هلا والله اخوي الكريم المنصور واياك ان شاء الله ...
ماكو شي اسمه انا اكل وجبه وحده باليوم وابي اشوف فرق بجسمي .. او اني اكل وجبه باليوم وابي اضعف .. ثبت علميا ان تعدد الوجبات الصحيه يساعد على تحسن اداء الجسم وخروجه بشكل ايجابي .. وطبيعي يكون وزنك ثابت
شوف اخوي الكريم تعدد الوجبات جدا ضروري واحرص على وجبة الفطور الصحيه الكامله .. والغدى حاول ان يكون البروتين فيه عالي "دياي لحم سمج" واذا العيش كان حاضر يفضل انه مشخول او اكل مقدار كف ايدك وقوم .. ولا تروح النادي إلا وانت مهضم اي بعد ساعتين على الاقل من الغدا .. والعشا خله مبجر "يفضل ورى النادي مباشره"ولا تاكل ولا شي قبل لاتنام على الاقل بثلاث ساعات "مامن مشكله من تفاحه"
بالنسبه لتمرينك : اولا المشي ماهو تمرين .. بل هو اساس تعود عليه خصوصا إنا بالكويت كفار بهالرياضه الجميله وناسينها .. امش يوميا من نص ساعه لي 40 دقيقه وخل السرعه خمسه ماله داعي سته ونص .. والديكلاين "الميلان" خله صفر .. 12 !! يعور الركب ويسبب خشونه ياخوي !! مو مدرج هذا يبقى جهاز
بالنسبه لجدولك : اتبع الجدول هذا : اليوم الاول باي وتراي العب للباي 3 تمارين "داخل وبرى ولعضلة السنتر " والتراي العب له 4 تمارين " بار نايم , ودانبل ورى الراس , وكيبل , واخر شي حبل وزن اخفف شي والعب تكرار الحبل" وطبعا تبلش التراي قبل الباي
اليوم الثاني العب اكتاف والعب للاكتاف 5تمارين : 1 امامي صريح خله بار اول شهرين " ايدينك ضيجه على مستوى الجتف ولا تلعبه واقف قاعد ووضعية ظهرك مضبوطه" 4 جولات , 1 امامي جانبي 3 جولات 12 طقه , 1 جانبي صريح "كالرفرفه" تلعبه ست او خمس جولات وزن صغير وتكرر فيها 12 لي 15 , تمرينين خلفي كل واحد منهم بـ 3 جولات وزن صغير من 10 لي 12 طقه
اليوم الثالث : صدر تلعب خمس او ست تمارين : تبلش بار صدر عالي او دانبل "نوعله" بعدين تلعب دانبل ضيج عالي اول تمرينين 3 جولات , بعدين تمرين واحد مستوي 5 او 4 جولات بعدين تلعبله تمرين واحد تحت ديكلاين او متوازي "اذا ماتقدر على المتوازي عطه ديكلاين او بل اوفر "الديكلاين البار او الدانبل اللي انت نايم عكس" البل اوفر "الدانبل وانت نايم على البنش تقضبه بيدك الثنتين وايدك تكون مفروده إلا عكفه بسيطه ماتبين وتعطيه وانت نايم لي ورى وتييبه مره ثانيه لي نص صدرك , طبعا تمرين عضلة الصدر اللي تحت تكون كله تكرار , اخر شي تعطيه تجميع سواء كيبل او جهاز
اليوم الرابع : تعطيه بيطان "الظهر" روح قول فيه 5 لي 6 تمارين .. وطبعا يكون الوزن معقول وكله تكرار من 12 لي 15 , اثنين امامي واحد واسع , والثاني امامي ضيج 3 جولات , تعطيه منشار اربع لي خمس جولات عقب سحب كيبل ضيج , اخر شي تقدر تعطيه سحب خلفي واسع او جهاز على راحتك
اليوم الخامس ريول طبعا عضله كبيره ومهمه وحالها من حال كل العضلات تعطيها من 5 لي ست تمارين رفرفه امامي 4 جولات , دفع ريلك سبعه 3 جولات , سكوات "طبعا تكون مع المدرب ولاتسويها بالحر سوها بالبار الثابت وريلك تكون عاديه رقم 11 " بعدين تلعب رفرفه خلفي , اخر شي تلعب بطات ويكون البطات على شكل تمارين سوبر وتكرار تلعب البطات ست جولات
المشي يومي ومثل ماقلت لك من 30 لي 40 دقيقه , قبل التمرين وبعده اذا تبي اتمنى اني جاوبتك بعجاله ليش وراي دوام
اي شي موفاهمه اسال وانا اجاوبك
