعيه اللى حاطين قوطى روب​

والكحل الظاهر يوصلهم بلاش ​

يعنى مادرى هل العين يحطون فيها كحل والا الكحل يحطون فيه عين​

جنه واحد راشمها بقسات على عيونها​

هذه شفتها و انا داش محل وجوه واهم طالعين وفجأه عيونى بعيونهم​

جان اقول لا شعوريا : بسم الله ​

عاد شوفوا نظرات الامتعاض لى انا الفقير​

ونظره جانبيه كأنها تقول : شنو هالحقير اللى ما عنده ذوق ​

وهالثنتين رايحات ورادات على هالمجمع ومحد معطيهم ويه​

الظاهر حاشهم احباط​

ليش نلاحظ أن البنات اللى سفور ومطلعين شعورهن​

اعقل من ( بعض المنقبات )​

والله اشوفهم تكانه بعض البنات السفور بينما (بعض) المنقبات ​

للاسف الاصل فيها انها تكون تكانه لانها منقبه​

بس بعضهن مطيوره يمال الطيره​

لكن ولله الحمد أن اغلبيه المنقبّات فعلا ملتزمات​

عسى الله يكثرّهن ويحفظهن ​

ونكمل جولتنا فى المجمع بعدما شرينا ساعات وجم عطر​

واشوف صديقى جمعان فى مطعم ومجابل هالوجبه ​

وقاعد ياكل عسى عوافى​

قلت مابى اخرب عليه وجبته​

واطلع للقهاوى اللى بره على النافوره​

والا يا حى اللى داخل عن اللى بره​

شلّه بنات قاعدين يشربون قهوه والا شاى ​

ودار مادراهم امواج بشريه من الشباب​

انا طفيت بلوتوثى من كثر ما اشوف هالشباب كل واحد مبقق فى تلفونه​

على امل ظهور نك نيم نسائى​

قعدت مع صاحبى فى مكان صاد بالقهاوى اللى مجابله لانه قليل احد يقعد فيها​

وساعه قعدنا والا اربع بنات قعدوا يمنّا​

تاركين كل هالطاولات ولا قعدتوا الا يمنّا​

تضايقت انا بصراحه​

<< ​

أيه أيه​

مو من قلبى زين !!!​

والا ساحبين معاهم 12 الف واحد من الشباب​

وانا وصاحبى اللى نبحث عن المكان الهادىء لنترشف القهوه بهدوء وطمأنينه​

صرنا كأننا قاعدين فى الشارع من صجه هالشباب وازعاجهم ومغازلهم​

وهالكلمات القبيحه واساليب المغازل والتضبيط الركيكه​

يعنى اتذكر فى القرن الماضى​

لما الشباب يبون يغازلون يغمز بعينه بس​

<< ياسلام​

واذا يبى يرّقم ما عنده الا تلفون البيت​

يعنى اذا قط رقم​

يقعد 3 ايام معتكف بالبيت ومبقق عيونه على التلفون​

عسى ما يدق التلفون الا شاله بسرعه ​

وتطلع اللى متصله جارتهم تبى امّه​

ويقول لها على طول امّى مو اهنيه​

والعجوز اللى متصله راعيه طويله​

تقعد تسأل وتقول وين راحت​

واهو ما يبى يشغل الخط​

يقوم يسكر التلفون بوجه الفقيره​

يعنى معاناه قبل​

لكن الاكيد​

انها كانت ايام حلوه​

:وردة:​

 

[فيصل المطيري]

ههههههههههههههههههههه


امــا جمعــان هـــذا فــــلم لوووووول ​

 

[whahd1]

الا انت شمطلعك عقب 13 سنه انا انصحك ما تطلع الا عقب مثلهم

 

[Chartist]

​

واذا يبى يرّقم ما عنده الا تلفون البيت​

يعنى اذا قط رقم​

يقعد 3 ايام معتكف بالبيت ومبقق عيونه على التلفون​

عسى ما يدق التلفون الا شاله بسرعه ​

وتطلع اللى متصله جارتهم تبى امّه​

ويقول لها على طول امّى مو اهنيه​

والعجوز اللى متصله راعيه طويله​

تقعد تسأل وتقول وين راحت​

واهو ما يبى يشغل الخط​

يقوم يسكر التلفون بوجه الفقيره​

يعنى معاناه قبل​

لكن الاكيد​

انها كانت ايام حلوه​

:وردة:​

يا زينها من ايام

مافيه (( حبيبى عفيه عب لى كرت ماعندى رصيد))

 

[Normal]

فديت جمعان انا ياناس

جمعان .. وجيران جمعان .. واهل جمعان وجماعته :وردة:

اشوه انك ما تعرّضت له .. ولا اكيد راح اقولك نفس ما قالك جمعان ..

يالحضري .. يال ..


.. تقول صوره المنقبله للحين ببالك .. معذور يا ولد العم

منقباتكم يالمنطقه العاشره .. يثولون .. الي ما ينثول

افكر اشتري بيت حواليكم ..

حريم الجهرا فيهم شبه من وحش حولي ..

 

[آصال]

مجمـع الكوت بـل ..


أذكر رحت قبل 5 سنوات مع بنات العمومــه


ووورانا يهال .. شباب جذي صغار طقة عجمـان .. قصدي جمعـان


والمجمع بيصكر ففاظي كـلش مافي احد الا الورعان .. واحنا وماشين أهمه ورانا ..


وانا كنت قاعده امشي بسرعـه .. ويومها كنت لابسه وانتو بكرامه حذااء (فلات )


عاد صارت معاي هالحركه الخايسه اللي من السرعه يطير الحذااء والظريفين كانو وراي توني برجع باخذه ولا ياخذ حذائي ويحذفه من فوق .. وتتوقعون وين طاح (بالمحل مال العطورات اللي مصكر ومن فوق مبطـل مكشوف ..


بقيـت أذبحـه .. يعني هذي غشمره طلعوني من المجمع حافيـــــــــــه :باكي:


(إلة الأدب والمسخـره بتاعت الأيام دي )


جان يلحقنا لي السياره ويعتذر .. واهم شي يبي يشتريلي حذاء


قلت له روح بيتكم ..مشكور ماتقصر



وبعد تووووووووووووووووووووبه

 

[kkk]

سلامات سلامات
ما تشوف شر ...
المهم
علشان تعرف نتائج الحكم الاسلامي في
جمهورية الكويت الاشتراكية الاسلامية

وين ايام قبل الحلوة ......ايام ربعنا..

شنو قال على الحضر؟؟
اعترف......
ما علم الجويهل عنه

 

[سمو الروح]

بعد 13 سنه من أبتعادك عن المجمعات التجاريه

شفت جمعان و الله هاذي الروحه المباركه

يالحضري ​

 

[زيزوم]

انا اخر مره طبيت السوق قبل 13 سنه ​

صراحه ودي آصدق هذا موضوع ترفيهي ولا خيالي . . .!!



13 سنـه ماطبيـت السوووق صراااحه انت فلـم كثر من مواضيعك


تكلم بشي يدخل العقل

 

[أحمداني]

كح كح كح 12 سنة مو طالع السوق..!

شنو ما تشتري أهدوم العيد أنت

أما جمعان يدكرني بأخوه بجمعية سلوى يوم أنه يفتح كراتين ( المنغا ) وياكل وحده ورا الثانية

فحزتها لا تشوف دشداشته أم ثلاث ( زراير ) صارت لونها أصفر بعد ما كانت أبيض

عموماً أسلوبك في سرد الموضوع أعجبني

 

[عبدالله .]

تبقى مجرد فئة مهيتة عيالها للأسف
لا تربية ولا اخلاق
والشارع يربي !​

واما بنات قواطي الروب ايضاً تبقى فئة لايردعها دين ولا اخلاق​

عسى الله يهديهم إن شاء الله
لكن للأسف الوضع العام مايبشر بخير​

تدني المستوى الاخلاقي بشكل كبير
واعجبتني طريقتك الفكاهية ياسليل الجود ​

بس 12 سنة مو طاب السوق لوووول جنها قوية

بهالوقت خلو كل شي له حساب
لأن طلعات العوائل للمجمعات بالويك اند لأحد المجمعات الكبيرة مثل الافنيوز والكوت
مستحيلة

لاحظوا المجمعات الحين بالويك اند خاصة الافنيوز بالفترة الليلة
الشباب تلقاهم 3 اضعاف البنات إذا مو اكثر
وهذا يدل بأن الناس ملت ولاعب جبودها من المهازل اللي تصير​

​

 

[حباري]

وانا كنت قاعده امشي بسرعـه .. ويومها كنت لابسه وانتو بكرامه حذااء (فلات )
عاد صارت معاي هالحركه الخايسه اللي من السرعه يطير الحذااء والظريفين كانو وراي توني برجع باخذه ولا ياخذ حذائي ويحذفه من فوق .. وتتوقعون وين طاح (بالمحل مال العطورات اللي مصكر ومن فوق مبطـل مكشوف ..

هههههههههههههههههههههههههههههههههه ,, يا حيااتي يا حور حااسه فيج بس موقف الله يعينج


ذكرتيني بسالفة اختى لما راحت البنك وكانت قااعده وتتكلم ونوعيتها لما تتكلم تحرك ايديهااا جان يطير

خاتمهااا وراااح بعيد بعيد الي ماله نهااايه لوووووووووووووووول بعدين الموظف جابلهاا الخاتم


**اما ساالفة جمعاان خوووش سالفه فلم **​

 

[Draft]

اول مره قصه من قصص سليل الجود و الدنيا ما تمطر فيها العاده كله مطر

 

[سليل الجود]

ههههههههههههههههههههه​

امــا جمعــان هـــذا فــــلم لوووووول ​

صديقى جمعان ذو الشخصيه القويه

مو بس فيلم الا كارثه نوويه

الله يخليه لاهله

:وردة:



​

 

[سليل الجود]

الا انت شمطلعك عقب 13 سنه انا انصحك ما تطلع الا عقب مثلهم

القراده مطلعتنى

والا انا شايب

وينى ووين هالمجمعات والاسواق

الله يرحم ايام القيصريه بالعباسيه

قبل كانوا يسمّون السوق القيصريه

ليش مادرى ​

 

[سليل الجود]

يا زينها من ايام

مافيه (( حبيبى عفيه عب لى كرت ماعندى رصيد))

ايه

ولا فيه الواحد يقعد يلحق البنت ليما يدخلّها بيتها

لا ولغرفتها بعد

غير مغازل هذا






​

 

[سليل الجود]

جمعان .. وجيران جمعان .. واهل جمعان وجماعته :وردة:

اشوه انك ما تعرّضت له .. ولا اكيد راح اقولك نفس ما قالك جمعان ..

يالحضري .. يال ..


.. تقول صوره المنقبله للحين ببالك .. معذور يا ولد العم

منقباتكم يالمنطقه العاشره .. يثولون .. الي ما ينثول

افكر اشتري بيت حواليكم ..

حريم الجهرا فيهم شبه من وحش حولي ..

لا لا بس جمعان اللى فديته

مالنا شغل باهله وجيرانه

بعدين انا قلت وحده محجبّه

وقلت يا ليتها تتحجب من جمالها الصارخ

لا توهقنى يا نورمال مع البنات

وانت الحين تبى تشتري بيت بس عشان هالشغله

يا اخى

يا اخى

احىّ فيك هذا الطموح الغرامى

والاحساس الوطنى

وانت يوم تقول فى حريم الجهرا

شدعوه حلوه الكويت مو جهراويه

هذه حلوه الكويت كلها من عندكم

نسأل الله السلامه

:وردة:
​

 

[سليل الجود]

مجمـع الكوت بـل ..


أذكر رحت قبل 5 سنوات مع بنات العمومــه


ووورانا يهال .. شباب جذي صغار طقة عجمـان .. قصدي جمعـان


والمجمع بيصكر ففاظي كـلش مافي احد الا الورعان .. واحنا وماشين أهمه ورانا ..


وانا كنت قاعده امشي بسرعـه .. ويومها كنت لابسه وانتو بكرامه حذااء (فلات )


عاد صارت معاي هالحركه الخايسه اللي من السرعه يطير الحذااء والظريفين كانو وراي توني برجع باخذه ولا ياخذ حذائي ويحذفه من فوق .. وتتوقعون وين طاح (بالمحل مال العطورات اللي مصكر ومن فوق مبطـل مكشوف ..


بقيـت أذبحـه .. يعني هذي غشمره طلعوني من المجمع حافيـــــــــــه :باكي:


(إلة الأدب والمسخـره بتاعت الأيام دي )


جان يلحقنا لي السياره ويعتذر .. واهم شي يبي يشتريلي حذاء


قلت له روح بيتكم ..مشكور ماتقصر



وبعد تووووووووووووووووووووبه

يابنتى يا حور

هذه مو غشمره هذه لفته لطيفه بس

انا خابر غشمرتهم يمسكون البنت من شعرها

ويركضون فيها لاقرب طوفه

زين زين

يعنى عقلوا عيال المنطقه العاشره


​

 

[سليل الجود]

سلامات سلامات
ما تشوف شر ...
المهم
علشان تعرف نتائج الحكم الاسلامي في
جمهورية الكويت الاشتراكية الاسلامية

وين ايام قبل الحلوة ......ايام ربعنا..

شنو قال على الحضر؟؟
اعترف......
ما علم الجويهل عنه

بالعكس ياحبيبى kkk

هذه قمّه العلمانيه

لأن قبل ما كنتوا موجودين الله لا يكثر العلمانيه

وكانت ايامنا حلوه لا اسلاميين ولا علمانين

وايضا صديقى جمعان هو احد افرازات العلمانيين

بعدين الكلمه اللى قالها هذه سر

وبعباره اوضح يستاهل باند نهائى






​

 

[الشاب السياسي]

الله يخلي جمعان لهله .....
ويخليك في بيتكم والدوانيه وهاذي روحة مجمع صار جذي ....

شكرا اخوي العزيز فعلا موضوع جميل وضحكتني وعسي الله لايحرمك الضحكه